ಒಂದು ಪಂದ್ಯದಿಂದ ಬ್ಯಾನ್​ ಆದ್ರೂ ಬುದ್ಧಿ ಕಲಿಯದ ಹಾರ್ದಿಕ್​: ಮತ್ತೆ ಅದೇ ತಪ್ಪು ಮಾಡಿದ ಪಾಂಡ್ಯಗೆ ಬಿಗ್​ ಶಾಕ್​! Hardik Pandya

Hardik Pandya : ಹಾರ್ದಿಕ್​​​ ಪಾಂಡ್ಯ ನೇತೃತ್ವದ ಮುಂಬೈ ಇಂಡಿಯನ್ಸ್ ತಂಡ ಗುಜರಾತ್ ಟೈಟಾನ್ಸ್​ ವಿರುದ್ಧ ನಿನ್ನೆ (ಮಾರ್ಚ್​ 29) ನಡೆದ ಪಂದ್ಯದಲ್ಲಿ ಹೀನಾಯ ಸೋಲು ಅನುಭವಿಸಿದ ನಂತರ ಹಾರ್ದಿಕ್​ ಪಾಂಡ್ಯಗೆ ಮತ್ತೊಂದು ಆಘಾತ ಎದುರಾಗಿದೆ.

ಗುಜರಾತ್ ಟೈಟಾನ್ಸ್ ವಿರುದ್ಧದ ಪಂದ್ಯದಲ್ಲಿ ನಿಧಾನಗತಿಯ ಓವರ್ ರೇಟ್ ಕಾಯ್ದುಕೊಂಡಿದ್ದಕ್ಕಾಗಿ ಹಾರ್ದಿಕ್​ಗೆ 12 ಲಕ್ಷ ರೂಪಾಯಿ ದಂಡ ವಿಧಿಸಲಾಗಿದೆ. ಐಪಿಎಲ್ ನೀತಿ ಸಂಹಿತೆಯ ಆರ್ಟಿಕಲ್ 2.2ರ ಪ್ರಕಾರ ಹಾರ್ದಿಕ್​ಗೆ 12 ಲಕ್ಷ ರೂ. ದಂಡ ವಿಧಿಸಲಾಗಿದೆ. ಈ ಸೀಸನ್​ನಲ್ಲಿ ಹಾರ್ದಿಕ್ ಎಸಗಿದ ಮೊದಲ ನಿಯಮ ಉಲ್ಲಂಘನೆ ಇದಾಗಿದೆ.

ನಿಧಾನಗತಿಯ ಓವರ್​ ರೇಟ್​ ಕಾಯ್ದುಕೊಂಡಿದ್ದಕ್ಕೆ ಈ ಸೀಸನ್​ನ ಮೊದಲ ಪಂದ್ಯದಲ್ಲಿ ಹಾರ್ದಿಕ್ ನಿಷೇಧವನ್ನು ಎದುರಿಸಿದರು. ಕಳೆದ ಸೀಸನ್​ನಲ್ಲಿ, ಹಾರ್ದಿಕ್ ನಾಯಕತ್ವದಲ್ಲಿ, ಮುಂಬೈ ಇಂಡಿಯನ್ಸ್ ತಂಡ ಮೂರು ಬಾರಿ ನಿಧಾನಗತಿಯ ಓವರ್ ರೇಟ್​ ಕಾಯ್ದುಕೊಂಡಿತು. ಇದಕ್ಕಾಗಿ, ಹಾರ್ದಿಕ್ ಅವರನ್ನು ಒಂದು ಪಂದ್ಯಕ್ಕೆ ನಿಷೇಧಿಸಲಾಯಿತು.

ಕಳೆದ ಸೀಸನ್​ವರೆಗೂ ಒಂದು ತಂಡವು ಮೂರು ಬಾರಿ (ಒಂದೇ ಸೀಸನ್​ನಲ್ಲಿ) ನಿಧಾನಗತಿಯ ಓವರ್ ರೇಟ್​ ಕಾಯ್ದುಕೊಂಡರೆ, ನಾಯಕನನ್ನು ಒಂದು ಪಂದ್ಯಕ್ಕೆ ನಿಷೇಧಿಸಲಾಗುತ್ತಿತ್ತು. ಆದಾಗ್ಯೂ, ಈ ಸೀಸನ್​ನ ಆರಂಭಕ್ಕೂ ಮುನ್ನ ಆ ನಿಯಮವನ್ನು ತೆಗೆದುಹಾಕಲಾಯಿತು. ಈ ಸೀಸನ್​ನಲ್ಲಿ ನಿಧಾನಗತಿಯ ಓವರ್ ರೇಟ್​ ಉಲ್ಲಂಘನೆಗೆ ನಾಯಕರನ್ನು ನಿಷೇಧಿಸಲಾಗುವುದಿಲ್ಲ. ಬದಲಾಗಿ ದಂಡ ಮಾತ್ರ ವಿಧಿಸಲಾಗುತ್ತದೆ.

