ಸ್ಟಾರ್​ ಬ್ಯಾಟ್ಸ್​ಮನ್​ ರಿಷಭ್​ ಪಂತ್​ ವಿರುದ್ಧ ತೀವ್ರ ಅಸಮಾಧಾನ ಹೊರಹಾಕಿದ ರೋಹಿತ್​ ಶರ್ಮ! ಕಾರಣವೇನು? Rishabh Pant

Rishabh Pant : ಆಸ್ಟ್ರೇಲಿಯಾ ವಿರುದ್ಧ ಯಾವುದೇ ಟೆಸ್ಟ್ ಸರಣಿ ನಡೆಯಲಿ ಟೀಮ್​ ಇಂಡಿಯಾಗೆ ಸದಾ ಹೊಸ ಸವಾಲುಗಳು ಎದುರಾಗುತ್ತವೆ. ಆಸಿಸ್​ ನೆಲದಲ್ಲಿ ಬಾರ್ಡರ್-ಗವಾಸ್ಕರ್ ಟ್ರೋಫಿ ಟೆಸ್ಟ್ ಸರಣಿಯು ಪ್ರತಿಷ್ಠಿತ ಸ್ಪರ್ಧೆಯಾಗಿದ್ದು, ಭಾರತೀಯ ಆಟಗಾರರ ಕ್ರೀಡಾ ಜೀವನಕ್ಕೆ ಇದೊಂದು ಕಠಿಣ ಪರೀಕ್ಷೆಯಾಗಿ ನಿಲ್ಲುತ್ತದೆ. ಇದಕ್ಕೆ ಪ್ರಮುಖ ಕಾರಣ ಆಸ್ಟ್ರೇಲಿಯ ಆಟಗಾರರು ಈ ಸರಣಿಗೆ ತಯಾರಾಗುವ ರೀತಿ. ಆಸಿಸ್​ ಕ್ರಿಕೆಟಿಗರು ತಮ್ಮ ನೆಲದಲ್ಲಿ ಟೆಸ್ಟ್ ಸರಣಿಗಾಗಿ ಅತ್ಯುನ್ನತ ಮಟ್ಟದಲ್ಲಿ ತಯಾರಿ ನಡೆಸುತ್ತಾರೆ. ಅದರ ಫಲಿತಾಂಶ ಈ ಸರಣಿಯಲ್ಲಿ ಕಾಣುತ್ತಿದೆ.

ಇದಕ್ಕೆ ವ್ಯತಿರಿಕ್ತವಾಗಿ ಈ ಸರಣಿ ಆರಂಭವಾಗುವುದಕ್ಕೂ ಮೊದಲೇ ಭಾರತೀಯ ಆಟಗಾರರು ಅತ್ಯಂತ ಕಳಪೆ ಪ್ರದರ್ಶನ ನೀಡಿದ್ದರು. ನ್ಯೂಜಿಲೆಂಡ್ ವಿರುದ್ಧ ತವರಿನಲ್ಲಿ ಸತತ ಎರಡು ಟೆಸ್ಟ್ ಪಂದ್ಯಗಳಲ್ಲಿ ಒಂದೇ ಒಂದು ಪಂದ್ಯವನ್ನು ಗೆಲ್ಲದೇ ಹೀನಾಯವಾಗಿ ಸೋಲುಂಡರು. ಆದಾಗ್ಯೂ, ಬಾರ್ಡರ್​ ಗವಾಸ್ಕರ್​ ಟ್ರೋಫಿಯ ಮೊದಲ ಟೆಸ್ಟ್‌ನಲ್ಲಿ ತಂಡವನ್ನು ಮುನ್ನಡೆಸಿದ್ದ ಜಸ್​ಪ್ರೀತ್​ ಬುಮ್ರಾ ಎಂಟು ವಿಕೆಟ್‌ಗಳನ್ನು ಕಬಳಿಸಿ ಏಕಾಂಗಿಯಾಗಿ ಭಾರತವನ್ನು ಗೆಲುವಿನತ್ತ ಮುನ್ನಡೆಸಿದರು.

