ಇಂಗ್ಲೆಂಡ್ ಪ್ರವಾಸ ಕೈಗೊಳ್ಳುವ ತಂಡಗಳು ಅಲ್ಲಿನ ಕೌಂಟಿ ತಂಡಗಳ ವಿರುದ್ಧವೇ ಅಭ್ಯಾಸ ಪಂದ್ಯಗಳನ್ನು ಆಡುವುದು ಈ ಹಿಂದೆ ಸಾಮಾನ್ಯವೆನಿಸಿತ್ತು ಮತ್ತು ಈ ಪಂದ್ಯಗಳು ಭಾರಿ ಸ್ಪರ್ಧಾತ್ಮಕತೆಯಿಂದ ಕೂಡಿರುತ್ತಿದ್ದವು. ಆದರೆ ಇತ್ತೀಚೆಗಿನ ವರ್ಷಗಳಲ್ಲಿ ಕೌಂಟಿ ತಂಡಗಳು, ಪ್ರಮುಖ ಆಟಗಾರರು ಗಾಯಗೊಳ್ಳುವುದನ್ನು ತಪ್ಪಿಸಲು ತಮ್ಮ ದುರ್ಬಲ ತಂಡಗಳನ್ನು ಕಣಕ್ಕಿಳಿಸುತ್ತಿದ್ದವು. ಇದರಿಂದಾಗಿ 2019ರ ಆಶಸ್ ಸರಣಿಗೆ ಮುನ್ನ ಆಸ್ಟ್ರೇಲಿಯಾ ತಂಡ ಕೌಂಟಿ ತಂಡದೆದುರು ಆಡದೆ, ತನ್ನದೇ 2 ತಂಡ ರಚಿಸಿ ಅಭ್ಯಾಸ ಪಂದ್ಯವಾಡಿತ್ತು. ಇದೀಗ ಭಾರತ ಕೂಡ ಅದೇ ಮಾದರಿಯನ್ನು ಅನುಸರಿಸಿದ್ದು, ಆತಿಥೇಯರ ದುರ್ಬಲ ತಂಡಗಳೆದುರು ಆಡುವ ಬದಲಾಗಿ ತನ್ನದೇ ಮತ್ತೊಂದು ತಂಡದೆದುರು ಆಡಿ ಟೆಸ್ಟ್ ಸರಣಿಗೆ ಸಮರ್ಥ ಅಭ್ಯಾಸ ನಡೆಸಲು ಬಯಸಿದೆ.
