RR ತಂಡ ತೊರೆಯುತ್ತಾರಾ ಯಶಸ್ವಿ ಜೈಸ್ವಾಲ್? ವೈಭವ್ ಸೂರ್ಯವಂಶಿ ಅಬ್ಬರಕ್ಕೆ ಸಿಲುಕಿದ ಸ್ಟಾರ್ ಆಟಗಾರ!

ಹೌದು, ಸಂಜು ಸ್ಯಾಮ್ಸನ್ ಅವರು ಚೆನ್ನೈ ಸೂಪರ್ ಕಿಂಗ್ಸ್ (CSK) ತಂಡಕ್ಕೆ ವಲಸೆ ಹೋದಾಗ, ಜೈಸ್ವಾಲ್ ಅವರೇ ರಾಜಸ್ಥಾನ್ ತಂಡದ ಮುಂದಿನ ನಾಯಕ ಅಥವಾ ಫ್ರಾಂಚೈಸಿಯ ಮುಖ್ಯ ಮುಖವಾಗಲಿದ್ದಾರೆ ಎಂದು ಎಲ್ಲರೂ ಭಾವಿಸಿದ್ದರು. ಆದರೆ, ಕೇವಲ ಒಂದೇ ವರ್ಷದಲ್ಲಿ ಪರಿಸ್ಥಿತಿ ಸಂಪೂರ್ಣ ಬದಲಾಗಿದೆ. ಪ್ರಸ್ತುತ ತಂಡದಲ್ಲಿ ಹದಿನೈದರ ಹರೆಯದ ಬಾಲಕ ವೈಭವ್ ಸೂರ್ಯವಂಶಿ ಅವರ ಅಬ್ಬರದ ಮುಂದೆ ಜೈಸ್ವಾಲ್ ದ್ವಿತೀಯ ದರ್ಜೆಯ ಆಟಗಾರನಂತೆ ಕಣ್ಮರೆಯಾಗುತ್ತಿದ್ದಾರೆ.

2023ರ ಐಪಿಎಲ್ ಋತುವಿನಲ್ಲಿ ಜೈಸ್ವಾಲ್ ಬರೋಬ್ಬರಿ 600ಕ್ಕೂ ಹೆಚ್ಚು ರನ್ ಗಳಿಸಿ ಭಾರತೀಯ ಕ್ರಿಕೆಟ್‌ನ ಮುಂದಿನ ಭವಿಷ್ಯ ಎಂದು ಗುರುತಿಸಿಕೊಂಡಿದ್ದರು. ಆದರೆ, 2026ರ ಮೇ ತಿಂಗಳ ವೇಳೆಗೆ ರಾಜಸ್ಥಾನ್ ರಾಯಲ್ಸ್ ತಂಡದಲ್ಲಿ ವೈಭವ್ ಸೂರ್ಯವಂಶಿ ಅವರ ಭಯವಿಲ್ಲದ ಸ್ಫೋಟಕ ಬ್ಯಾಟಿಂಗ್ ಶೈಲಿ ಇಡೀ ಕ್ರಿಕೆಟ್ ಜಗತ್ತನ್ನೇ ಆವರಿಸಿಕೊಂಡಿದೆ. ಸೂರ್ಯವಂಶಿ ಅವರ ಅಸಾಧಾರಣ ರನ್ ಬೇಟೆಯ ಮುಂದೆ ಜೈಸ್ವಾಲ್ ಅವರ ಪ್ರದರ್ಶನ ಮಂಕಾಗುತ್ತಿದ್ದು, ತಮ್ಮದೇ ತಂಡದಲ್ಲಿ ಅವರು ಪ್ರಚಾರದ ಬೆಳಕಿನಿಂದ ವಂಚಿತರಾಗುತ್ತಿದ್ದಾರೆ.

ಯಶಸ್ವಿ ಜೈಸ್ವಾಲ್ ಅವರ ಈ ಪ್ರಸ್ತುತ ಸ್ಥಿತಿಯ ಬಗ್ಗೆ ಭಾರತದ ಮಾಜಿ ಕ್ರಿಕೆಟಿಗ ಅಂಬಟಿ ರಾಯುಡು ಮಹತ್ವದ ಹೇಳಿಕೆ ನೀಡಿದ್ದಾರೆ. ಜೈಸ್ವಾಲ್ ಅವರು ಸೂರ್ಯವಂಶಿ ಅವರ ನೆರಳಿನಿಂದ ಹೊರಬಂದು, ಬೇರೆ ತಂಡ ಸೇರಿ ತಮ್ಮದೇ ಆದ ಸಾಮ್ರಾಜ್ಯವನ್ನು ಕಟ್ಟಿಕೊಳ್ಳಬೇಕು ಎಂದು ರಾಯುಡು ಆಗ್ರಹಿಸಿದ್ದಾರೆ.

