ಆರ್​ಸಿಬಿ ಮೇಲೆ ಯಾಕಿಷ್ಟು ಕೋಪ? WPL ಟ್ರೋಫಿ ಗೆದ್ದರೂ ನಿಲ್ಲದ ನಿಂದನೆ, ಅಭಿಮಾನಿಗಳಿಗೆ ಬೇಸರ

ನವದೆಹಲಿ: ಇಂಡಿಯನ್​ ಪ್ರೀಮಿಯರ್​ ಲೀಗ್​ನಲ್ಲಿ ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು (ಆರ್​ಸಿಬಿ) ತಂಡಕ್ಕಿರುವ ಕ್ರೇಜ್​ ಬೇರೆ ಯಾವ ತಂಡಕ್ಕೂ ಇಲ್ಲ. 16 ವರ್ಷಗಳ ಇತಿಹಾಸದಲ್ಲಿ ಒಮ್ಮೆಯೂ ಟ್ರೋಫಿ ಜಯಿಸದಿದ್ದರೂ ಆರ್​ಸಿಬಿಗೆ ಇರುವ ಕ್ರೇಜ್​ ಮತ್ತು ಖ್ಯಾತಿ ಗುಲಗಂಜಿಯಷ್ಟು ಕಡಿಮೆಯಾಗಿಲ್ಲ. ಇಷ್ಟೊಂದು ಕ್ರೇಜ್​ಗೆ ಕಾರಣ ವಿರಾಟ್​ ಕೊಹ್ಲಿ. ಇನ್ನು ಆರ್​ಸಿಬಿ ಮಹಿಳಾ ತಂಡವೂ ಕೂಡ ಅದೇ ಮಟ್ಟದ ಕ್ರೇಜ್​ ಹೊಂದಿದೆ.

ನಿನ್ನೆಯಷ್ಟೇ ಮುಕ್ತಾಯಗೊಂಡ ವುಮೆನ್ಸ್ ಪ್ರೀಮಿಯರ್ ಲೀಗ್ (ಡಬ್ಲ್ಯುಪಿಎಲ್)ನ ಮೊದಲ ಪಂದ್ಯದಲ್ಲಿ ಆರ್​ಸಿಬಿ ನಾಯಕಿ ಸ್ಮೃತಿ ಮಂದಾನ ಮಾತನಾಡುವಾಗ ಅಭಿಮಾನಿಗಳು ಮೊಳಗಿಸಿದ ಘೋಷಣೆಯನ್ನು ಕೇಳಿ ಒಂದು ಕ್ಷಣ ಸ್ಮೃತಿ ಅವರೇ ದಂಗಾಗಿದ್ದರು. ಇದೀಗ ಡಬ್ಲ್ಯುಪಿಎಲ್​ನಲ್ಲಿ ಆರ್​ಸಿಬಿ ಜಯಭೇರಿ ಬಾರಿಸಿದ್ದು, ಚೊಚ್ಚಲ ಪ್ರಶಸ್ತಿಯನ್ನು ಮುಡಿಗೇರಿಸಿಕೊಂಡಿದೆ. 16 ವರ್ಷಗಳ ಕಾಯುವಿಕೆಗೆ ಆರ್​ಸಿಬಿ ವನಿತೆಯರು ಬ್ರೇಕ್​ ಹಾಕಿದರೂ ಕೂಡ ಇನ್ನೂ ಒಂದು ಸಂಗತಿ ಆರ್​ಸಿಬಿ ಅಭಿಮಾನಿಗಳನ್ನು ಕಾಡುತ್ತಲೇ ಇದೆ.

ಐಪಿಎಲ್​ ಆರಂಭದಿಂದಲೂ ಆರ್​ಸಿಬಿ ತಂಡ ಉತ್ತಮ ಮತ್ತು ಬಲವಾದ ತಂಡ ಎನಿಸಿಕೊಂಡಿದೆ. ಆದರೂ ಆರ್​ಸಿಬಿ ಟ್ರೋಫಿ ಜಯಿಸುವಲ್ಲಿ ವಿಫಲವಾಗಿದೆ. ಟೀಂ ಇಂಡಿಯಾದಲ್ಲಿ ಕೊಹ್ಲಿ ಜನಪ್ರಿಯತೆ ಹೆಚ್ಚಾದಂತೆ ಆರ್‌ಸಿಬಿಗೆ ಫ್ಯಾನ್ ಫಾಲೋಯಿಂಗ್ ಕೂಡ ಹೆಚ್ಚಿದೆ. ಜನಪ್ರಿಯತೆಯ ದೃಷ್ಟಿಯಿಂದ ಆರ್​ಸಿಬಿ ಐಪಿಎಲ್‌ನಲ್ಲಿ ಮಾತ್ರವಲ್ಲದೆ ವಿಶ್ವದ ನಂಬರ್ ಒನ್ ಫ್ರಾಂಚೈಸಿ ಕ್ರಿಕೆಟ್ ತಂಡವಾಗಿಯೂ ಮುಂದುವರೆದಿದೆ. ಅದಕ್ಕೆ ಕಾರಣ ವಿರಾಟ್ ಕೊಹ್ಲಿ ಎಂದು ಪ್ರತ್ಯೇಕವಾಗಿ ಹೇಳಬೇಕಾಗಿಲ್ಲ. ಆದರೂ ಆರ್​ಸಿಬಿ ಒಂದು ದೊಡ್ಡ ಕೊರತೆ ಇನ್ನೂ ಕಾಡುತ್ತಲೇ ಇದೆ. ಅದೇನೆಂದರೆ, ಐಪಿಎಲ್​ ಕಪ್​. ಇಲ್ಲಿಯವರೆಗೂ 16 ಸೀಸನ್​ ಕಳೆದಿದೆ. ಇದರಲ್ಲಿ ಮೂರು ಬಾರಿ ಆರ್​ಸಿಬಿ ಫೈನಲ್​ ತಲುಪಿದೆ. 2009, 2011 ಮತ್ತು 2016ರಲ್ಲಿ ಆರ್​ಸಿಬಿ ಫೈನಲ್​ ಹೋಗಿ ಸೋಲುಂಡಿತು.

