IPL 2027; ರೋಹಿತ್-ಸೂರ್ಯ ಅಲ್ಲ; ಮುಂಬೈ ಕ್ಯಾಪ್ಟನ್ ರೇಸ್‌ನಲ್ಲಿ ಬುಮ್ರಾ ನಂ.1: ಅಭಿಮಾನಿಗಳ ತೀರ್ಪು!

ಈ ಕುರಿತು ನಡೆಸಲಾದ ವಿಶೇಷ ಸಮೀಕ್ಷೆಯೊಂದರಲ್ಲಿ (Poll), ಮುಂಬೈ ಇಂಡಿಯನ್ಸ್ ತಂಡದ ಮುಂದಿನ ನಾಯಕನಾಗಿ ಸ್ಟಾರ್ ವೇಗಿ ಜಸ್ಪ್ರಿತ್ ಬುಮ್ರಾ ಅವರನ್ನೇ ನೇಮಿಸಬೇಕು ಎಂದು ಕ್ರಿಕೆಟ್ ಅಭಿಮಾನಿಗಳು ಆಗ್ರಹಿಸಿದ್ದಾರೆ. ಹಿಟ್‌ಮ್ಯಾನ್ ರೋಹಿತ್ ಶರ್ಮಾ ಮತ್ತು ಟಿ20 ಕಿಂಗ್ ಸೂರ್ಯಕುಮಾರ್ ಯಾದವ್ ಅವರನ್ನೂ ಹಿಂದಿಕ್ಕಿ ಬುಮ್ರಾ ಅವರೇ ಅಭಿಮಾನಿಗಳ ಮೊದಲ ಆಯ್ಕೆಯಾಗಿ ಹೊರಹೊಮ್ಮಿರುವುದು ಭಾರಿ ಕುತೂಹಲ ಮೂಡಿಸಿದೆ.

ಹಾರ್ದಿಕ್ ಪಾಂಡ್ಯ ನಾಯಕತ್ವದ ವೈಫಲ್ಯದ ಬಳಿಕ, ‘ಐಪಿಎಲ್ 2027ರಲ್ಲಿ ಮುಂಬೈ ತಂಡವನ್ನು ಯಾರು ಮುನ್ನಡೆಸಬೇಕು?’ ಎಂಬ ಸಮೀಕ್ಷೆಗೆ ಕ್ರೀಡಾ ಪ್ರೇಮಿಗಳಿಂದ ಅಭೂತಪೂರ್ವ ಪ್ರತಿಕ್ರಿಯೆ ವ್ಯಕ್ತವಾಗಿದೆ.

ಜಸ್ಪ್ರಿತ್ ಬುಮ್ರಾ (ಶೇ. 44 ಕ್ಕೂ ಹೆಚ್ಚು ಮತ): ತಂಡದ ಪ್ರಮುಖ ವೇಗಿ ಬುಮ್ರಾ ಅವರಿಗೆ ಅಭಿಮಾನಿಗಳು ಜೈ ಎಂದಿದ್ದಾರೆ. ಈ ಸೀಸನ್‌ನಲ್ಲಿ ಪಾಂಡ್ಯ ಮತ್ತು ಸೂರ್ಯಕುಮಾರ್ ಅಲಭ್ಯರಾಗಿದ್ದಾಗ ಪಂಜಾಬ್ ಕಿಂಗ್ಸ್ ವಿರುದ್ಧದ ಪಂದ್ಯದಲ್ಲಿ ಬುಮ್ರಾ ಮುಂಬೈ ತಂಡವನ್ನು ಮುನ್ನಡೆಸಿ ಜಯ ತಂದುಕೊಟ್ಟಿದ್ದರು. ಅವರ ಈ ನಾಯಕತ್ವದ ಶೈಲಿ ಅಭಿಮಾನಿಗಳಿಗೆ ಭಾರಿ ಇಷ್ಟವಾಗಿದೆ.

ರೋಹಿತ್ ಶರ್ಮಾ (ಶೇ. 27 ಕ್ಕೂ ಹೆಚ್ಚು ಮತ): ಮುಂಬೈ ತಂಡಕ್ಕೆ ಐದು ಬಾರಿ ಟ್ರೋಫಿ ತಂದುಕೊಟ್ಟ ಯಶಸ್ವಿ ನಾಯಕ ರೋಹಿತ್ ಶರ್ಮಾ ಅವರಿಗೆ ಎರಡನೇ ಸ್ಥಾನ ಸಿಕ್ಕಿದೆ.