ಈ ಕುರಿತು ಇಎಸ್‌ಪಿಎನ್‌ಕ್ರಿಕ್‌ಇನ್ಫೋ (ESPNcricinfo) ವಾಹಿನಿಯೊಂದಿಗೆ ಮಾತನಾಡಿದ ರಾಯುಡು, "ಜೈಸ್ವಾಲ್ ತಮ್ಮ ಬ್ಯಾಟಿಂಗ್ ಶೈಲಿಯನ್ನು ಬದಲಾಯಿಸಿಕೊಳ್ಳಬೇಕಿದೆ. ವೈಭವ್ ಜೊತೆ ಆಡುವಾಗ ಪ್ರತಿ ಬಾರಿಯೂ ಅವರು ಮಂಕಾಗಿ ಕಾಣಿಸಲು ಸಾಧ್ಯವಿಲ್ಲ. ಜೈಸ್ವಾಲ್ ಸ್ವತಃ ಒಬ್ಬ ಅದ್ಭುತ ತಾರೆ. ಅವರು ಬೇರೆ ಯಾವುದಾದರೂ ತಂಡಕ್ಕೆ ಹೋದರೆ, ತಮ್ಮ ಸ್ವಂತ ಬಲದ ಮೇಲೆ ಪಂದ್ಯಗಳನ್ನು ಗೆಲ್ಲಿಸಿಕೊಡಬಲ್ಲರು. ಅವರಿಗೆ ಸ್ವತಂತ್ರವಾದ ವೇದಿಕೆ ಮತ್ತು ಮುಕ್ತ ಅವಕಾಶದ ಅಗತ್ಯವಿದೆ, ಏಕೆಂದರೆ ವೈಭವ್ ಸೂರ್ಯವಂಶಿ ದಿನದಿಂದ ದಿನಕ್ಕೆ ಇತರ ಆಟಗಾರರನ್ನು ತಮ್ಮ ಪ್ರದರ್ಶನದಿಂದ ಮರೆಮಾಚುತ್ತಲೇ ಸಾಗಲಿದ್ದಾರೆ" ಎಂದು ವಿಶ್ಲೇಷಿಸಿದ್ದಾರೆ.

ರಾಯುಡು ಕಿವಿಮಾತು: "ವೈಭವ್ ಜೊತೆ ಆಡಲು ಒಬ್ಬ ಹಿರಿಯ ಅನುಭವಿ ಆಟಗಾರನ ಅಗತ್ಯವಿದೆ, ಆತ ಯುವ ಆಟಗಾರನ ಯಶಸ್ಸನ್ನು ನೋಡಿ ಸಂತೋಷಪಡಬೇಕೇ ಹೊರತು ಆತನೊಂದಿಗೆ ಸ್ಪರ್ಧೆಗೆ ಇಳಿಯಬಾರದು. ಜೈಸ್ವಾಲ್ ಸದ್ಯಕ್ಕೆ ವೈಭವ್ ಜೊತೆ ಸ್ಪರ್ಧಿಸಲು ಸಾಧ್ಯವಿಲ್ಲ".

ಯಶಸ್ವಿ ಜೈಸ್ವಾಲ್ ಅವರು ಮುಂಬೈ ನಗರದ ಮೂಲಕವೇ ಕ್ರಿಕೆಟ್ ಲೋಕಕ್ಕೆ ಹೆಜ್ಜೆ ಇಟ್ಟು ಪ್ರಸಿದ್ಧಿ ಪಡೆದವರು. ಹಾಗಾಗಿ, ರಾಜಸ್ಥಾನ್ ರಾಯಲ್ಸ್ ತಂಡವನ್ನು ತೊರೆದು ಮುಂಬೈ ಇಂಡಿಯನ್ಸ್ (MI) ತಂಡವನ್ನು ಸೇರಿಕೊಂಡರೆ ಅದು ಜೈಸ್ವಾಲ್ ಅವರ ವೃತ್ತಿಜೀವನಕ್ಕೆ ಅತ್ಯಂತ ಸೂಕ್ತವಾದ ಮತ್ತು ಅತ್ಯುತ್ತಮವಾದ ನಿರ್ಧಾರವಾಗಬಹುದು ಎಂದು ರಾಯುಡು ಅಭಿಪ್ರಾಯಪಟ್ಟಿದ್ದಾರೆ. ಸದ್ಯ ಜೈಸ್ವಾಲ್ ತಮ್ಮ ಆಟವನ್ನು ಮರುರೂಪಿಸಿಕೊಳ್ಳುತ್ತಾರೋ ಅಥವಾ ಹೊಸ ತಂಡದ ಹುಡುಕಾಟ ನಡೆಸುತ್ತಾರೋ ಕಾದು ನೋಡಬೇಕಿದೆ,(ಏಜೆನ್ಸೀಸ್​).