ಭಾರತಕ್ಕೆ ವಾಪಸಾದ ಬಳಿಕ ಪಂಜಾಬ್ನಲ್ಲಿ ಸಹೋದರ ಸಂಬಂಧಿಕರ ಹತ್ಯೆ ಕುರಿತು ಪ್ರತಿಕ್ರಿಯಿಸಿದ್ದ ರೈನಾ, ದುಷ್ಕರ್ಮಿಗಳಿಗೆ ಶಿಕ್ಷೆಯಾಗಬೇಕು ಎಂದು ಆಗ್ರಹಿಸಿದ್ದರು. ಬಳಿಕ ಕೆಲ ಸಂದರ್ಶನಗಳಲ್ಲಿ ಮತ್ತೆ ಐಪಿಎಲ್ಗೆ ವಾಪಸಾಗುವ ಸುಳಿವು ನೀಡಿದ್ದರು. ತಂಡದ ಆಡಳಿತ ಮಂಡಳಿ, ನಾಯಕ ಧೋನಿ, ರೈನಾ ಪುನರಾಗಮನದ ಕುರಿತು ತೀರ್ಮಾನ ಕೈಗೊಳ್ಳಲಿದ್ದಾರೆ ಎಂದು ಸಿಎಸ್ಕೆ ಫ್ರಾಂಚೈಸಿ ಎನ್.ಶ್ರೀನಿವಾಸನ್ ಹೇಳಿದ್ದರು. ರೈನಾ ವಾಪಸಾಗಬೇಕಾದರೆ, ಬಿಸಿಸಿಐ ಎದುರು ಸೂಕ್ತವಾಗಿ ವಿವರಣೆ ನೀಡಬೇಕಿದೆ. ದುಬೈನಿಂದ ರೈನಾ ವಾಪಸ್ ಆಗಿರುವ ಬಗ್ಗೆ ಮಂಡಳಿಗೆ ಇದುವರೆಗೂ ನಿಖರವಾದ ಮಾಹಿತಿ ಸಿಕ್ಕಿಲ್ಲ. ಒಂದು ವೇಳೆ ರೈನಾ ಮತ್ತೊಮ್ಮೆ ದುಬೈಗೆ ತೆರಳಬೇಕಾದರೆ ಬಿಸಿಸಿಐ ಎದುರು ವಾಪಸ್ ಆಗಿದ್ದರ ಬಗ್ಗೆ ಸೂಕ್ತ ಮಾಹಿತಿ ನೀಡಬೇಕು. ರೈನಾ ನೀಡಿದ ಮಾಹಿತಿ ಸೂಕ್ತವಾದರಷ್ಟೇ ತಂಡ ಕೂಡಿಕೊಳ್ಳಬಹುದು. ಇಲ್ಲವಾದರೆ ರೈನಾಗೆ ಅವಕಾಶ ನೀಡಲಾಗುವುದಿಲ್ಲ ಎಂದು ಬಿಸಿಸಿಐ ಮೂಲಗಳು ಹೇಳಿಕೊಂಡಿವೆ. ಒಂದು ವೇಳೆ ಖಿನ್ನತೆಯಿಂದ ಬಂದಿದ್ದರೆ, ಇದಕ್ಕೆ ಕಾರಣ ಏನು ಎಂದು ಗೊತ್ತಾಗಬೇಕು ಎಂದು ಮಂಡಳಿ ಮೂಲಗಳು ತಿಳಿಸಿವೆ.
