ಕುಡಿದ ಅಮಲಿನಲ್ಲಿ ಥಾರ್ ಏರಿದ ಯುವತಿಯರು: ಸ್ಟಂಟ್ ಮಾಡಲು ಹೋಗಿ ರಸ್ತೆಗೆ ಬಿದ್ದ ಸುಂದರಿ; ವಿಡಿಯೋ ವೈರಲ್​! Viral Video

ನವದೆಹಲಿ: ಇಂಟರ್ನೆಟ್ ಜಗತ್ತಿನಲ್ಲಿ ಫೇಮಸ್ ಆಗಬೇಕು, ನಾಲ್ಕು ಜನ ತಮ್ಮನ್ನು ನೋಡಬೇಕು ಎಂಬ ಹಪಾಹಪಿಗೆ ಬಿದ್ದಿರುವ ಯುವ ಪೀಳಿಗೆ ಅಪಾಯಕಾರಿ ಸಾಹಸಗಳನ್ನು ಮಾಡುತ್ತಿರುವುದು ಸಾಮಾನ್ಯವಾಗಿದೆ.

ಅದರಲ್ಲೂ ಮದ್ಯಪಾನ ಮಾಡಿ ವಾಹನ ಚಲಾಯಿಸುವುದು ಮತ್ತು ರಸ್ತೆಯಲ್ಲಿ ಸಾಹಸ ಪ್ರದರ್ಶಿಸುವುದು ಕಾನೂನುಬಾಹಿರ ಎಂಬ ಅರಿವಿದ್ದರೂ ಇಂತಹ ಘಟನೆಗಳು ಮರುಕಳಿಸುತ್ತಲೇ ಇವೆ. ಪ್ರಸ್ತುತ ಸಾಮಾಜಿಕ ಜಾಲತಾಣದಲ್ಲಿ ಇಂತದ್ದೆ ಒಂದು ವಿಡಿಯೋ ವೈರಲ್ (Viral Video)​ ಆಗುತ್ತಿದೆ.

ಸಾಮಾಜಿಕ ಜಾಲತಾಣ ವೇದಿಕೆ ಎಕ್ಸ್​(ಟ್ವಿಟರ್​) ನಲ್ಲಿ ಹಂಚಿಕೊಳ್ಳಲಾದ ಈ ವಿಡಿಯೋದಲ್ಲಿ, ರಾತ್ರಿಯ ಸಮಯದಲ್ಲಿ ರಸ್ತೆಯೊಂದರಲ್ಲಿ ಐಷಾರಾಮಿ ಥಾರ್ ಕಾರಿನ ಮೇಲೆ ಇಬ್ಬರು ಹುಡುಗಿಯರು ಕುಳಿತಿರುವುದನ್ನು ಕಾಣಬಹುದು. ವರದಿಗಳ ಪ್ರಕಾರ, ಆ ಇಬ್ಬರೂ ಯುವತಿಯರು ಸಂಪೂರ್ಣವಾಗಿ ಮದ್ಯ ಸೇವಿಸಿದ್ದು, ತೂರಾಡುತ್ತಿದ್ದರು. ಮದ್ಯದ ಅಮಲಿನಲ್ಲಿ ಏನೂ ಅರಿಯದ ಅವರಲ್ಲಿ ಒಬ್ಬಾಕೆ ಥಾರ್ ಕಾರಿನ ಛಾವಣಿಯ (Roof) ಮೇಲೆ ಕುಳಿತು ಸ್ಟಂಟ್ ಮಾಡಲು ಪ್ರಯತ್ನಿಸುತ್ತಿದ್ದಾಳೆ.

ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆ ಜೋರಾಗಿದೆ. ಹೆಚ್ಚಿನ ಜನರು ಈ ಕೃತ್ಯವನ್ನು ಮೂರ್ಖತನದ ಪರಮಾವಧಿ ಎಂದು ಕರೆದಿದ್ದಾರೆ.

ಒಬ್ಬ ಬಳಕೆದಾರರು, ಸಿನಿಮಾಗಳಲ್ಲಿ ಈ ರೀತಿಯ ಸಾಹಸಗಳು ಚೆನ್ನಾಗಿ ಕಾಣುತ್ತವೆ; ಆದರೆ ರಸ್ತೆಯಲ್ಲಿ ಸಾಹಸ ಮಾಡಿದರೆ ಮೂಳೆಗಳು ಮುರಿಯುತ್ತವೆ ಎಂದು ವ್ಯಂಗ್ಯವಾಡಿದ್ದಾರೆ. ಮತ್ತೊಬ್ಬರು, ಸ್ಟಂಟ್‌ಗಳ ಹೆಸರಿನಲ್ಲಿ ಪ್ರಾಣ ಕಳೆದುಕೊಳ್ಳುವುದು ಧೈರ್ಯವಲ್ಲ, ಅದು ಹುಚ್ಚುತನ ಎಂದು ಕಿಡಿಕಾರಿದ್ದಾರೆ. ಇನ್ನೂ ಕೆಲವರು, ಇಂತಹ ವೀಡಿಯೊಗಳನ್ನು ಮಾಡುವವರ ವಿರುದ್ಧ ಪೊಲೀಸ್ ಇಲಾಖೆ ಕಠಿಣ ಕ್ರಮ ಕೈಗೊಳ್ಳಬೇಕು, ಇವರ ಡ್ರೈವಿಂಗ್ ಲೈಸೆನ್ಸ್ ರದ್ದು ಮಾಡಬೇಕು ಎಂದು ಆಗ್ರಹಿಸಿದ್ದಾರೆ,(ಏಜನ್ಸೀಸ್​).