ಇಂಥಾ ರನೌಟ್​ ಯಾರಾದ್ರೂ ಮಿಸ್​ ಮಾಡ್ತಾರಾ? ಸಿಕ್ಕಾಪಟ್ಟೆ ಟ್ರೋಲ್​ ಆಗ್ತಿದೆ ಪಾಕ್​ ಕಳಪೆ ಫೀಲ್ಡಿಂಗ್! Pakistan ​

Pakistan : ಬಾಂಗ್ಲಾದೇಶ ವಿರುದ್ಧದ ಪಂದ್ಯದ ವೇಳೆ ಪಾಕಿಸ್ತಾನ ಕಳಪೆ ಫೀಲ್ಡಿಂಗ್ ನಿಂದಾಗಿ ಭಾರಿ ಟೀಕೆಗೆ ಗುರಿಯಾಗಿದೆ. ಇಬ್ಬರು ಬ್ಯಾಟ್ಸ್‌ಮನ್‌ಗಳು ಒಂದೇ ಕ್ರೀಸ್ ತುದಿಯಲ್ಲಿರುವಾಗ ಫೀಲ್ಡರ್ ಕೈಯಲ್ಲಿ ಚೆಂಡಿದ್ದರು ಕೂಡ ರನ್ ಔಟ್ ಮಾಡುವ ಸುವರ್ಣಾವಕಾಶವನ್ನು ಪಾಕ್​ ತಂಡ ಕಳೆದುಕೊಂಡಿತು. ಇದಕ್ಕೆ ಸಂಬಂಧಿಸಿದ ವಿಡಿಯೋ ವೈರಲ್​ ಆಗಿದ್ದು, ಟೀಕೆಗಳು ವ್ಯಕ್ತವಾಗುತ್ತಿವೆ.

ಅಷ್ಟಕ್ಕೂ ಏನಾಯಿತು ಎಂದರೆ ಗುರುವಾರ (ಸೆ.25) ಪಾಕಿಸ್ತಾನ, ಏಷ್ಯಾ ಟಿ20 ಕಪ್-2025 ಸೂಪರ್-4ರ ನಿರ್ಣಾಯಕ ಪಂದ್ಯದಲ್ಲಿ ಬಾಂಗ್ಲಾದೇಶವನ್ನು ಎದುರಿಸಿತು. ದುಬೈನಲ್ಲಿ ನಡೆದ ಈ ಪಂದ್ಯದಲ್ಲಿ ಬಾಂಗ್ಲಾದೇಶ ಟಾಸ್ ಗೆದ್ದು ಮೊದಲು ಬೌಲಿಂಗ್ ಮಾಡಲು ಆಯ್ಕೆ ಮಾಡಿಕೊಂಡಿತು. ಬ್ಯಾಟಿಂಗ್​ಗೆ ಇಳಿದ ಪಾಕಿಸ್ತಾನ ನಿಗದಿತ 20 ಓವರ್​ಗಳಲ್ಲಿ ಎಂಟು ವಿಕೆಟ್ ನಷ್ಟಕ್ಕೆ 135 ರನ್ ಗಳಿಸಿತು. ಮೊಹಮ್ಮದ್ ಹ್ಯಾರಿಸ್ (31) ಮತ್ತು ಮೊಹಮ್ಮದ್ ನವಾಜ್ (25) ಉತ್ತಮ ಪ್ರದರ್ಶನ ನೀಡಿದರು. ನಂತರ, ಗುರಿಯನ್ನು ಬೆನ್ನಟ್ಟಿದ ಬಾಂಗ್ಲಾದೇಶ ನಿಗದಿತ 20 ಓವರ್​ಗಳಲ್ಲಿ ಒಂಬತ್ತು ವಿಕೆಟ್ ನಷ್ಟಕ್ಕೆ 124 ರನ್​ಗಳಿಗೆ ಸೀಮಿತವಾಯಿತು. ಇದರೊಂದಿಗೆ, ಪಾಕಿಸ್ತಾನ ಹನ್ನೊಂದು ರನ್​​ಗಳ ಅಂತರದಿಂದ ಗೆದ್ದು ಫೈನಲ್​ಗೆ ಅರ್ಹತೆ ಪಡೆಯಿತು.

ಆದರೆ, ಬಾಂಗ್ಲಾದೇಶ ಇನ್ನಿಂಗ್ಸ್‌ನ ಐದನೇ ಓವರ್‌ನಲ್ಲಿ, ಶಾಹೀನ್ ಅಫ್ರಿದಿ ಚೆಂಡನ್ನು ಹಿಡಿದು ಬೌಲಿಂಗ್​ ಮಾಡಲು ಬಂದರು. ಬಾಂಗ್ಲಾ ಬ್ಯಾಟರ್​ ತೌಹಿದ್ ಹೃದೊಯ್,​ ಮೊದಲ ಚೆಂಡನ್ನು ಶಾಟ್​ ಹೊಡೆದರು. ಈ ವೇಳೆ ಚೆಂಡು ಗಾಳಿಯಲ್ಲಿ ಬ್ಯಾಕ್‌ವರ್ಡ್ ಪಾಯಿಂಟ್ ಕಡೆಗೆ ಹೋಯಿತು. ಆದರೆ, ಅಲ್ಲಿ ಫೀಲ್ಡಿಂಗ್ ಮಾಡುತ್ತಿದ್ದ ಸೈಮ್ ಅಯೂಬ್ ಚೆಂಡನ್ನು ಬೌಂಡರಿಗೆ ಹೋಗದಂತೆ ತಡೆದರು. ಆದರೆ, ಈಗಾಗಲೇ ಇನ್ನೊಂದು ತುದಿಯಲ್ಲಿದ್ದ ಸೈಫ್ ಹಸನ್, ತೌಹಿದ್ ಹೃದೊಯ್ ಕಡೆಗೆ ಓಡಿಹೋದರು. ಇಬ್ಬರೂ ಸ್ಟ್ರೈಕರ್ ತುದಿಯಲ್ಲಿದ್ದಾಗ ಅಯೂಬ್ ಅವರು ಚೆಂಡನ್ನು ಬೌಲರ್ ತುದಿಗೆ ಎಸೆದರು. ಆದಾಗ್ಯೂ, ಅದು ಮಿಸ್ ಫೀಲ್ಡ್ ಆಗಿತ್ತು. ಏಕೆಂದರೆ, ಚೆಂಡನ್ನು ಹಿಡಿಯಲು ಅಲ್ಲಿ ಯಾರೂ ಇರಲಿಲ್ಲ. ಮಿಡ್‌ಫೀಲ್ಡ್‌ನಲ್ಲಿರುವ ಫೀಲ್ಡರ್ ಬಂದು ಚೆಂಡನ್ನು ಹಿಡಿಯಬೇಕಾಯಿತು.

