ಆರ್​ಸಿಬಿ ಗೆಲುವಿಗೆ ಅಲ್ಲಿಂದಲೇ ಶುಭಕೋರಿದ ವಿಜಯ್​​ ಮಲ್ಯ! ದಯವಿಟ್ಟು ಫೈನಲ್​ಗಾದ್ರೂ ಭಾರತಕ್ಕೆ ಬನ್ನಿ…

ಬೆಂಗಳೂರು: ನಿನ್ನೆ (ಮೇ.18) ಇಲ್ಲಿನ ಎಂ. ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಐಪಿಎಲ್ 17ನೇ ಆವೃತ್ತಿಯ ಅತ್ಯಧ್ಭುತ ಅಭಿಮಾನಿಗಳನ್ನು ಹೊಂದಿರುವ ಎರಡು ಬಲಿಷ್ಠ ತಂಡಗಳಾದ ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ ನಡುವಿನ ರೋಚಕ ಪಂದ್ಯದಲ್ಲಿ 27 ರನ್​ಗಳಿಂದ ಆರ್​ಸಿಬಿ ಭರ್ಜರಿ ಜಯ ಗಳಿಸಿತು. ಈ ಐತಿಹಾಸಿಕ ಗೆಲುವು ಸ್ಟೇಡಿಯಂನಲ್ಲಿ ಕುಳಿತ್ತಿದ್ದ ಬೆಂಗಳೂರು ಅಭಿಮಾನಿಗಳು ಹುಚ್ಚೆದ್ದು ಕುಣಿಯುವಂತೆ ಮಾಡಿದ್ದಲ್ಲದೇ ಟಿವಿ ಮುಂದಿದ್ದ ವೀಕ್ಷಕರನ್ನು ಸಂಭ್ರಮಿಸುವಂತೆ ಮಾಡಿತು. ಈ ಮ್ಯಾಚ್​ನಲ್ಲಿ ಯಾವುದೇ ಕಾರಣಕ್ಕೂ ಆರ್​ಸಿಬಿ ಸಿಎಸ್​ಕೆ ತಂಡವನ್ನು ಮಣಿಸಿ, ಪ್ಲೇಆಫ್ ಹೋಗಲು ಸಾಧ್ಯವೇ ಇಲ್ಲ ಎಂದು ಸವಾಲು ಹಾಕಿದ್ದವರೆಲ್ಲಾ ಇದೀಗ ತಮ್ಮ ನೆರಳು ಸಹ ಕಾಣಿಸಿದಂತೆ ಮರೆಯಾಗಿದ್ದಾರೆ.

ಇದನ್ನೂ ಓದಿ: ಹುಬ್ಬಳ್ಳಿ ನೇಹಾ, ಅಂಜಲಿ ಪ್ರಕರಣದ ಬಗ್ಗೆ ADGP ಹಿತೇಂದ್ರ ಹೇಳಿದ್ದೇನು?

27 ರನ್​ಗಳಿಂದ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ತಮ್ಮ ತವರಿನಲ್ಲಿಯೇ ಗೆದ್ದು ಬೀಗಿದ ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ಪಡೆಗೆ ಎಲ್ಲಿಲ್ಲದ ಸಂಭ್ರಮ, ಸಡಗರ ಆವರಿಸಿಕೊಂಡಿತು. ಐಪಿಎಲ್ ಇತಿಹಾಸದಲ್ಲಿ ಅತ್ಯಂತ ಹೆಚ್ಚಿನ ಹಾಗೂ ನಿಯತ್ತಿನ ಅಭಿಮಾನಿಗಳನ್ನು ಅಪಾರ ಸಂಖ್ಯೆಯಲ್ಲಿ ಹೊಂದಿರುವ ಹೆಗ್ಗಳಿಕೆ ಆರ್​ಸಿಬಿ ತಂಡಕ್ಕೆ ಮಾತ್ರ ಇದೆ. ಈ ಸಾಲಿನಲ್ಲಿ ಸಿಎಸ್​ಕೆ ಕೂಡ ಇದೆ. ಆದ್ರೆ, ಆರ್​ಸಿಬಿ ಬೆಂಬಲಿಗರ ಬಲವನ್ನು ಮುರಿಯಲು ಸಾಧ್ಯವಿಲ್ಲ ಎನ್ನುವಂತೆ ತೋರುತ್ತದೆ.

