ಭಾರತದ ವಿರುದ್ಧ ಸೋಲುಂಡ ಪಾಕಿಸ್ತಾನಕ್ಕೆ ಸೂಪರ್​ 8 ಹಂತ ತಲುಪಲು ಭಾರತದ ಸಹಾಯವೇ ಬೇಕಿದೆ!

ನ್ಯೂಯಾರ್ಕ್​: ಅಮೆರಿಕದಲ್ಲಿ ನಡೆಯುತ್ತಿರುವ ಟಿ20 ವಿಶ್ವಕಪ್​ ಮೆಗಾ ಟೂರ್ನಮೆಂಟ್​ನಲ್ಲಿ ಗ್ರೂಪ್​ ಎ ಹಂತದಲ್ಲಿ ಪಾಕಿಸ್ತಾನ ಬ್ಯಾಕ್​ ಟು ಬ್ಯಾಕ್​ ಸೋಲಿನೊಂದಿಗೆ ನಾಲ್ಕನೇ ಸ್ಥಾನಕ್ಕೆ ಕುಸಿದೆ. ಮೊದಲ ಪಂದ್ಯದಲ್ಲಿ ಯುಎಸ್​ಎ ವಿರುದ್ಧ ಸೋತಿದ್ದ ಪಾಕ್​, ನಿನ್ನೆ ನಡೆದ ಪಂದ್ಯದಲ್ಲಿ ಟೀಮ್​ ಇಂಡಿಯಾ ವಿರುದ್ಧ ಶರಣಾಯಿತು. ಹೀಗಾಗಿ ಬಾಬರ್​ ಅಜಮ್​ ಪಡೆ ಇದೀಗ ಮೂಲೆಗುಂಪಾಗಿದೆ. ಆದರೆ, ಸೂಪರ್​ 8 ಹಂತಕ್ಕೆ ತಲುಪುವ ಆಸೆ ಪಾಕ್​ ಪಾಳಯದಲ್ಲಿ ಇನ್ನೂ ಜೀವಂತವಾಗಿದೆ. ಆದರೆ, ಅದಕ್ಕೆ ಪವಾಡ ನಡೆಯುವುದರ ಜೊತೆಗೆ ಭಾರತದ ಸಹಾಯವೂ ಅಗತ್ಯವಾಗಿ ಬೇಕಿದೆ.

ಗ್ರೂಪ್​​​ 'ಎ'ನಲ್ಲಿ ಪಾಕಿಸ್ತಾನ ನಾಲ್ಕನೇ ಸ್ಥಾನದಲ್ಲಿದೆ. ಭಾರತ ಮೊದಲ ಸ್ಥಾನದಲ್ಲಿದ್ದರೆ, ನಂತರದಲ್ಲಿ ಯುಎಸ್​ಎ ಮತ್ತು ಕೆನಡಾ ಇದೆ. ಪಾಕಿಸ್ತಾನಕ್ಕೆ ಇನ್ನೂ ಎರಡು ಪಂದ್ಯ ಬಾಕಿ ಉಳಿದಿವೆ. ಒಂದು ಕೆನಡಾ ವಿರುದ್ಧ ಮತ್ತೊಂದು ಐರ್ಲೆಂಡ್​ ವಿರುದ್ಧ. ಸೂಪರ್​ 8 ಹಂತಕ್ಕೆ ತಲುಪಲು ಈ ಎರಡೂ ಪಂದ್ಯಗಳಲ್ಲೂ ಗೆಲ್ಲಬೇಕಾದ ಅನಿವಾರ್ಯತೆ ಇದೆ. ಅಲ್ಲದೆ, ಈ ಪಂದ್ಯಗಳು ಯಾವುದೇ ಕಾರಣಕ್ಕೂ ಮಳೆಯಿಂದ ರದ್ದಾಗಬಾರದು. ಇದಿಷ್ಟೇ ಅಲ್ಲದೆ, ಪಾಕಿಸ್ತಾನ ಸೂಪರ್​ 8 ಹಂತ ತಲುಪಬೇಕಾದರೆ ಭಾರತವನ್ನು ಅವಲಂಬಿಸಬೇಕಾಗಿದೆ. ಅದು ಹೇಗೆ ಎಂಬುದನ್ನು ನಾವೀಗ ತಿಳಿಯೋಣ.

ಪ್ರತಿ ಗ್ರೂಪ್​ನಿಂದ ಎರಡು ತಂಡಗಳು ಟಿ20 ವಿಶ್ವಕಪ್​ನ ಸೂಪರ್​ 8ರ ಘಟ್ಟವನ್ನು ತಲುಪುತ್ತವೆ. ಸದ್ಯ ಪಾಕಿಸ್ತಾನ ಎರಡು ಪಂದ್ಯಗಳನ್ನು ಆಡಿದ್ದು, ಎರಡರಲ್ಲೂ ಸೋತು ಶೂನ್ಯ ಅಂಕ ಸಂಪಾದಿಸಿದೆ. ಭಾರತ ಮತ್ತು ಯುಎಸ್​ಎ ಎರಡು ಪಂದ್ಯಗಳನ್ನು ಗೆದ್ದು ನಾಲ್ಕು ಅಂಕಗಳನ್ನು ಪಡೆದುಕೊಂಡಿವೆ. ಸೂಪರ್ 8ರ ಸ್ಥಾನಕ್ಕಾಗಿ ಪಾಕಿಸ್ತಾನ ಈ ಎರಡು ತಂಡಗಳೊಂದಿಗೆ ಪೈಪೋಟಿ ನಡೆಸಬೇಕಿದೆ.