ವೈಯಕ್ತಿಕ ಕಾರಣಗಳಿಂದ ಮೊದಲ ಟೆಸ್ಟ್‌ಗೆ ಗೈರು ಹಾಜರಾಗಿದ್ದ ರೋಹಿತ್ ಶರ್ಮ ಎರಡನೇ ಟೆಸ್ಟ್‌ನಲ್ಲಿ ವಾಪಸಾಗಿರುವುದು ಭಾರತ ತಂಡದ ಸಮತೋಲನವನ್ನು ಹದಗೆಡಿಸಿದೆ. ಇದಕ್ಕೆ ಪ್ರಮುಖ ಕಾರಣ ರೋಹಿತ್ ಶರ್ಮ ಕಳಪೆ ಫಾರ್ಮ್. ಮಾಜಿ ನಾಯಕ ವಿರಾಟ್ ಕೊಹ್ಲಿ ಕೂಡ ವಿಫಲರಾಗಿದ್ದಾರೆ. ಹೀಗಾಗಿ ಇಬ್ಬರ ವಿರುದ್ಧ ಟೀಕೆಗಳು ಕೇಳಿಬರುತ್ತಿವೆ.

ಇತ್ತೀಚೆಗೆಷ್ಟೇ ವಿಕೆಟ್ ಕೀಪರ್ ರಿಷಭ್​ ಪಂತ್ ಕೂಡ ತಮ್ಮ ಬೇಜವಾಬ್ದಾರಿ ಹೊಡೆತಗಳಿಂದ ಟೀಕೆಗೆ ಗುರಿಯಾಗಿದ್ದಾರೆ. ನಾಲ್ಕನೇ ಟೆಸ್ಟ್‌ನ ಕೊನೆಯ ದಿನದಂದು ರಿಷಭ್​ ಪಂತ್ ಬಾರಿಸಿದ ಭಯಾನಕ ಶಾಟ್ ಇದಕ್ಕೆ ಕಾರಣ. ಟೆಸ್ಟ್ ಪಂದ್ಯ ಡ್ರಾದತ್ತ ಸಾಗುತ್ತಿರುವಾಗ ರಿಷಭ್ ಪಂತ್​ (104 ಎಸೆತಗಳಲ್ಲಿ 30 ರನ್) ಕೆಟ್ಟ ಶಾಟ್ ಬಾರಿಸಿ ವಿಕೆಟ್​ ನೀಡಿದರು. ಇದರಿಂದಾಗಿ ಭಾರತದ ವಿಕೆಟ್‌ಗಳು ಒಂದರ ಹಿಂದೆ ಒಂದರಂತೆ ಪತನಗೊಂಡು ತಂಡ ಹೀನಾಯವಾಗಿ ಸೋಲು ಕಂಡಿತು.

ಇದನ್ನೂ ಓದಿ: 2025ರಲ್ಲಿ ‘ಕ್ರೋಧ’ ಇಳಿಮುಖ, ‘ವಿಶ್ವಾಸ’ ಏರುಮುಖ: ರಾಜಗುರು ದ್ವಾರಕನಾಥ್​ ಭವಿಷ್ಯ | Dwarakanath Guruji Predictions

ಪಂದ್ಯದ ನಂತರ ನಾಯಕ ರೋಹಿತ್ ಶರ್ಮ ಮಾತನಾಡಿ, ರಿಷಭ್​ ಪಂತ್ ಅವರು ಹೊಡೆದ ಆ ಒಂದು ಶಾಟ್ ತುಂಬಾ ಪರಿಣಾಮ ಬೀರಿತು ಎಂದರು. ತಂಡದ ಅಗತ್ಯಕ್ಕೆ ಅನುಗುಣವಾಗಿ ಪಂತ್ ತಮ್ಮ ಹೊಡೆತಗಳನ್ನು ಆಡಲು ಪ್ರಯತ್ನಿಸಬೇಕು ಎಂದು ರೋಹಿತ್ ಸಲಹೆ ನೀಡಿದ್ದಾರೆ.

