PHOTOS| ಕಾಶಿ ವಿಶ್ವನಾಥನ ಥೀಮ್​ನಲ್ಲಿ ಸಿದ್ಧವಾಗಲಿರುವ ಕ್ರಿಕೆಟ್​ ಸ್ಟೇಡಿಯಂ ಲುಕ್​ ಹೀಗಿರಲಿದೆ ನೋಡಿ…

ವಾರಾಣಸಿ: ಲಂಡನ್​ನ ಲಾರ್ಡ್ಸ್​ ಕ್ರೀಡಾಂಗಣವನ್ನು ಕ್ರಿಕೆಟ್​ ಕಾಶಿ ಎನ್ನಲಾಗುತ್ತದೆ. ಆದರೆ ಇದೀಗ ಭಾರತದಲ್ಲೇ ‘ಕ್ರಿಕೆಟ್​ ಕಾಶಿ’ ನಿರ್ಮಾಣವಾಗುತ್ತಿದೆ! ಹೌದು, ಕಾಶಿ ವಿಶ್ವನಾಥನ ಥೀಮ್​ನಲ್ಲೇ ಹೊಸ ಕ್ರಿಕೆಟ್​ ಕ್ರೀಡಾಂಗಣವೊಂದು ನಿರ್ಮಾಣವಾಗುತ್ತಿದೆ. ತ್ರಿಶೂಲ, ಅರ್ಧಚಂದ್ರ, ಢಮರುಗ, ಬಿಲ್ವಪತ್ರೆಯ ವಿನ್ಯಾಸಗಳನ್ನು ಒಳಗೊಂಡ ಶಿವನ ಥೀಮ್​ನಲ್ಲೇ ಈ ಕ್ರೀಡಾಂಗಣದ ನೀಲನಕ್ಷೆಯನ್ನು ಸಿದ್ಧಪಡಿಸಲಾಗಿದ್ದು, ಇಂದು ಈ ಕ್ರೀಡಾಂಗಣ ನಿರ್ಮಾಣಕ್ಕೆ ಪ್ರಧಾನಿ ಮೋದಿ ಅವರು ಶಿಲಾನ್ಯಾಸ ನೆರವೇರಿಸಲಿದ್ದಾರೆ.

ಪ್ರಧಾನಿ ಮೋದಿ ಅವರ ಸಂಸದೀಯ ಕ್ಷೇತ್ರವಾಗಿರುವ ವಾರಣಾಸಿಯ ಕ್ರೀಡಾಂಗಣವನ್ನು ರಾಜತಾಲಬ್‌ನ ಗಂಜಾರಿ ಏರಿಯಾದಲ್ಲಿ 30 ಎಕರೆಗೂ ಹೆಚ್ಚು ಪ್ರದೇಶದಲ್ಲಿ ಅಭಿವೃದ್ಧಿಪಡಿಸಲಾಗುತ್ತದೆ. ಸುಮಾರು 450 ಕೋಟಿ ರೂಪಾಯಿ ವೆಚ್ಚದಲ್ಲಿ ನಿರ್ಮಾಣವಾಗಲಿದೆ.

ಇದನ್ನೂ ಓದಿ: ರಾಜಕೀಯ ಹಿತಾಸಕ್ತಿಗಾಗಿ ಕಾಂಗ್ರೆಸ್​ ರಾಜ್ಯದ ಹಿತವನ್ನು ಬಲಿಕೊಟ್ಟಿದೆ: ಮಾಜಿ ಸಿಎಂ ಬಿ.ಎಸ್. ಯಡಿಯೂರಪ್ಪ ಕಿಡಿ

ಶಿವನ ತಲೆಯ ಮೇಲಿರುವ ಅರ್ಧಚಂದ್ರಾಕೃತಿಯಲ್ಲೇ ಕ್ರೀಡಾಂಗಣದ ಮೇಲ್ಛಾವಣಿಯ ವಿನ್ಯಾಸವಿರಲಿದೆ. ಫ್ಲಡ್​ಲೈಟ್​ಗಳನ್ನು ದೊಡ್ಡ ತ್ರಿಶೂಲದ ಆಕೃತಿಯ ಕಂಬಗಳಲ್ಲಿ ಅಳವಡಿಸಲಾಗುತ್ತದೆ.

