ಐಪಿಎಲ್​ಗೆ ಮುನ್ನ ರಾಜಸ್ಥಾನ ರಾಯಲ್ಸ್​-ಕಿಂಗ್ಸ್​ ಇಲೆವೆನ್​ ಪಂಜಾಬ್​ ಟ್ಯಾಟೂ ವಾರ್​!

ನವದೆಹಲಿ: ಐಪಿಎಲ್​ 13ನೇ ಆವೃತ್ತಿಯಲ್ಲಿ ಆಡಲು ಯುಎಇಗೆ ಪ್ರಯಾಣ ಬೆಳೆಸುವುದಕ್ಕೆ ಮುನ್ನವೇ ತಂಡಗಳ ನಡುವೆ ಸಮರ ಶುರುವಾಗಿದೆ. ಇದಕ್ಕೆ ಸಾಮಾಜಿಕ ಜಾಲತಾಣವೇ ವೇದಿಕೆಯಾಗಿದೆ!

ಹೌದು, ಐಪಿಎಲ್​ ಟೂರ್ನಿಗೆ ಪೂರ್ವಭಾವಿಯಾಗಿ ರಾಜಸ್ಥಾನ ರಾಯಲ್ಸ್​ ಮತ್ತು ಕಿಂಗ್ಸ್​ ಇಲೆವೆನ್​ ಪಂಜಾಬ್​ ತಂಡಗಳ ನಡುವೆ ಟ್ವಿಟರ್​ನಲ್ಲಿ ಮಾತಿನ ಚಕಮಕಿ ಆರಂಭಗೊಂಡಿದೆ. ಸೋಮವಾರ ವಿಶ್ವ ಸಿಂಹಗಳ ದಿನದ ಹಿನ್ನೆಲೆಯಲ್ಲಿ ರಾಜಸ್ಥಾನ ರಾಯಲ್ಸ್ ತಂಡ ಆಲ್ರೌಂಡರ್​ ಬೆನ್​ ಸ್ಟೋಕ್ಸ್​ ಅವರ ಬೆನ್ನ ಹಿಂದಿನ ಸಿಂಹಗಳ ಟ್ಯಾಟೂವಿನ ಚಿತ್ರವನ್ನು ಟ್ವೀಟ್​ ಮಾಡಿತ್ತು. ಇದರ ಜತೆಗೆ, 'ಕ್ರಿಕೆಟ್​ನಲ್ಲಿ ಇದಕ್ಕಿಂತ ಉತ್ತಮವಾದ ಟ್ಯಾಟೂ ಇದ್ದರೆ ತಿಳಿಸಿ, ನಾವು ಕಾಯುತ್ತೇವೆ' ಎಂದು ಟ್ವೀಟ್​ ಮಾಡಿತ್ತು.

ಇದನ್ನೂ ಓದಿ: ಐಪಿಎಲ್​ನಲ್ಲಿ ದಕ್ಷಿಣ ಆಫ್ರಿಕಾ ಕ್ರಿಕೆಟಿಗರು ಆಡುವುದು ಖಚಿತ

ರಾಜಸ್ಥಾನ ರಾಯಲ್ಸ್​ ತಂಡದ ಈ ಟ್ವೀಟ್​ಗೆ ಪ್ರತಿಕ್ರಿಯೆ ನೀಡಿರುವ ಕಿಂಗ್ಸ್​ ಇಲೆವೆನ್​ ಪಂಜಾಬ್ ತಂಡ, ಸ್ಫೋಟಕ ಬ್ಯಾಟ್ಸ್​ಮನ್​ ಕ್ರಿಸ್​ ಗೇಲ್​ ಅವರ ಟ್ಯಾಟೂ ಚಿತ್ರವನ್ನು ಪೋಸ್ಟ್​ ಮಾಡಿದೆ. ಜತೆಗೆ, 'ನಾವು ನಿಮ್ಮನ್ನು ತುಂಬ ಹೊತ್ತು ಕಾಯಿಸಲಿಲ್ಲ ಎಂದು ಭರವಸೆ ಇಡುತ್ತೇವೆ' ಎಂದು ಬರೆದು ಟಾಂಗ್​ ನೀಡಿದೆ. ರಾಜಸ್ಥಾನ ರಾಯಲ್ಸ್​ ಮತ್ತು ಕಿಂಗ್ಸ್​ ಇಲೆವೆನ್​ ಪಂಜಾಬ್​ ತಂಡಗಳ ಈ ಟ್ವೀಟ್​ವಾರ್​ ಇದೀಗ ಮೈದಾನದಲ್ಲಿ ಉಭಯ ತಂಡಗಳ ಮುಖಾಮುಖಿಯ ಬಗ್ಗೆ ಕುತೂಹಲವನ್ನು ಹೆಚ್ಚಿಸಿದೆ.