ಹೊಂಬಾಳೆ ಫಿಲಂಸ್​ ನಿರ್ಮಾಣದ ಚಿತ್ರದಲ್ಲಿ ಪ್ರಭಾಸ್​ ನಟಿಸ್ತಾರಾ?

ಬೆಂಗಳೂರು: ಹೊಂಬಾಳೆ ಫಿಲಂಸ್​ ಸಂಸ್ಥೆಯು ಬುಧವಾರ ಹೊಸ ಚಿತ್ರವೊಂದನ್ನು ಘೋಷಿಸುವುದಾಗಿ ಸೋಷಿಯಲ್​ ಮೀಡಿಯಾದಲ್ಲಿ ಹೇಳಿಕೊಂಡಿದೆ. ಆದರೆ, ಆ ಚಿತ್ರದಲ್ಲಿ ಯಾರು ನಟಿಸಬಹುದು, ಯಾರು ನಿರ್ದೇಶನ ಮಾಡಬಹುದು, ಹೆಸರೇನಿರಬಹುದು ಎಂಬ ಕುತೂಹಲ ಹೆಚ್ಚಾಗಿದೆ.

ಇದನ್ನೂ ಓದಿ: ಐಂದ್ರಿತಾ- ದಿಗಂತ್​ ಎಷ್ಟು ವರ್ಷದ ಬಳಿಕ ಒಟ್ಟಿಗೆ ನಟಿಸ್ತಿದ್ದಾರೆ ಗೊತ್ತ?; ಈ ಜೋಡಿಗೆ ಕಿಚ್ಚನ ಹಾರೈಕೆಯೂ ಸಿಕ್ಕಿದೆ

ಎಲ್ಲಕ್ಕಿಂತ ಹೆಚ್ಚಾಗಿ, ಈ ಚಿತ್ರದಲ್ಲಿ ಪ್ರಭಾಸ್​ ನಟಿಸುತ್ತಾರಾ ಮತ್ತು ಈ ಚಿತ್ರವನ್ನು ಪ್ರಶಾಂತ್​ ನೀಲ್​ ನಿರ್ದೇಶಿಸುತ್ತಾರಾ ಎಂಬ ಪ್ರಶ್ನೆಯೊಂದು ಕೇಳಿಬರುತ್ತಿದೆ. ಎಲ್ಲ ಬಿಟ್ಟು ಈ ತರಹದ್ದೊಂದು ಸುದ್ದಿ ಹರಡುವುದಕ್ಕೆ ಕಾರಣವೇನಿರಬಹುದು ಎಂಬ ಪ್ರಶ್ನೆ ಬರುವುದು ಸಹಜ.

'ಕೆಜಿಎಫ್​ 2' ಚಿತ್ರದ ಚಿತ್ರೀಕರಣಕ್ಕಾಗಿ ಪ್ರಶಾಂತ್​ ನೀಲ್​ ಇದೀಗ ಹೈದರಾಬಾದ್​ನಲ್ಲಿ ಬೀಡುಬಿಟ್ಟಿದ್ದಾರೆ. ಈ ಮಧ್ಯೆ, ಕೆಲವು ದಿನಗಳ ಹಿಂದೆ ಅವರು ಪ್ರಭಾಸ್​ ಅವರನ್ನು ಭೇಟಿ ಮಾಡಿರುವ ಸುದ್ದಿ ಕೇಳಿಬಂದಿತ್ತು. ಆ ಸುದ್ದಿಗೆ ಇನ್ನಷ್ಟು ರೆಕ್ಕೆಪುಕ್ಕ ಸೇರಿಕೊಂಡಿದೆ. ಅದಕ್ಕೆ ಸರಿಯಾಗಿ, ಹೊಂಬಾಳೆ ಫಿಲಂಸ್​ ಸಂಸ್ಥೆಯು ಇನ್ನೊಂದು ಪ್ಯಾನ್​ ಇಂಡಿಯಾ ಚಿತ್ರ ಮಾಡುವುದಾಗಿ ಹೇಳಿದೆ.

ಇದನ್ನೂ ಓದಿ: ಕನ್ನಡದಲ್ಲಿ ರಚಿತಾ ರಾಮ್​ ಮಾಡಲಿರುವ ಪಾತ್ರ ಬಾಲಿವುಡ್​ನಲ್ಲಿ ಜಾನ್ವಿ ಕಪೂರ್​ಗೆ

ಹಾಗಾಗಿ, ಹೊಂಬಾಳೆ ಫಿಲಂಸ್​ನವರು ನಿರ್ಮಿಸುತ್ತಿರುವ ಚಿತ್ರದಲ್ಲಿ ಪ್ರಭಾಸ್​ ನಟಿಸುವ ಸಾಧ್ಯತೆ ಇದೆ ಮತ್ತು ಈ ಚಿತ್ರವನ್ನು ಪ್ರಶಾಂತ್​ ನೀಲ್​ ನಿರ್ದೇಶಿಸುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ. ಆದರೆ, ಈ ವಿಷಯವಾಗಿ ಚಿತ್ರತಂಡದವರು ಯಾವೊಂದು ಸುದ್ದಿಯನ್ನೂ ಹೊರಬಿಟ್ಟಿಲ್ಲ. ಅದಕ್ಕಾಗಿ ಬುಧವಾರದವರೆಗೂ ಕಾಯದೇ ವಿಧಿಯಿಲ್ಲ.

https://www.vijayavani.net/new-film-to-be-announced-from-hombale-films-on-wednesday/