ವಿಶ್ವ ಆರೋಗ್ಯ ಸಂಸ್ಥೆ ಒಪ್ಪಿಕೊಂಡಿದೆ ಸತ್ಯ; ಗಾಳಿಯಿಂದಲೂ ಸೋಂಕು; ಮಾಸ್ಕ್​ ಇಲ್ಲದಿದ್ದರೆ ಖಂಡಿತ ಆಪತ್ತು

ನವದೆಹಲಿ: ಗಾಳಿಯಿಂದಲೂ ಕರೊನಾ ಸೋಂಕು ಹರಡುತ್ತದೆ ಎಂದು 32 ದೇಶಗಳ 239 ತಜ್ಞ ವೈದ್ಯರು ನೀಡಿದ್ದ ಸಾಕ್ಷ್ಯಗಳನ್ನು ವಿಶ್ವ ಆರೋಗ್ಯ ಸಂಸ್ಥೆ ಒಪ್ಪಿಕೊಂಡಿದೆ.

ನೊವಲ್​ ಕರೊನಾ ವೈರಸ್​ ಗಾಳಿಯಲ್ಲಿರುವ ಕಣಗಳ ಮೂಲಕ ವ್ಯಕ್ತಿಯಲ್ಲಿ ಕೋವಿಡ್​ ಉಂಟು ಮಾಡಬಲ್ಲುದು ಎಂದು ಹಲವು ಸಾಕ್ಷ್ಯಾಧಾರಗಳನ್ನು ಒಳಗೊಂಡ ವರದಿಯನ್ನು ಒಪ್ಪಿಸಲಾಗಿತ್ತು. ಇದನ್ನು ಬುಧವಾರ ವಿಶ್ವ ಆರೋಗ್ಯ ಸಂಸ್ಥೆ ಅನುಮೋದಿಸಿದೆ.

ಇದನ್ನೂ ಓದಿ; ಮೊದಲ ಹಂತದಲ್ಲಿ 375 ಜನರ ಮೇಲೆ ದೇಶೀಯ ಲಸಿಕೆ ಕೊವಾಕ್ಸಿನ್​ ಪ್ರಯೋಗ; 13ರವರೆಗೆ ನೋಂದಣಿಗೆ ಅವಕಾಶ

ಗಾಳಿ ಹಾಗೂ ಗಾಳಿಯಲ್ಲಿರುವ ಕಣಗಳ ಮೂಲಕವೂ ಕರೊನಾ ಸೋಂಕು ಹರಡುವ ಸಾಧ್ಯತೆ ಇದೆ ಅಥವಾ ಇದು ಕೂಡ ಒಂದು ಕಾರಣ ಎಂದು ಗೊತ್ತಾಗಿರುವುದಾಗಿ ವಿಶ್ವ ಆರೋಗ್ಯ ಸಂಸ್ಥೆಯ ತಾಂತ್ರಿಕ ಮುಖ್ಯಸ್ಥೆ ಮರಿಯಾ ವ್ಯಾನ್​ ಕರ್ಖೊವೆ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದ್ದಾರೆ.

ವ್ಯಕ್ತಿ ಕೆಮ್ಮಿದಾಗ ಅಥವಾ ಸೀನಿದಾಗ ಕರೊನಾ ವೈರಸ್​ ಕಣಗಳು ನೆಲಕ್ಕೆ ಅಥವಾ ಇತರ ಮೇಲ್ಮೈಗಳಿಗೆ ಅಂಟಿಕೊಳ್ಳುತ್ತದೆ ಎಂದು ಈ ಮೊದಲು ವಿಶ್ವ ಆರೋಗ್ಯ ಸಂಸ್ಥೆ ಹೇಳಿತ್ತು. ಗಾಳಿ ಮೂಲಕ ಹರಡುವ ಸಾಧ್ಯತೆಯನ್ನು ಒಪ್ಪಿಕೊಂಡಿರಲಿಲ್ಲ.

ಇದನ್ನೂ ಓದಿ; ಕರೊನಾ ಲಸಿಕೆ ಪಡೆದ ಜಗತ್ತಿನ ಮೊತ್ತ ಮೊದಲ ವ್ಯಕ್ತಿ ಈತ; ಮೈನವಿರೇಳಿಸುವ ಕ್ಲಿನಿಕಲ್​ ಟ್ರಯಲ್​ ಅನುಭವ 

ಇದನ್ನು ಒಪ್ಪಿಕೊಳ್ಳಬೇಕು ಎಂಬುದು ನಮ್ಮ ಒತ್ತಾಯವಾಗಿತ್ತು ಎನ್ನುತ್ತಾರೆ ವರದಿಗೆ ಸಹಿ ಹಾಕಿದ್ದ ಕೊಲರಾಡೊ ವಿವಿ ತಜ್ಞರಾದ ಜೋಸ್​ ಜಿಮಿನೇಜ್. ಅದಕ್ಕೀಗ ಮನ್ನಣೆ ದೊರಕಿದ್ದು, ಹೊಸ ಆವಿಷ್ಕಾರದ ಹಿನ್ನೆಲೆಯಲ್ಲಿ ಕರೊನಾ ಬಗ್ಗೆ ಹೊರಡಿಸಲಾಗಿರುವ ಮಾರ್ಗಸೂಚಿಯನ್ನು ಪರಿಷ್ಕೃತಗೊಳಿಸಬೇಕೆಂದು ತಜ್ಞರು ಆಗ್ರಹಿಸಿದ್ದಾರೆ.

ಈ ಹಿನ್ನೆಲೆಯಲ್ಲಿ ಮಾಸ್ಕ್​ ಧರಿಸದೆ ಇರುವುದು, ವ್ಯಕ್ತಿಗತ ಅಂತರ ಕಾಯ್ದುಕೊಳ್ಳದೆ ಇರುವುದು ಕರೊನಾಗೆ ಆಹ್ವಾನ ನೀಡಿದಂತೆ ಎಂಬುದಂತೂ ಖಚಿತ.

https://www.vijayavani.net/how-will-corona-pandemic-end-there-are-two-ways/