ಕೊಹ್ಲಿ, ಎ ಬಿ ಡಿವಿಲಿಯರ್ಸ್​, ಕ್ರಿಸ್​ ಗೇಲ್​ ಮತ್ತು ಡೇಲ್​ ಸ್ಟೇನ್​​ನಂತಹ ಸ್ಟಾರ್​ ಆಟಗಾರರಿದ್ದರೂ ಆರ್​ಸಿಬಿ ಕಪ್​ ಗೆಲ್ಲಲು ಸಾಧ್ಯವಾಗಿಲ್ಲ. ಉತ್ತಮ ಪ್ರದರ್ಶನ ನೀಡಿದರೂ ಗೆಲುವು ಸಿಗುತ್ತಿಲ್ಲ. ಹೀಗಾಗಿ ಆರ್​ಸಿಬಿ ಲಕ್​ ಚೆನ್ನಾಗಿಲ್ಲ ಎಂದು ಹೇಳಲಾಗುತ್ತಿದೆ. ಆದರೆ, ಈ ಬಾರಿ ಆರ್​ಸಿಬಿ ಮಹಿಳಾ ತಂಡ ಟ್ರೋಫಿ ಜಯಿಸುವ ಮೂಲಕನ ಗೌರವವನ್ನು ಎತ್ತಿಹಿಡಿದಿದೆ. ಕೊರತೆಯನ್ನೂ ನೀಗಿಸಿದೆ. ಆದರೂ ಆರ್​ಸಿಬಿ ಮೇಲಿನ ಟ್ರೋಲ್​ ಮಾತ್ರ ಇನ್ನೂ ಕಡಿಮೆಯಾಗಿಲ್ಲ. ಬದಲಾಗಿ ಇನ್ನೂ ಹೆಚ್ಚಿನ ನಿಂದನೆಗಳು ಜಾಲತಾಣದಲ್ಲಿ ಹರಿದಾಡುತ್ತಿದೆ.

ಸಾಮಾಜಿಕ ಜಾಲತಾಣದಲ್ಲಿ ಆರ್​ಸಿಬಿ ಪುರುಷರ ತಂಡವನ್ನು ಟ್ರೋಲ್​ ಮಾಡಲಾಗುತ್ತಿದೆ. 16 ಸೀಸನ್​ ಎದುರಿಸಿದರೂ ಕೂಡ ಆರ್​ಸಿಬಿ ಇಲ್ಲಿಯವರೆಗೂ ಒಂದು ಬಾರಿಯೂ ಟ್ರೋಫಿ ಜಯಿಸಿಲ್ಲ. ಆದರೆ, ಮಹಿಳಾ ತಂಡ ಎರಡನೇ ಆವೃತ್ತಿಯಲ್ಲೇ ಟ್ರೋಫಿ ಜಯಿಸಿದೆ. ಇದೇ ವಿಚಾರವನ್ನು ಮುಂದಿಟ್ಟುಕೊಂಡು ಆರ್​ಸಿಬಿ ಪುರುಷರ ತಂಡವನ್ನು ಗೇಲಿ ಮಾಡಲಾಗುತ್ತಿದೆ. ಬಗೆಬಗೆಯ ಮೀಮ್ಸ್​ ಹರಿಬಿಡುವ ಮೂಲಕ ಆರ್​ಸಿಬಿ ತಂಡವನ್ನು ಕಾಲೆಳೆಯಲಾಗುತ್ತಿದೆ. ಮಹಿಳಾ ತಂಡ ಗೆದ್ದರೂ ಆರ್​ಸಿಬಿ ಟ್ರೋಲ್​ ಮಾತ್ರ ಇನ್ನೂ ನಿಂತಿಲ್ಲ. (ಏಜೆನ್ಸೀಸ್​)

https://www.vijayavani.net/the-prices-of-tiffins-in-1965-idli-vada-only-15-paise-so-little

https://www.vijayavani.net/wpl-final-2024-rcb-thrash-delhi-capitals-by-8-wickets-to-lift-maiden-title

https://www.vijayavani.net/do-you-know-why-dogs-noses-are-always-wet