ಸಂತಾನೋತ್ಪತ್ತಿ ವ್ಯವಸ್ಥೆಯ ಪ್ರಬುದ್ಧತೆಯನ್ನು ತಿಳಿಸುವ ಈ ಚಟುವಟಿಕೆಯ ಬಗ್ಗೆ ವೈಜ್ಞಾನಿಕ ಅರಿವು ಮೂಡಿಸಿಕೊಂಡಿಲ್ಲ. ಸ್ವಚ್ಛತಾ ನಿಯಮಗಳನ್ನು ಕಾಪಾಡಿಕೊಳ್ಳದೆ ವಿಶ್ವದಾದ್ಯಂತ ಹಲವು ಮಹಿಳೆಯರು ಮುಟ್ಟಿನ ದಿನಗಳಲ್ಲಿ ಸಹಜವಾಗಿಯೇ ಆಗುವ ಹಾಮೋನುಗಳ ಬದಲಾವಣೆಯಿಂದ ಆಗುವ ಕಿಬ್ಬೊಟ್ಟೆ ನೋವು, ಸೊಂಟನೋವು ಇತ್ಯಾದಿಗಳ ಜೊತೆಗೆ ಪದೇಪದೆ ಮೂತ್ರಸೋಂಕು, ಜನನಾಂಗಗಳ ಸೋಂಕಿನಿಂದಾಗುವ ಹೊಟ್ಟೆನೋವು, ಬಿಳಿಮುಟ್ಟು, ನಂತರ ಬಂಜೆತನ ಇತ್ಯಾದಿ ಅನುಭವಿಸುತ್ತಾರೆ. ಜತೆಗೆ ಹ್ಯೂಮನ್ಪ್ಯಾಪಿಲೋಮವೈರಸ್ (ಹೆಚ್.ಪಿ.ವಿ) ಸೋಂಕಿನಿಂದ ಗರ್ಭಕೊರಳಿನ ಕ್ಯಾನ್ಸರ್, ದೀರ್ಘಾವಧಿ ನೋವು, ಅಸುರಕ್ಷಿತ ಪ್ಯಾಡ್ಬಳಕೆಯಿಂದ ಉಂಟಾಗುವ ಅಲರ್ಜಿ, ಅಂಡಾಶಯದ ಕ್ಯಾನ್ಸರ್, ಇತ್ಯಾದಿ ತೊಂದರೆಗಳ ಬಗ್ಗೆ ಹೆಚ್ಚಿನವರಿಗೆ ಅರಿವಿಲ್ಲ. ಕೇವಲ ಸ್ವಚ್ಛತೆಯ ನಿಮಯಗಳನ್ನು ಪಾಲಿಸಿದರೆ ಶೇಕಡ 97ರಷ್ಟು ಸೋಂಕನ್ನು ತಡೆಗಟ್ಟಬಹುದು ಎಂಬ ಅರಿವೂ ಹೆಚ್ಚಿನವರಿಗಿಲ್ಲ. ಭಾರತದಲ್ಲಿ ನಡೆದ ಒಂದು ಸಮೀಕ್ಷೆ ಪ್ರಕಾರ ಶೇಕಡ 42ರಷ್ಟು ಮಹಿಳೆಯರಿಗೆ ಮುಟ್ಟಿನಸ್ರಾವ ಎಲ್ಲಿಂದ ಬರುತ್ತದೆ ಎಂಬುದೇ ತಿಳಿದಿಲ್ಲ. ಪ್ರಾಪ್ತವಯಸ್ಸಿನಲ್ಲಿ ಹೆಣ್ಣಿನ ದೇಹದಲ್ಲಿ ತಿಂಗಳಿಗೊಮ್ಮೆ ಅಂಡಾಣು ಬಿಡುಗಡೆಯಾಗಿ ಗರ್ಭನಾಳದಿಂದ ಸೆಳೆಯಲ್ಪಟ್ಟು ವೀರ್ಯಾಣುಗಾಗಿ ಕಾಯುತ್ತಿರುತ್ತದೆ. ಈ ಮಧ್ಯೆ ಗರ್ಭಕೋಶದ ಒಳಪದರ ಬೆಳದು ದಪ್ಪನೆಯ ಸ್ಪಂಜಿನ ಹಾಗಾಗಿ, ಅಂಡಾಣು ವೀರ್ಯಾಣು ಫಲಿತವಾದರೆ ಬೆಳೆಯುವ ಭ್ರೂಣಕ್ಕೆ ಇದು ಪೋಷಣೆ ನೀಡುತ್ತದೆ. ಹಾಗಾಗದಿದ್ದಲ್ಲಿ ಈ ಗರ್ಭಕೋಶದ ಒಳಪದರವೇ ಛಿದ್ರವಾಗಿ ಸಂಗ್ರಹವಾಗುವ ರಕ್ತದೊಂದಿಗೆ ಗರ್ಭದ್ವಾರ ಹಾಗೂ ಯೋನಿ ಮುಖಾಂತರ ಹೊರಬಂದು ಅದೇ ಮಾಸಿಕ ಮುಟ್ಟು ಅನಿಸಿಕೊಳ್ಳುತ್ತದೆ. ಇಂತಹ ಶುದ್ಧಾಂಗ ಸಹಜ ಜೈವಿಕ ಪ್ರಕ್ರಿಯೆಯನ್ನೇ ಹೆಚ್ಚಿನ ಮಹಿಳೆಯರು ಇಂದಿಗೂ ಬೇನೆ, ಶಾಪ, ಕೆಟ್ಟರಕ್ತ ಹೊರಬರುವುದು ಎಂದೆಲ್ಲ ತಪ್ಪಾಗಿ ತಿಳಿದುಕೊಂಡಿದ್ದಾರೆ.