ಸದ್ಯ ಪಾಕಿಸ್ತಾನಕ್ಕೆ ಎರಡು ಪಂದ್ಯಗಳು ಬಾಕಿ ಇವೆ. ಒಂದು ಪಂದ್ಯ ಕೆನಡಾ ವಿರುದ್ಧ ನ್ಯೂಯಾರ್ಕ್​ನ ನಸ್ಸೌ ಕೌಂಟಿ ಕ್ರೀಡಾಂಗಣದಲ್ಲಿ ನಡೆಯಲಿದೆ. ಇನ್ನೊಂದು ಪಂದ್ಯ ಐರ್ಲೆಂಡ್​ ವಿರುದ್ಧ ಫ್ಲೊರಿಡಾದ ಸೆಂಟ್ರಲ್​ ಬ್ರೊವಾರ್ಡ್​ ಪಾರ್ಕ್​ನಲ್ಲಿ ನಡೆಯಲಿದೆ. ಈ ಎರಡು ಪಂದ್ಯಗಳನ್ನು ಪಾಕ್​ ದಾಖಲೆ ಅಂತರದಲ್ಲಿ ಗೆಲ್ಲಬೇಕಿದೆ. ಸದ್ಯಕ್ಕೆ -0.15 NRR ಅನ್ನು ಹೊಂದಿದ್ದಾರೆ. ಭಾರತಕ್ಕೆ ಎರಡು ಪಂದ್ಯಗಳು ಬಾಕಿ ಇವೆ. ಒಂದು ಯುಎಸ್​ಎ ವಿರುದ್ಧ ಮತ್ತೊಂದು ಐರ್ಲೆಂಡ್​ ವಿರುದ್ಧ ಈ ಎರಡು ಪಂದ್ಯಗಳಲ್ಲಿ ಭಾರತ ಗೆಲ್ಲಬೇಕಿದೆ. ಅದರಲ್ಲೂ ದಾಖಲೆ ಅಂತರದಲ್ಲಿ ಗೆಲುವು ಸಾಧಿಸಿದರೆ ಯುಎಸ್​ಯ ರನ್​ ರೇಟ್​ ಕಡಿಮೆಯಾಗಲಿದೆ. ಈ ರೀತಿ ಆದರೆ, ಯುಎಸ್​ಎ ಮತ್ತು ಪಾಕಿಸ್ತಾನವು ನಾಲ್ಕು ಅಂಕಗಳಲ್ಲಿ ಸಮನಾಗಿರುತ್ತವೆ ಮತ್ತು ಪಾಕಿಸ್ತಾನವು NRR ಆಧಾರದ ಮೇಲೆ ಸೂಪರ್​ 8ಕ್ಕೆ ಅರ್ಹತೆ ಪಡೆಯುತ್ತದೆ.

ನಸ್ಸೌ ಕೌಂಟಿ ಸ್ಟೇಡಿಯಂನಲ್ಲಿ ಭಾರತವು ಯುಎಸ್​ಎ ವಿರುದ್ಧ ಆಡಲಿದೆ. ಆದರೆ, ಈ ಮೈದಾನ ಬ್ಯಾಟರ್‌ಗಳಿಗೆ ಭಯಾನಕ ಬಲೆಯಾಗಿದ್ದು, ಬೃಹತ್ NRR ಸಂಭವಿಸುವ ಸಾಧ್ಯತೆಯಿಲ್ಲ. ಹೀಗಾಗಿ ಸೂಪರ್ 8 ಹಂತಗಳಿಗೆ ಅರ್ಹತೆಯ ವಿಷಯದಲ್ಲಿ ಪಾಕಿಸ್ತಾನಕ್ಕೆ ಇದು ಹಿನ್ನೆಡೆಯಾಗಬಹುದು. ಆದರೆ, ಪವಾಡ ನಡೆದಿದ್ದಲ್ಲಿ ಪಾಕ್​ ಸೂಪರ್​ 8ರ ಹಂತಕ್ಕೆ ತಲುಪಬಹುದು. ಹೀಗಾಗಿ ಪಾಕ್​ ಇನ್ನೂ ಆಸೆಯನ್ನು ಜೀವಂತವಾಗಿ ಇಟ್ಟುಕೊಂಡಿದೆ. (ಏಜೆನ್ಸೀಸ್​)

https://www.vijayavani.net/bigg-boss-kannada-season-8-contestant-prashanth-sambargi-reaction-on-niveditha-gowda-chandan-shetty-divorce

https://www.vijayavani.net/chicken-side-effects-do-you-know-why-you-shouldnt-eat-chicken-everyday