ಇನ್ನು ಪಂದ್ಯದ ವಿಚಾರಕ್ಕೆ ಬಂದರೆ, ನಿನ್ನೆ (ಮಾರ್ಚ್ 29) ಗುಜರಾತ್ ಟೈಟಾನ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ ಮುಂಬೈ ಇಂಡಿಯನ್ಸ್ 36 ರನ್‌ಗಳಿಂದ ಸೋತಿತು. ಈ ಸೀಸನ್​ನಲ್ಲಿ ಮುಂಬೈ ಇಂಡಿಯನ್ಸ್‌ಗೆ ಇದು ಸತತ ಎರಡನೇ ಸೋಲು. ಮೊದಲ ಪಂದ್ಯದಲ್ಲಿ ಮುಂಬೈ, ಸಿಎಸ್‌ಕೆ ವಿರುದ್ಧ ಸೋತಿತು. ಇದೀಗ ಗುಜರಾತ್ ವಿರುದ್ಧದ ಪಂದ್ಯದಲ್ಲಿ ಮುಂಬೈ ತಂಡ ಬೌಲಿಂಗ್ ಮತ್ತು ಬ್ಯಾಟಿಂಗ್ ಎರಡರಲ್ಲೂ ಹೀನಾಯ ಪ್ರದರ್ಶನ ನೀಡಿತು. ಮೊದಲು ಬೌಲಿಂಗ್ ಮಾಡಿ ಗುಜರಾತ್‌ಗೆ ಬೃಹತ್ ಸ್ಕೋರ್ (196/8) ಗಳಿಸಲು ಅವಕಾಶ ನೀಡಿದ ತಂಡ, ನಂತರ ಚೇಸಿಂಗ್‌ನಲ್ಲಿ (160/6) ಸೋತಿತು.

ಇದನ್ನೂ ಓದಿ: ನಾವು ದಕ್ಷಿಣದ ಚಿತ್ರಗಳನ್ನೂ ನೋಡ್ತೇವೆ ಆದ್ರೆ ಅವರಿಗೆ ನಾವಂದ್ರೆ ಲೆಕ್ಕಕ್ಕಿಲ್ಲ: ಸಲ್ಮಾನ್​ ಖಾನ್​ ಬೇಸರ! Salman Khan

ಗುಜರಾತ್ ಬೌಲರ್‌ಗಳು ತಮ್ಮ ತವರು ಪಿಚ್‌ನ ಅನುಕೂಲವನ್ನು ಬಳಸಿಕೊಂಡು ಮುಂಬೈ ಬ್ಯಾಟ್ಸ್‌ಮನ್‌ಗಳನ್ನು ನಿರ್ಬಂಧಿಸಿದರು. ಈ ಪಂದ್ಯದಲ್ಲಿ ಹಾರ್ದಿಕ್ ಪಾಂಡ್ಯ (4-0-29-2) ಬೌಲಿಂಗ್‌ನಲ್ಲಿ ಉತ್ತಮ ಪ್ರದರ್ಶನ ನೀಡಿದರೂ, ಬ್ಯಾಟಿಂಗ್‌ನಲ್ಲಿ ನಿರಾಸೆ ಅನುಭವಿಸಿದರು. ಚೇಸಿಂಗ್‌ನ ನಿರ್ಣಾಯಕ ಹಂತದಲ್ಲಿ ಅವರು (17 ಎಸೆತಗಳಲ್ಲಿ 11 ರನ್ನ) ಎಸೆತಗಳನ್ನು ವ್ಯರ್ಥ ಮಾಡಿ ತಂಡದ ಸೋಲಿಗೆ ಕಾರಣರಾದರು.

ಈ ಪಂದ್ಯದಲ್ಲಿ ಹಾರ್ದಿಕ್ (ನಾಯಕ) ಮಾಡಿದ ಪ್ರಯೋಗಗಳು ಕೂಡ ಉಲ್ಟಾ ಹೊಡೆದವು. ರಾಬಿನ್ ಮಿಂಜ್​ ಅವರನ್ನು ಬ್ಯಾಟಿಂಗ್‌ಗೆ ಕಳುಹಿಸುವ ಮೂಲಕ ಹಾರ್ದಿಕ್ ದೊಡ್ಡ ತಪ್ಪು ಮಾಡಿದರು. ರಾಬಿನ್​ ಮಿಂಜ್​, ನಿರ್ಣಾಯಕ ಹಂತದಲ್ಲಿ ಚೆಂಡುಗಳನ್ನು ವ್ಯರ್ಥ ಮಾಡಿ ಅಗ್ಗವಾಗಿ ಔಟಾದರು (6 ಎಸೆತಗಳಲ್ಲಿ 3). ಅಂತಿಮ ತಂಡದ ಆಯ್ಕೆಯಲ್ಲೂ ಹಾರ್ದಿಕ್ ದೊಡ್ಡ ತಪ್ಪು ಮಾಡಿದರು. ಮೊದಲ ಪಂದ್ಯದಲ್ಲಿ ಅದ್ಭುತಗಳನ್ನು ಮಾಡಿದ್ದ ವಿಘ್ನೇಶ್ ಪುಥೂರ್ ಮತ್ತು ಕಳೆದ ಋತುವಿನಲ್ಲಿ ಅಹಮದಾಬಾದ್‌ನಲ್ಲಿ ಶತಕ ಗಳಿಸಿದ್ದ ವಿಲ್ ಜಾಕ್ಸ್ ಸೇರಿದಂತೆ ದೊಡ್ಡ ಹಿಟ್ಟರ್​ಗಳನ್ನು ಹೊರಗಿಡುವ ಮೂಲಕ ಅವರು ಭಾರಿ ಬೆಲೆ ತೆತ್ತರು. (ಏಜೆನ್ಸೀಸ್​)

https://www.vijayavani.net/rcb-will-no-longer-depend-on-kohli-former-indian-cricketer

https://www.vijayavani.net/if-this-happens-we-will-leave-hyderabad-srh-management