ಚಾರ್ವಾಡಿ ಗ್ರಾಮದ ಮಠದ ಮಜಲು ಎಂಬಲ್ಲಿ ಕಾಡಾನೆಗಳ ಹಿಂಡು ತೋಟಕ್ಕೆ ಲಗ್ಗೆ ಇಟ್ಟಿದ್ದು, ಕೃಷಿಕ ಅನಂತ ರಾವ್ ಅವರ ತೋಟದಲ್ಲಿ 120ಕ್ಕಿಂತ ಅಧಿಕ ಅಡಕೆ ಮರಗಳನ್ನು ಮುರಿದು ಹಾಕಿದೆ. ಮುಂಜಾನೆ ಹೊತ್ತಿಗೆ ರಸ್ತೆಯಿಂದಲೇ ಸಂಚರಿಸಿ ಬಂದ ಕಾಡಾನೆಗಳು ಸೋಲಾರ್ ಬೇಲಿ ಇಲ್ಲದ ಕಡೆಯ ಸಣ್ಣ ಸ್ಥಳದ ಮೂಲಕ ತೋಟಕ್ಕೆ ನುಗ್ಗಿರುವುದು ಬೆಳಗ್ಗೆ 6ರ ಸುಮಾರಿಗೆ ಮನೆಯವರಿಗೆ ತಿಳಿದು ಬಂದಿದ್ದು, ಈ ವೇಳೆ ಕಾಡಾನೆಗಳು ತೋಟದಲ್ಲಿ ಸಂಚಾರ ನಡೆಸುತ್ತಿದ್ದವು. ತಕ್ಷಣ ಸೋಲಾರ್ ಬೇಲಿಯ ಸಂಪರ್ಕ ತಪ್ಪಿಸಿ ಆನೆಗಳನ್ನು ತೋಟದಿಂದ ಓಡಿಸಲಾಗಿದ್ದು, ಈ ವೇಳೆ 5 ದೊಡ್ಡ ಆನೆಗಳು ಹಾಗೂ 1 ಮರಿಯಾನೆ ಕಂಡುಬಂದಿವೆ. ಆನೆಗಳು ತೋಟದಿಂದ ಹೊರ ಹೋಗುವ ವೇಳೆ ಸೋಲಾರ್ ಬೇಲಿಯ 5 ಕಂಬಗಳಿಗೆ ಹಾನಿ ಉಂಟು ಮಾಡಿವೆ ಎಂದು ತೋಟದ ಮಾಲೀಕರ ಪುತ್ರ ಪ್ರಕಾಶ ನಾರಾಯಣ ರಾವ್ ತಿಳಿಸಿದ್ದಾರೆ.
