ಜೋರ್ಡನ್ ಕಾಕ್ಸ್ ಸೋಮವಾರವಷ್ಟೇ ಸಸೆಕ್ಸ್ ವಿರುದ್ಧದ ಬಾಬ್ ವಿಲ್ಲಿಸ್ ಟ್ರೋಫಿಯ ಚತುರ್ದಿನ ಪಂದ್ಯದಲ್ಲಿ ಅಜೇಯ 237 ರನ್ (570 ಎಸೆತ, 47 ಬೌಂಡರಿ, 3 ಸಿಕ್ಸರ್) ಸಿಡಿಸಿ ಕೆಂಟ್ ತಂಡದ ಪರ ದಾಖಲೆ ಬರೆದಿದ್ದರು. ಪಂದ್ಯದಲ್ಲಿ ಜಾಕ್ ಲೀನಿಂಗ್ ಜತೆಗೆ 423 ರನ್ಗಳ ಜತೆಯಾಟವನ್ನೂ ನಡೆಸಿ ಮಿಂಚಿದ್ದರು. ಅವರು 21ನೇ ಶತಮಾನದಲ್ಲಿ ಜನಿಸಿದ ಕ್ರಿಕೆಟಿಗರ ಪೈಕಿ ಇಂಗ್ಲೆಂಡ್ನಲ್ಲಿ ಪ್ರಥಮ ದರ್ಜೆ ಶತಕ ಸಿಡಿಸಿದ ಮೊದಲ ಬ್ಯಾಟ್ಸ್ಮನ್ ಎನಿಸಿದ್ದರು. ಆದರೆ ಪಂದ್ಯದ ಬಳಿಕ ಅವರು ಕೆಲ ಅಭಿಮಾನಿಗಳ ಜತೆಗೆ ಸೆಲ್ಫಿಗೆ ಪೋಸ್ ನೀಡಿದ್ದು, ಕೋವಿಡ್-19 ಮಾರ್ಗಸೂಚಿಯ ಉಲ್ಲಂಘನೆ ಎನಿಸಿದೆ. ಇದರಿಂದಾಗಿ ಅವರು ಶನಿವಾರದಿಂದ ಮಿಡ್ಲ್ಸೆಕ್ಸ್ ವಿರುದ್ಧ ನಡೆಯಲಿರುವ ಪಂದ್ಯಕ್ಕೆ ತಂಡದಿಂದ ಹೊರಬಿದ್ದಿದ್ದಾರೆ.