ತಿಲಕ್ ವರ್ಮಾ (ಶೇ. 17 ಮತ): ಯುವ ಆಟಗಾರ ತಿಲಕ್ ವರ್ಮಾ ಅವರ ಮೇಲೂ ಅಭಿಮಾನಿಗಳು ನಂಬಿಕೆ ಇಟ್ಟು ಮೂರನೇ ಸ್ಥಾನ ನೀಡಿದ್ದಾರೆ.

ಸೂರ್ಯಕುಮಾರ್ ಯಾದವ್ (ಶೇ. 10.6 ಮತ): ಟಿ20 ಮಾಂತ್ರಿಕ ಸೂರ್ಯಕುಮಾರ್ ಯಾದವ್ ಅವರಿಗೆ ಈ ರೇಸ್‌ನಲ್ಲಿ ಕನಿಷ್ಠ ಬೆಂಬಲ ಸಿಕ್ಕಿದೆ.

ಕೇವಲ ಅಭಿಮಾನಿಗಳು ಮಾತ್ರವಲ್ಲದೆ, ಕ್ರೀಡಾ ವಿಶ್ಲೇಷಕರ ಸಮಿತಿ ಕೂಡ ಮುಂಬೈ ತಂಡ ಬೇರೆ ಹೊಸ ಮುಖದ ಹುಡುಕಾಟ ನಡೆಸುವ ಬದಲು, ತಂಡದಲ್ಲೇ ಇರುವ ಜಸ್ಪ್ರಿತ್ ಬುಮ್ರಾ ಅವರಿಗೆ ನಾಯಕತ್ವದ ಜವಾಬ್ದಾರಿ ನೀಡುವುದು ಸೂಕ್ತ ಎಂಬ ಅಭಿಪ್ರಾಯ ವ್ಯಕ್ತಪಡಿಸಿದೆ.

ಮುಂಬೈ ಇಂಡಿಯನ್ಸ್ ತಂಡದಲ್ಲೇ ಬೆಳೆದು ಸ್ಟಾರ್ ಆಟಗಾರನಾಗಿದ್ದ ಹಾರ್ದಿಕ್ ಪಾಂಡ್ಯ ಅವರನ್ನು 2022ರ ಮೆಗಾ ಹರಾಜಿಗೂ ಮುನ್ನ ತಂಡದಿಂದ ಬಿಡುಗಡೆ ಮಾಡಲಾಗಿತ್ತು. ನಂತರ ಗುಜರಾತ್ ಟೈಟನ್ಸ್ ತಂಡ ಸೇರಿದ ಅವರು, ಚೊಚ್ಚಲ ಸೀಸನ್‌ನಲ್ಲೇ ತಂಡವನ್ನು ಚಾಂಪಿಯನ್ ಪಟ್ಟಕ್ಕೇರಿಸಿ ಇತಿಹಾಸ ಸೃಷ್ಟಿಸಿದ್ದರು. 2023ರಲ್ಲೂ ಗುಜರಾತ್ ತಂಡವನ್ನು ಫೈನಲ್‌ಗೆ ಮುನ್ನಡೆಸಿದ್ದರು.

ಅವರ ಈ ಯಶಸ್ಸನ್ನು ನೋಡಿ ಮುಂಬೈ ಫ್ರಾಂಚೈಸಿಯು ರೋಹಿತ್ ಶರ್ಮಾ ಅವರನ್ನು ನಾಯಕತ್ವದಿಂದ ಕೆಳಗಿಳಿಸಿ, 2024ರಲ್ಲಿ ಹಾರ್ದಿಕ್ ಪಾಂಡ್ಯರನ್ನು ಮರಳಿ ಕರೆತಂದು ನಾಯಕ ಪಟ್ಟ ಕಟ್ಟಿತ್ತು. ಆದರೆ, ಪಾಂಡ್ಯ ಬಂದ ಮೇಲೆ ಮುಂಬೈ ತಂಡದ ಗ್ರಹಚಾರವೇ ಬದಲಾಯಿತು.

