ಪ್ರಯಾಣದ ದಣಿವು ಮತ್ತು ಗ್ಯಾಸ್ಟ್ರಿಕ್ ಸಮಸ್ಯೆಗೆ ಇಲ್ಲಿದೆ ಸೂಕ್ತ ಪರಿಹಾರ! | Acidity

ಹೊರನೋಟಕ್ಕೆ ಕೇವಲ ದಣಿವು ಮಾತ್ರ ಕಾಣಿಸಿದರೂ, ದೇಹದ ಒಳಗಿನ ಜೀರ್ಣಾಂಗವ್ಯೂಹ (Digestion System) ಭಾರಿ ಒತ್ತಡಕ್ಕೆ ಒಳಗಾಗಿರುತ್ತದೆ. ಇಂತಹ ಸಂದರ್ಭದಲ್ಲಿ ತಕ್ಷಣವೇ ಕಠಿಣ ಡಯಟ್ ಅಥವಾ ಜಿಮ್ ವರ್ಕೌಟ್ ಆರಂಭಿಸುವ ಬದಲು, ದೇಹವನ್ನು ಸಹಜ ಸ್ಥಿತಿಗೆ ತರುವುದು ಮುಖ್ಯ ಎನ್ನುತ್ತಾರೆ ದೇಶದ ಪ್ರಸಿದ್ಧ ಪೌಷ್ಟಿಕಾಂಶ ತಜ್ಞೆ (Nutritionist) ರುಜುತಾ ದಿವೇಕರ್. ಬಾಲಿವುಡ್ ನಟಿ ಕರೀನಾ ಕಪೂರ್ ಸೇರಿದಂತೆ ಹಲವು ಸೆಲೆಬ್ರಿಟಿಗಳಿಗೆ ಫಿಟ್‌ನೆಸ್ ಗೈಡ್ ಆಗಿರುವ ರುಜುತಾ, ಇತ್ತೀಚೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಂಡಿರುವ ಕೆಲವು ಸರಳ ಮತ್ತು ಸಾಂಪ್ರದಾಯಿಕ ಆರೋಗ್ಯದ ಟಿಪ್ಸ್ ಈಗ ಭಾರಿ ವೈರಲ್ ಆಗುತ್ತಿವೆ.

ರಜೆಯ ದಿನಗಳಲ್ಲಿ ಅತಿಯಾಗಿ ಕರಿದ ಪದಾರ್ಥಗಳು, ಸಿಹಿ ತಿಂಡಿಗಳು, ಕಾಫಿ-ಟೀ ಹಾಗೂ ಕೋಲ್ಡ್ ಡ್ರಿಂಕ್ಸ್ ಸೇವಿಸುವುದರಿಂದ ಹೊಟ್ಟೆಯಲ್ಲಿ ಉಷ್ಣಾಂಶ ಹೆಚ್ಚಾಗುತ್ತದೆ. ಇದನ್ನು ತಹಬದಿಗೆ ತರಲು ಮಧ್ಯಾಹ್ನದ ಊಟದಲ್ಲಿ ಚವಳಿಕಾಯಿ (Cluster Beans) ಪಲ್ಯ ಅಥವಾ ಸಾಂಬಾರ್ ಬಳಸಲು ರುಜುತಾ ಸೂಚಿಸುತ್ತಾರೆ. ಇದರಲ್ಲಿ ಸಮೃದ್ಧವಾಗಿರುವ ನಾರಿನಂಶ (Fiber), ಆಂಟಿಆಕ್ಸಿಡೆಂಟ್‌ಗಳು ಮತ್ತು ಅಮೈನೋ ಆಮ್ಲಗಳು ಹೊಟ್ಟೆಯನ್ನು ತಂಪಾಗಿಸಿ, ಜೀರ್ಣಕ್ರಿಯೆಯನ್ನು ಸುಲಭಗೊಳಿಸುತ್ತವೆ.

ಪ್ರವಾಸದಿಂದ ಬಂದ ತಕ್ಷಣವೇ ತೂಕ ಇಳಿಸುವ ಆತುರದಲ್ಲಿ ಕಠಿಣವಾದ ಜಿಮ್ ವರ್ಕೌಟ್‌ಗಳನ್ನು ಮಾಡಬೇಡಿ. ಮೊದಲ ಕೆಲವು ದಿನಗಳ ಕಾಲ ಕೇವಲ ಬೆಳಗಿನ ಅಥವಾ ಸಂಜೆಯ ನಡಿಗೆ (Walking), ಸರಳ ಯೋಗಾಸನ ಮತ್ತು ಸ್ಟ್ರೆಚಿಂಗ್‌ಗಳನ್ನಷ್ಟೇ ಮಾಡಿ ದೇಹಕ್ಕೆ ವಿಶ್ರಾಂತಿ ನೀಡಿ. ಇದು ಮೆಟಬಾಲಿಸಂ (ಜೀವಕೋಶಗಳ ರಾಸಾಯನಿಕ ಪ್ರಕ್ರಿಯೆ) ಅನ್ನು ಸಮತೋಲನಕ್ಕೆ ತರುತ್ತದೆ.

