ಡಬ್ಲ್ಯುಎಚ್ಒ ಹೆಲ್ತ್ ಎಮರ್ಜೆನ್ಸೀಸ್ ಪ್ರೋಗ್ರಾಮ್ನ ಎಕ್ಸಿಕ್ಯೂಟಿವ್ ಡೈರೆಕ್ಟರ್ ಮೈಕೆಲ್ ರಿಯಾನ್ ಜಿನೇವಾದಲ್ಲಿ ಸುದ್ದಿಗೋಷ್ಠಿಯಲ್ಲಿ ಮಾತನಾಡುತ್ತ, ನಾವು ಚೀನಾದಲ್ಲಿರುವ ನಮ್ಮ ಸಹೋದ್ಯೋಗಿಗಳ ಜತೆಗೆ ನಿತ್ಯವೂ ಮಾತುಕತೆ ನಡೆಸುತ್ತೇವೆ. ವೈರಸ್ನ ಮೂಲ ಪತ್ತೆ ಹಚ್ಚುವ ವಿಚಾರದಲ್ಲಿ ಅಗತ್ಯ ಸೈಂಟಿಫಿಕ್ ತನಿಖೆಯನ್ನು ನಾವು ಒಟ್ಟಾಗಿ ಮಾಡುತ್ತಿದ್ದೇವೆ. ಚೀನಾದ ಅಧಿಕಾರಿಗಳು, ಜಗತ್ತಿನ ಎಲ್ಲ ಸರ್ಕಾರಗಳು ಮತ್ತು ನಾವು ಎಲ್ಲರೂ ವೈರಸ್ನ ಹುಟ್ಟು ಮತ್ತು ಮೂಲ ಅರಿಯುವ ಕುರಿತು ಬಹಳ ಕಾತರರಾಗಿದ್ದೇವೆ. ಈ ವಿಚಾರವಾಗಿ ನಿರಂತರವಾಗಿ ಚೀನಾದಿಂದ ಸಂದೇಶಗಳು ಲಭಿಸುತ್ತಿದ್ದು, ಅಲ್ಲಿಂದ ಬರುತ್ತಿರುವ ಮುಕ್ತ ಮನಸ್ಸಿನ ಸಹಕಾರ ನಮ್ಮ ಇನ್ನಷ್ಟು ಸಂದೇಹಗಳನ್ನು ನಿವಾರಿಸುವುದಕ್ಕೆ ಪೂರಕ ವಾತಾವರಣ ನಿರ್ಮಿಸಿದೆ ಎಂದು ಹೇಳಿದ್ದಾಗಿ ಕ್ಸಿನ್ಹುವಾ ವರದಿ ಮಾಡಿದೆ.