ಮುಖ್ಯ ಪ್ರವೇಶ ದ್ವಾರದಲ್ಲಿರುವ ಪೆವಿಲಿಯನ್​ ಮತ್ತು ವಿಐಪಿ ಲಾಂಜ್​ಗಳ ಗುಮ್ಮಟವು ಶಿವನ ಕೈಯಲ್ಲಿರುವ ಢಮರುಗದ ರೀತಿಯಲ್ಲೇ ಇರಲಿದೆ. ಕ್ರೀಡಾಂಗಣದ ಪ್ರೇಕ್ಷಕರ ಗ್ಯಾಲರಿಗಳ ಆಸನ ವ್ಯವಸ್ಥೆಯನ್ನು ಕಾಶಿ ಘಾಟ್​ಗಳ ರೀತಿಯಲ್ಲಿ ವಿನ್ಯಾಸಗೊಳಿಸಲಾಗಿದೆ. ಗೇಟುಗಳು ಬಿಲ್ವ ಪತ್ರೆಯ ರೀತಿಯಲ್ಲಿ ಇರಲಿವೆ.

ಇದನ್ನೂ ಓದಿ: ನಿನ್ನ ಲವರ್​ ತಲೆ ತಂದಿದ್ದೇನೆ: ಅಕ್ರಮ ಸಂಬಂಧ ಇಟ್ಟುಕೊಂಡಿದ್ದವನ ತಲೆ ಕಡಿದು ಪತ್ನಿ ಮನೆಗೆ ಕೊಂಡೊಯ್ದ ಪತಿ

ಉತ್ತರ ಪ್ರದೇಶ ಸರ್ಕಾರವು ಕ್ರೀಡಾಂಗಣದ ಭೂಮಿಯ ಸ್ವಾಮ್ಯಕ್ಕಾಗಿ 120 ಕೋಟಿ ರೂ. ವ್ಯಯಿಸಿದೆ. ಕ್ರೀಡಾಂಗಣ ನಿರ್ಮಾಣಕ್ಕೆ ಬಿಸಿಸಿಐ 330 ಕೋಟಿ ರೂ. ಖರ್ಚು ಮಾಡಲಿದೆ. ಅಹಮದಾಬಾದ್​ನ ನರೇಂದ್ರ ಮೋದಿ ಸ್ಟೇಡಿಯಂ ನಿರ್ಮಿಸಿದ ಎಲ್​ ಆಂಡ್​ ಟಿ ಕಂಪನಿಯೇ ಈ ಕ್ರೀಡಾಂಗಣದ ಕಾಮಗಾರಿಯನ್ನೂ ನಿರ್ವಹಿಸಲಿದೆ. ಒಟ್ಟು 30 ಸಾವಿರ ಪ್ರೇಕ್ಷಕರಿಗೆ ಆಸನ ವ್ಯವಸ್ಥೆ ಒಳಗೊಂಡಿರಲಿದೆ.

ಈ ಕ್ರೀಡಾಂಗಣ 2025ರ ಡಿಸೆಂಬರ್ ವೇಳೆಗೆ ಸಿದ್ಧವಾಗಲಿದೆ ಮತ್ತು ಕಾನ್ಪುರ ಮತ್ತು ಲಖನೌ ನಂತರ ಉತ್ತರ ಪ್ರದೇಶದ ಮೂರನೇ ಅಂತಾರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂ ಆಗಲಿದೆ. (ಏಜೆನ್ಸೀಸ್​)

https://www.vijayavani.net/shivas-crescent-to-crown-proposed-international-cricket-stadium

https://www.vijayavani.net/ms-dhoni-seats-2-seats-from-wankhede-stadium-will-go-on-sale-ahead-of-world-cup-2023-know-why