ಮೊದಲ ಭಾಗದಲ್ಲಿ ಭೂಮಿಯ ಆಯಸ್ಸು ಮುಗಿಯುತ್ತಾ ಬಂದಿದ್ದು, ಮನುಕುಲ ಜೀವಿಸಲು ಯೋಗ್ಯವಾದ ಹೊಸ ಗ್ರಹ ಹುಡುಕಿಕೊಂಡು ಹೋಗುವ ವಿಜ್ಞಾನಿಗಳಿಗೆ ಪೆಂಡೋರಾ ಎಂಬ ಚಂದ್ರ ಸಿಗುತ್ತದೆ. ಅಲ್ಲಿನ ಮೂಲ ನಿವಾಸಿಗಳೇ ಈ ಅವತಾರ್ಗಳು. ಮನುಷ್ಯನಾಗಿ ಹೋಗಿ ಅವತಾರ್ಗಳಂತೆ ರೂಪ ಪಡೆಯುವ ಜೇಕ್ ಸಲ್ಲಿ (ಸ್ಯಾಮ್ ವರ್ದಿಂಗ್ಟನ್), ಅವರೊಳಗೊಬ್ಬನಾಗಿ ಅವತಾರ್ಗಳ ರಕ್ಷಣೆಗೆ ನಿಲ್ಲುತ್ತಾನೆ. ಅವರ ನಾಯಕನಾಗುತ್ತಾನೆ. ಆದರೆ, ಮನುಷ್ಯರು ಹಠವಾದಿಗಳು. ಹೇಗಾದರೂ ಮಾಡಿ ಅವತಾರ್ಗಳನ್ನು ಮಟ್ಟ ಹಾಕಿ, ಪೆಂಡೋರಾಗೆ ಶಿಫ್ಟ್ ಆಗಲೇಬೇಕೆಂದು ಪಣತೊಟ್ಟು, ಯುದ್ಧ ಸಾರುತ್ತಾರೆ. ಅಲ್ಲಿನ ನೈಸರ್ಗಿಕ ಸಂಪತ್ತನ್ನು ಲೂಟಿ ಮಾಡುತ್ತಾರೆ. ಪ್ರಾಣಿ, ಪಕ್ಷಿ, ಜಲಚರಗಳನ್ನು ಬೇಟೆಯಾಡುತ್ತಾರೆ. ಜೇಕ್ ಸಲ್ಲಿ ಮೇಲೆ ಸೇಡು ತೀರಿಸಿಕೊಳ್ಳಲು ಹವಣಿಸುತ್ತಾರೆ. ಆಗ ನಾವಿ ಕುಲದ ನಾಯಕನಾಗಿದ್ದರೂ ಜೇಕ್, ತನ್ನ ಕುಟುಂಬದೊಂದಿಗೆ ಆ ಜಾಗವನ್ನು ತೊರೆಯುತ್ತಾನೆ. ಅರಣ್ಯ ಕುಲದವನಾಗಿದ್ದರೂ, ಸಮುದ್ರದಲ್ಲಿ ವಾಸಿಸುವ ಮತ್ತೊಂದು ಅವತಾರ್ ಕುಲದ ಬಳಿ ಆಶ್ರಯ ಕೋರುತ್ತಾನೆ. ಮುಂದೆ? ಸಮುದ್ರಲೋಕದ ಅನಾವರಣ. ಮತ್ತೊಮ್ಮೆ ಸಂಘರ್ಷ. ಸಿನಿಮಾ ನೋಡುತ್ತಾ ಪ್ರೇಕ್ಷಕರೂ ಹೊಸ ಪ್ರಪಂಚದಲ್ಲಿ ಕಳೆದು ಹೋಗುವ ಅನುಭವ...