ಪಂತ್ ತಂಡದ ಅಗತ್ಯಗಳನ್ನು ಅರ್ಥಮಾಡಿಕೊಳ್ಳಬೇಕು. ಆಟದಲ್ಲಿ ಅವರ ಹೈ-ರಿಸ್ಕ್ ವಿಧಾನಗಳು ಈ ಹಿಂದೆ ತಂಡಕ್ಕೆ ಗೆಲುವುಗಳನ್ನು ತಂದುಕೊಟ್ಟಿವೆ. ಆದರೆ, ಪಂತ್ ಈ ಟೆಸ್ಟ್​ನಲ್ಲಿ ಔಟಾದ ರೀತಿ ದುರದೃಷ್ಟಕರವಾಗಿದೆ. ಹೀಗಾಗಿ ತಂಡದ ಅಗತ್ಯಗಳಿಗೆ ಅನುಗುಣವಾಗಿ ಪಂತ್​ ಅವರು ಬ್ಯಾಟಿಂಗ್ ಮಾಡಬೇಕು. ತಂಡಕ್ಕೆ ಏನು ಬೇಕು ಎಂಬುದನ್ನು ಪಂತ್​ ಸ್ಪಷ್ಟವಾಗಿ ಅರ್ಥಮಾಡಿಕೊಳ್ಳಬೇಕು ಎಂದು ರೋಹಿತ್ ಹೇಳಿದ್ದಾರೆ.

ಆದರೆ, ಭಾರತದ ಮಾಜಿ ಸ್ಪಿನ್ನರ್ ದಿಲೀಪ್ ದೋಷಿ, ಪಂತ್ ಅವರನ್ನು ಬೆಂಬಲಿಸಿದ್ದಾರೆ. ಪಂತ್ ತಮ್ಮ ಆಟದ ಶೈಲಿಯನ್ನು ಬದಲಾಯಿಸಲು ಪ್ರಯತ್ನಿಸಬಾರದು. ಅವರು ಸ್ವಾಭಾವಿಕವಾಗಿ ಅತ್ಯುತ್ತಮ ಆಟಗಾರ. ಅವರು ತಮ್ಮ ಸಹಜ ಆಟದ ಶೈಲಿಯಿಂದ ತಂಡವನ್ನು ಹಲವು ಬಾರಿ ಗೆಲ್ಲಿಸಿದ್ದಾರೆ. ಆದರೆ ಕೆಲವೊಮ್ಮೆ ಅವರು ಅನುಚಿತ ಹೊಡೆತಗಳಿಂದ ತಂಡವನ್ನು ನಿರಾಸೆಗೊಳಿಸುತ್ತಾರೆ ಎಂದು ದೋಷಿ ಹೇಳಿದರು.

ಮೆಲ್ಬೋರ್ನ್ ಟೆಸ್ಟ್ ಸೋಲಿನ ನಂತರ ನಾಯಕ ರೋಹಿತ್ ಶರ್ಮ ಮತ್ತು ವಿರಾಟ್ ಕೊಹ್ಲಿ ಜೊತೆಗೆ ರಿಷಬ್ ಪಂತ್ ಹಾಗೂ ಮಧ್ಯಮ ವೇಗಿ ಮೊಹಮ್ಮದ್ ಸಿರಾಜ್ ಕೂಡ ಟೀಕೆಗಳನ್ನು ಎದುರಿಸಿದ್ದಾರೆ. ಸದ್ಯಕ್ಕೆ ತಂಡದಲ್ಲಿ ಪಂತ್ ಸ್ಥಾನಕ್ಕೆ ಅಪಾಯ ಇಲ್ಲದಿದ್ದರೂ, ಅವರ ಬ್ಯಾಟಿಂಗ್ ಶೈಲಿ ಪರಿಶೀಲನೆಗೆ ಒಳಗಾಗಿರುವುದು ಸ್ಪಷ್ಟವಾಗಿದೆ. (ಏಜೆನ್ಸೀಸ್​)

https://www.vijayavani.net/horoscope-2025-what-are-the-horoscopes-for-which-zodiac-signs-in-2025

https://www.vijayavani.net/rajaguru-dwarakanath-guruji-predictions-on-2025-new-year

https://www.vijayavani.net/4-eclipses-in-the-new-year