ಪ್ರಯಾಣದ ಸಮಯದಲ್ಲಿ ಮತ್ತು ನಂತರ ಸ್ಥಳೀಯವಾಗಿ ಸಿಗುವ ಆಯಾ ಕಾಲದ ಹಣ್ಣುಗಳನ್ನು ತಿನ್ನುವುದು ಉತ್ತಮ. ಪೇರಲ (ಸೀಬೆಹಣ್ಣು), ಮಲ್ಬೆರಿ ಅಥವಾ ಪಿಯರ್ಸ್ (ಬೇರಿಹಣ್ಣು) ನಂತಹ ಹಣ್ಣುಗಳಲ್ಲಿ ನೀರಿನಂಶ ಹಾಗೂ ನಾರಿನಂಶ ಹೆಚ್ಚಿರುವುದರಿಂದ ಮಲಬದ್ಧತೆ ನಿವಾರಣೆಯಾಗಿ ಹೊಟ್ಟೆ ಸ್ವಚ್ಛಗೊಳ್ಳುತ್ತದೆ.

ದೇಹದಲ್ಲಿ ನೀರಿನಂಶ ಕಡಿಮೆಯಾದಾಗ ಅಸಿಡಿಟಿ ಹೆಚ್ಚುತ್ತದೆ. ಚಹಾ, ಕಾಫಿ ಸೇವನೆಯನ್ನು ಆದಷ್ಟು ಕಡಿಮೆ ಮಾಡಿ, ಅದಕ್ಕೆ ಬದಲಾಗಿ ಮಜ್ಜಿಗೆ, ನಿಂಬೆ ಹಣ್ಣಿನ ಶರಬತ್ತು ಅಥವಾ ಮಾವಿನ ಹಣ್ಣಿನ ಪನ್ನಾ (ಮಾವಿನಕಾಯಿ ತಿಳಿ ಜ್ಯೂಸ್) ನಂತಹ ಸಾಂಪ್ರದಾಯಿಕ ಪಾನೀಯಗಳನ್ನು ಕುಡಿಯಿರಿ. ಇವು ದೇಹವನ್ನು ಹೈಡ್ರೇಟ್ ಆಗಿಡುತ್ತವೆ.

ಸಂಜೆಯ ನಂತರ ಅಥವಾ ರಾತ್ರಿ ಹೊತ್ತು ಸಿರಿಧಾನ್ಯಗಳಿಂದ ಮಾಡಿದ ಹಗುರವಾದ ಆಹಾರ ಸೇವನೆ ಉತ್ತಮ. ರಾಗಿ ದೋಸೆ, ಜೋಳದ ರೊಟ್ಟಿ ಅಥವಾ ಸಿರಿಧಾನ್ಯಗಳ ಉಪ್ಪಿಟ್ಟು ಮಲಬದ್ಧತೆ ಮತ್ತು ಹೊಟ್ಟೆ ಉಬ್ಬರವನ್ನು ಇಲ್ಲದಂತೆ ಮಾಡುತ್ತದೆ.

ಇತ್ತೀಚಿನ ದಿನಗಳಲ್ಲಿ ಸಾಮಾಜಿಕ ಮಾಧ್ಯಮಗಳಲ್ಲಿ ತರಹೇವಾರಿ 'ಡಿಟಾಕ್ಸ್ ಡಯಟ್' ಟ್ರೆಂಡ್‌ಗಳು ಬರುತ್ತಿದ್ದರೂ, ನಮ್ಮ ಭಾರತೀಯ ಸಾಂಪ್ರದಾಯಿಕ ಆಹಾರ ಪದ್ಧತಿಯಲ್ಲೇ ನಿಜವಾದ ಆರೋಗ್ಯ ಅಡಗಿದೆ ಎಂಬುದನ್ನು ರುಜುತಾ ದಿವೇಕರ್ ಅವರ ಈ ಸಲಹೆಗಳು ಮತ್ತೊಮ್ಮೆ ನೆನಪಿಸಿಕೊಡುತ್ತವೆ,(ಏಜೆನ್ಸೀಸ್​).