ಒಂದೆಡೆ ರೋಚಕ ಪಂದ್ಯ ಗೆದ್ದು, ಅಧಿಕೃತವಾಗಿ ಪ್ಲೇಆಫ್​ಗೆ ಎಂಟ್ರಿ ಕೊಟ್ಟ ಸಂಭ್ರಮದಲ್ಲಿ ಆರ್​ಸಿಬಿ ಇದ್ದರೆ, ಮತ್ತೊಂದೆಡೆ ಸವಾಲಿಗೆ ಸವಾಲೆಸೆದು, ಭಾರೀ ಪೈಪೋಟಿ ನೀಡಿ, ಗೆಲುವು ಸಾಧಿಸಿದ್ದಕ್ಕೆ ಸಿನಿಮಾ ಸೆಲೆಬ್ರಿಟಿಗಳು ಸೇರಿದಂತೆ ರಾಜಕೀಯ ಗಣ್ಯರು ಆಟಗಾರರಿಗೆ ಪ್ರಶಂಸಿಸಿ, ಟ್ವೀಟ್ ಮೂಲಕ ಅಭಿನಂದನೆ ತಿಳಿಸಿದರು. ಈ ಮಧ್ಯೆ ವಿದೇಶದಲ್ಲಿ ನೆಲೆಸಿರುವ ಉದ್ಯಮಿ ವಿಜಯ್ ಮಲ್ಯ ಕೂಡ ವಿಶೇಷ ಅಭಿನಂದನೆ ತಿಳಿಸಿದ್ದು, ಇದೀಗ ಆರ್​ಸಿಬಿ ಅಭಿಮಾನಿಗಳ ಲೇವಡಿಗೆ ಸಿಲುಕಿದ್ದಾರೆ.

ಇದನ್ನೂ ಓದಿ: ಫಿಡೆ ರೇಟೆಡ್‌ 17 ವರ್ಷದೊಳಗಿನವರ ಚೆಸ್ ಟೂರ್ನಿ: ಪ್ರತೀತಿ, ಆರುಷಿ ರನ್ನರ್ ಅಪ್‌, ಅಕ್ಷಯಾ, ಸಿದ್ಧಾಂತ್‌ಗೆ ಚಾಂಪಿಯನ್ ಪಟ್ಟ

"ಟಾಪ್​ ನಾಲ್ಕರಲ್ಲಿ ಸ್ಥಾನ ಗಳಿಸಿ, ಐಪಿಎಲ್​ ಪ್ಲೇಆಫ್ ​ತಲುಪಿದ ಆರ್‌ಸಿಬಿಗೆ ನನ್ನ ಹೃತ್ಪೂರ್ವಕ ಅಭಿನಂದನೆಗಳು. ಪ್ರಾರಂಭದಲ್ಲಿ ನಿರಾಶಾದಾಯಕ ಆರಂಭ ಪಡೆದು ನಂತರದಲ್ಲಿ ಅತ್ಯದ್ಭುತ ಪ್ರದರ್ಶನ ನೀಡಿ, ಗೆಲುವಿನ ಆವೇಗವನ್ನು ಸೃಷ್ಟಿಸಿದ್ದೀರಿ. ಈಗ ಟ್ರೋಫಿ ಗೆಲ್ಲುವ ಕಡೆ ಹೆಚ್ಚು ಗಮನಹರಿಸಿ" ಎಂದು ತಮ್ಮ ಎಕ್ಸ್​ (ಈ ಹಿಂದಿನ ಟ್ವಿಟರ್) ಖಾತೆಯಲ್ಲಿ ಬರೆದು, ಶುಭಕೋರಿದ್ದಾರೆ. ಸದ್ಯ ಈ ಟ್ವೀಟ್ ಸಿಕ್ಕಾಪಟ್ಟೆ ವೈರಲ್ ಆಗಿದ್ದು, ಪ್ಲೇಆಫ್ ಇಲ್ಲ ಫೈನಲ್ ಪಂದ್ಯ ನೋಡಲಾದರೂ ಬೆಂಗಳೂರಿಗೆ ಬನ್ನಿ ಎಂದೆಲ್ಲಾ ಅಭಿಮಾನಿಗಳು ಕಮೆಂಟ್ ಮಾಡಿ, ಮಲ್ಯ ಕಾಲೆಳೆದಿದ್ದಾರೆ.

https://www.vijayavani.net/ruturaj-gaikwad-feels-sad-after-losing-to-rcb

https://www.vijayavani.net/rohit-sharma-breaks-silence-over-his-video-leak