2024ರ ಸೀಸನ್: ಮುಂಬೈ ಇಂಡಿಯನ್ಸ್ ಕೇವಲ 4 ಪಂದ್ಯ ಗೆದ್ದು, 10ರಲ್ಲಿ ಸೋತು ಅಂಕಪಟ್ಟಿಯಲ್ಲಿ ಕೊನೆಯ ಸ್ಥಾನಕ್ಕೆ ಕುಸಿದು ಮುಖಭಂಗ ಅನುಭವಿಸಿತು.

2025ರ ಸೀಸನ್: ಈ ವರ್ಷ ಸ್ವಲ್ಪ ಚೇತರಿಕೆ ಕಂಡ ತಂಡ ಪ್ಲೇಆಫ್ ತಲುಪಿತು. ಎಲಿಮಿನೇಟರ್‌ನಲ್ಲಿ ಗುಜರಾತ್ ತಂಡವನ್ನು ಸೋಲಿಸಿದರೂ, ಕ್ವಾಲಿಫೈಯರ್ 2ರಲ್ಲಿ ಪಂಜಾಬ್ ಕಿಂಗ್ಸ್ ವಿರುದ್ಧ ಸೋತು ಟ್ರೋಫಿ ರೇಸ್‌ನಿಂದ ಹೊರಬಿದ್ದಿತು.

2026ರ ಸೀಸನ್: ಕಳೆದ 6 ವರ್ಷಗಳಿಂದ ಕಾಡುತ್ತಿರುವ ಟ್ರೋಫಿ ಬರವನ್ನು ಈ ಬಾರಿ ಪಾಂಡ್ಯ ನೀಗಿಸಲಿದ್ದಾರೆ ಎಂಬ ಭಾರಿ ನಿರೀಕ್ಷೆ ಇತ್ತು. ಆದರೆ ಈ ಸೀಸನ್ ಇಡೀ ತಂಡಕ್ಕೆ ಅತ್ಯಂತ ಕರಾಳ ಅಧ್ಯಾಯವಾಗಿ ಮಾರ್ಪಟ್ಟಿತು. ತಂಡದಲ್ಲಿ ಯಾವುದೇ ತಾಳಮೇಳ ಇರಲಿಲ್ಲ. ಸ್ವತಃ ನಾಯಕ ಪಾಂಡ್ಯ ಅವರೇ ಗಾಯದ ಕಾರಣದಿಂದ ಕೆಲವು ಪಂದ್ಯಗಳಿಂದ ಹೊರಗುಳಿದರು. ಅಂತಿಮವಾಗಿ 14 ಪಂದ್ಯಗಳಲ್ಲಿ ಕೇವಲ 4ರಲ್ಲಿ ಗೆದ್ದು, 10 ಪಂದ್ಯಗಳಲ್ಲಿ ಹೀನಾಯವಾಗಿ ಸೋತು ಲೀಗ್ ಹಂತದಲ್ಲೇ ಟೂರ್ನಿಯಿಂದ ಹೊರಬಿದ್ದಿದೆ.

2020ರ ಬಳಿಕ ಮುಂಬೈ ತಂಡ ಒಂದೂ ಐಪಿಎಲ್ ಟ್ರೋಫಿ ಗೆದ್ದಿಲ್ಲ. ಸತತ ವೈಫಲ್ಯಗಳಿಂದ ಕಂಗೆಟ್ಟಿರುವ ಫ್ರಾಂಚೈಸಿ ಹಾಗೂ ಮಾಲೀಕರು, ಐಪಿಎಲ್ 2027ರ ಮೆಗಾ ಹರಾಜಿಗೂ ಮುನ್ನ ನಾಯಕತ್ವ ಬದಲಾವಣೆಯ ಕಠಿಣ ತೀರ್ಮಾನ ಕೈಗೊಳ್ಳುತ್ತಾರಾ? ಜಸ್ಪ್ರಿತ್ ಬುಮ್ರಾ ಮುಂಬೈ ತಂಡದ ಹೊಸ ಸಾರಥಿಯಾಗಲಿದ್ದಾರಾ? ಎಂಬುದನ್ನು ಕಾದು ನೋಡಬೇಕಿದೆ,(ಏಜೆನ್ಸೀಸ್​).