ಇದನ್ನೂ ಓದಿ: ಅಯ್ಯಪ್ಪ ಭಕ್ತರ ಬೆನ್ನಿಗೆ ಚೂರಿ… ಕೇರಳ ಸರ್ಕಾರದ ಪರವಾಗಿ ಬಾಹುಬಲಿ ಕಟ್ಟಪ್ಪ ಶೈಲಿಯಲ್ಲಿ ವಂಚನೆ ಆರೋಪ! Ayyappa Devotees

ಅಷ್ಟರಲ್ಲಿ, ಸೈಫ್ ಬೇಗನೆ ತನ್ನ ಸ್ಥಳಕ್ಕೆ ಬಂದರು. ಇದರೊಂದಿಗೆ ರನ್-ಔಟ್ ಅವಕಾಶ ತಪ್ಪಿಹೋಯಿತು. ಅದರಿಂದ ಅಯೂಬ್ ಮುಖ ಕಳೆಗುಂದಿತು. ಇದಕ್ಕೆ ಸಂಬಂಧಿಸಿದ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದ್ದು, ಭಾರಿ ಟೀಕೆಗೆ ಗುರಿಯಾಗಿದೆ.

ಇನ್ನು ಬಾಂಗ್ಲಾ ವಿರುದ್ಧದ ಗೆಲುವಿನ ನಂತರ, ಪಾಕಿಸ್ತಾನ ನಾಯಕ ಸಲ್ಮಾನ್ ಆಘಾ, ತಮ್ಮ ಫೀಲ್ಡಿಂಗ್ ಅದ್ಭುತವಾಗಿದೆ ಎಂದು ಹೊಗಳಿದ್ದಾರೆ. ಇದೇ ವೇಳೆ ರನೌಟ್ ಅವಕಾಶ ತಪ್ಪಿಸಿಕೊಂಡ ವಿಡಿಯೋವನ್ನು ಹಂಚಿಕೊಂಡ ನೆಟ್ಟಿಗರು ಅಘಾ ಹೇಳಿಕೆಯನ್ನು ವ್ಯಂಗ್ಯವಾಡುತ್ತಿದ್ದಾರೆ. ನಿಮ್ಮ ಕೆಟ್ಟ ಫೀಲ್ಡಿಂಗ್ ಯಾವ ಶ್ರೇಷ್ಠ ಆಟಗಾರರಿಗೂ ಕಡಿಮೆ ಇಲ್ಲ ಎಂದು ಗೇಲಿ ಮಾಡುತ್ತಿದ್ದಾರೆ.

ಇನ್ನು ಪಾಕಿಸ್ತಾನಿ ಫೀಲ್ಡರ್‌ಗಳಿಂದ ರನೌಟ್​ ಮಿಸ್​ ಮಾಡಿಕೊಂಡ ಬಾಂಗ್ಲಾದ ಆರಂಭಿಕ ಆಟಗಾರ ಸೈಫ್ ಹಸನ್, ಕೇವಲ 18 ರನ್ ಗಳಿಸಲು ಮಾತ್ರ ಸಾಧ್ಯವಾಯಿತು. ಮತ್ತೊಂದೆಡೆ, ತೌಹಿದ್ ಹೃದಯ್ (5) ಕೂಡ ವಿಫಲರಾದರು. ಶಮೀಮ್ ಹೊಸೈನ್ (30) ಮಾತ್ರ ಗಮನಾರ್ಹ ಸ್ಕೋರ್ ಗಳಿಸಿದರು. ಬಾಂಗ್ಲಾದೇಶದ ವಿರುದ್ಧ ಗೆದ್ದ ಪಾಕಿಸ್ತಾನ ಸೆಪ್ಟೆಂಬರ್ 28 ರಂದು ನಡೆಯಲಿರುವ ಫೈನಲ್‌ನಲ್ಲಿ ಟೀಮ್ ಇಂಡಿಯಾವನ್ನು ಎದುರಿಸಲಿದೆ. (ಏಜೆನ್ಸೀಸ್​)

https://www.vijayavani.net/23-year-old-hyderabad-doctor-extorted-assaulted-by-man-he-met-in-dating-app

https://www.vijayavani.net/this-zodiac-signs-is-one-in-a-thousand-what-is-your-zodiac-sign