ವ್ಲಾಡಿವೋಸ್ಟೋಕ್: ಜಸ್ಟ್ ಮಿಸ್… ಇಲ್ಲಾಂದ್ರೆ 8 ಅಡಿ ಉದ್ದದ ಕಾಂಕ್ರೀಟ್ ಸ್ಲ್ಯಾಬ್ ತಲೆಮೇಲೆ ಬೀಳ್ತಾ ಇತ್ತು.. ರಷ್ಯಾದ ಬಂದರು ನಗರಿ ವ್ಲಾಡಿವೋಸ್ಟೋಕ್ನಲ್ಲಿ ನಡೆದ ಬೆಚ್ಚಿಬೀಳಿಸುವ ಘಟನೆ ಇದು. ಸಿಸಿಕ್ಯಾಮರಾದಲ್ಲಿ ಈ ದೃಶ್ಯ ರೆಕಾರ್ಡ್ ಆಗಿದ್ದು, ನಂತರ ಇದು ಸಾಮಾಜಿಕ ಜಾಲತಾಣಗಳ ಮೂಲಕ ವೈರಲ್ ಆಗಿದೆ.
ಹಿಂಬದಿ ಸೀಟಿನಲ್ಲಿತ್ತು 5 ವರ್ಷದ ಮಗು!
ಕಾರಿನ ಹಿಂಬದಿ ಸೀಟಿನಲ್ಲಿ ಐದು ವರ್ಷದ ಹೆಣ್ಣು ಮಗು ಒಂದಿತ್ತು. ಅದೃಷ್ಟವಶಾತ್ ಆಕೆ ಯಾವುದೇ ಪ್ರಾಣಾಪಾಯವಿಲ್ಲದೇ ಪಾರಾಗಿದ್ದಾಳೆ. ಆಕೆಯ ತಂದೆ ತನಗೆ ಮತ್ತು ಮಗಳಿಗೆ ಇದು ಎರಡನೇ ಜನ್ಮ ಎಂದು ಹೇಳಿಕೊಂಡು ದೇವರನ್ನು ಕೊಂಡಾಡಿದ್ದಾರೆ.
ಸಿಸಿಟಿವಿ ದೃಶ್ಯದಲ್ಲಿರುವುದು ಇಷ್ಟು- ಹಿಮಾವೃತ್ತವಾದ ನಗರದಲ್ಲಿ ಕಾರುಗಳ ಮೇಲೆಲ್ಲ ಹಿಮದ ಹೊದಿಕೆ. ಕಾರಿನ ಬಳಿ ಬಂದ ವ್ಯಕ್ತಿ ಅದರ ವಿಂಡ್ ಸ್ಕ್ರೀನ್ ಮೇಲಿದ್ದ ಹಿಮವನ್ನು ದೂರ ಸರಿಸುತ್ತಿದ್ದ. ಅಷ್ಟರಲ್ಲಿ ಅದೇನೋ ಸದ್ದಾದಂತಾಗಿ ಮೇಲೆ ನೋಡಿದ.. ಕೂಡಲೇ ಹಿಂದಕ್ಕೋಡಿದ. ಅದೇ ಹೊತ್ತಿಗೆ ಬೃಹತ್ ಕಾಂಕ್ರೀಟ್ ಸ್ಲ್ಯಾಬ್ ಒಂದು ಕಾರಿನ ಮಧ್ಯಭಾಗಕ್ಕೇ ಬಿದ್ದುಬಿಟ್ಟಿತು. ಬಿದ್ದ ರಭಸಕ್ಕೆ ಕಾರು ನಜ್ಜುಗುಜ್ಜಾಗಿದೆ.
ಇದನ್ನೂ ಓದಿ: ಶಿವಸೇನಾ ಕಾರ್ಯಕರ್ತ ‘ಕರಾಚಿ’ ಸ್ವೀಟ್ಸ್ ಹೆಸರು ಬದಲಿಸಿ ಅಂದ: ಆ ಬೇಡಿಕೆ ಪಕ್ಷದ್ದಲ್ಲ ಎಂದ ಶಿವಸೇನೆ !
ಈ ಘಟನೆ ನಡೆದಿರುವುದು ನೆಬುಟಾ ಸ್ಟ್ರೀಟ್ನಲ್ಲಿ. ಒಂಭತ್ತನೇ ಮಹಡಿಯಿಂದ ಸ್ಲ್ಯಾಬ್ ಬಿದ್ದಿದೆ. 8 ಅಡಿ ಉದ್ದ 4 ಅಡಿ ಅಗಲ ಇತ್ತು ಅದು. ಈ ನಗರ ಹಿಮಾವೃತವಾದಾಗ ಕಟ್ಟಡಗಳ ಮೇಲಿನ ಸಿಮೆಂಟ್ ಸ್ಲ್ಯಾಬ್ ಬೀಳುವುದು ಹೊಸದಲ್ಲ. ಈ ಹಿಂದೆಯೂ ಇದೇ ರೀತಿ ಸಿಮೆಂಟ್ ಸ್ಲ್ಯಾಬ್ ಬೇರೊಂದು ವಾಹನದ ಮೇಲೆ ಬಿದ್ದಿತ್ತು. ಸಿಮೆಂಟ್ ಸ್ಲ್ಯಾಬ್ ಬೀಳುತ್ತಿರುವುದು ನಿಗೂಢವಾಗಿದ್ದು, ರಹಸ್ಯ ಬೇಧಿಸುವ ಪ್ರಯತ್ನವನ್ನು ಅಧಿಕಾರಿಗಳು ನಡೆಸಿದ್ದಾರೆ. (ಏಜೆನ್ಸೀಸ್)
ವಿಡಿಯೋ ನೋಡಲು ಈ ಲಿಂಕ್ ಕ್ಲಿಕ್ಕಿಸಿ: ಜಸ್ಟ್ ಮಿಸ್.. ಇಲ್ಲಾಂದ್ರೆ 8 ಅಡಿ ಉದ್ದದ ಕಾಂಕ್ರೀಟ್ ಸ್ಲ್ಯಾಬ್ ತಲೆಮೇಲೆ ಬೀಳ್ತಾ ಇತ್ತು !
