ಅದ್ಯಾವುದಕ್ಕೂ ಗಮನ ಕೊಡಲಿಲ್ಲ! ಫೈನಲ್​ನಲ್ಲಿ ಪಾಕ್ ತೋರಿದ ನರಿಬುದ್ಧಿ ಬಗ್ಗೆ ತಿಲಕ್​ ಓಪನ್​ ಟಾಕ್​ | Tilak Varma

Tilak Varma: ಸೆ.28ರಂದು ದುಬೈನಲ್ಲಿ ನಡೆದ ಏಷ್ಯಾಕಪ್ ಟಿ20 ಟೂರ್ನಿಯ ಫೈನಲ್​ ಹಣಾಹಣಿಯಲ್ಲಿ ಟೀಮ್ ಇಂಡಿಯಾ ಭರ್ಜರಿ ಗೆಲುವು ದಾಖಲಿಸಿತು. ಸತತ ಮೂರನೇ ಬಾರಿಗೆ ಪಾಕಿಸ್ತಾನವನ್ನು ಬಗ್ಗುಬಡಿದ ಸೂರ್ಯಕುಮಾರ್ ಯಾದವ್ ಪಡೆಗೆ ದೇಶವ್ಯಾಪಿ ಅಭಿನಂದನೆಗಳ ಮಹಾಪೂರವೇ ಹರಿದುಬಂದಿತು. ಈ ಪಂದ್ಯದಲ್ಲಿ ಭಾರತಕ್ಕೆ ಆಪತ್ಬಾಂಧವನಾಗಿ ಮಿಂಚಿದ ತಿಲಕ್​ ವರ್ಮಾಗೆ ಇದೀಗ ಹುಟ್ಟೂರಿನಲ್ಲಿ ಭವ್ಯ ಸ್ವಾಗತ ಲಭಿಸಿದೆ.

ಇದನ್ನೂ ಓದಿ: Asia Cup | ಕ್ರಿಕೆಟ್​ ಪಂದ್ಯವನ್ನು ಯುದ್ಧಭೂಮಿಗೆ ಹೋಲಿಸುವುದು ಸರಿಯಲ್ಲ ಎಂದ ಪವನ್ ಖೇರಾ; ಕಾಂಗ್ರೆಸ್​ಗೆ ಪಾಕ್​​ ಅನುಮತಿ ಬೇಕೆ ಎಂದು ಬಿಜೆಪಿ ಪ್ರಶ್ನೆ..

ಫೈನಲ್ ಗೆದ್ದ ಬಳಿಕ ತಂಡದೊಂದಿಗೆ ಕೆಲ ಸಮಯ ಕಳೆದ ತಿಲಕ್​, ಇಂದು ಬೆಳಗ್ಗೆ ತಮ್ಮ ಹುಟ್ಟೂರು ಹೈದರಾಬಾದ್​ಗೆ ಮರಳಿದರು. ಅಪಾರ ಸಂಖ್ಯೆಯಲ್ಲಿ ತಮಗೆ ಭವ್ಯ ಸ್ವಾಗತ ಕೋರಿದ ಅಭಿಮಾನಿಗಳು ಮತ್ತು ಕುಟುಂಬಸ್ಥರಿಗೆ ಧನ್ಯವಾದ ಅರ್ಪಿಸಿದ ತಿಲಕ್​, ಪಾಕಿಸ್ತಾನಿ ಆಟಗಾರರು ತಮ್ಮನ್ನು ಔಟ್​ ಮಾಡಲು ಏನೆಲ್ಲ ಪ್ರಯತ್ನ ಮಾಡಿದರು ಎಂಬುದನ್ನು ಬಹಿರಂಗಪಡಿಸಿದರು.

ಹೈದರಾಬಾದ್​ನಲ್ಲಿ ಮಾಧ್ಯಮದವರ ಪ್ರಶ್ನೆಗೆ ಉತ್ತರಿಸಿದ ತಿಲಕ್​, "ಕ್ರಿಕೆಟ್ ಅನ್ನು ಭಾವನಾತ್ಮಕವಾಗಿ ಪರಿಗಣಿಸಬೇಡಿ. ಏಷ್ಯಾಕಪ್ ಫೈನಲ್ ಪಂದ್ಯದಲ್ಲಿ ಪಾಕಿಸ್ತಾನಿ ಆಟಗಾರರು ನನ್ನನ್ನು ಕೆರಳಿಸಲು ಪ್ರಯತ್ನಿಸಿದರು. ನನ್ನ ವಿಕೆಟ್​ ಪಡೆಯಲು ಒತ್ತಡ ಹೇರಲು ಮುಂದಾದರು. ಆದರೆ, ಅವರ ಪ್ರಯತ್ನಗಳ್ಯಾವುದು ನನಗೆ ಒತ್ತಡ ಅನಿಸಲಿಲ್ಲ. ನನ್ನ ಕಣ್ಣ ಮುಂದೆ ಕೇವಲ ಭಾರತ ಮಾತ್ರ ಕಾಣಿಸುತ್ತಿತ್ತು. ಈ ಪಂದ್ಯವನ್ನು ನಾವು ಗೆಲ್ಲುತ್ತೇವೆ ಎಂಬ ವಿಶ್ವಾಸ ನನಗಿತ್ತು" ಎಂದರು.

"ಕೊನೆಯವರೆಗೂ ಆ ಆತ್ಮವಿಶ್ವಾಸದಿಂದಲೇ ಆಡಿದೆ. ಏಷ್ಯಾಕಪ್ ಗೆದ್ದಿದ್ದು ಅತೀವ ಸಂತೋಷ ತಂದಿದೆ. ಈ ಗೆಲುವು ನಮ್ಮ ಯೋಧರಿಗೆ ಸಮರ್ಪಿಸಲಾಗಿದೆ. ಜನವರಿಯಲ್ಲಿ ವಿಶ್ವಕಪ್ ಟೂರ್ನಿ ಬರುತ್ತಿದೆ. ಸದ್ಯಕ್ಕೆ ಅದೇ ನನ್ನ ಗುರಿ" ಎಂದು ಹೇಳಿದರು,(ಏಜೆನ್ಸೀಸ್).

https://www.vijayavani.net/renukaswamy-murder-case-accused-darshan-case-on-trial