ಐಪಿಎಲ್ ಆಟಗಾರರ ಹರಾಜು ಯಾವಾಗ? ಎಲ್ಲಿ ನಡೆಯಲಿದೆ ಗೊತ್ತೇ?

ನವದೆಹಲಿ: ಮುಂಬರುವ ಐಪಿಎಲ್ 14ನೇ ಆವೃತ್ತಿಗೆ ಪೂರ್ವಭಾವಿಯಾಗಿ ಆಟಗಾರರ ಹರಾಜು ಪ್ರಕ್ರಿಯೆ ಫೆಬ್ರವರಿ 18ರಂದು ಚೆನ್ನೈನಲ್ಲಿ ನಡೆಯಲಿದೆ. ಹರಾಜು ದಿನಾಂಕ ಮತ್ತು ಸ್ಥಳದ ಮಾಹಿತಿಯನ್ನು ಐಪಿಎಲ್ ಟ್ವಿಟರ್ ಖಾತೆಯಲ್ಲಿ ಖಚಿತಪಡಿಸಲಾಗಿದೆ.

ಭಾರತ ಮತ್ತು ಪ್ರವಾಸಿ ಇಂಗ್ಲೆಂಡ್ ನಡುವಿನ 4 ಪಂದ್ಯಗಳ ಟೆಸ್ಟ್ ಸರಣಿಯ 2ನೇ ಟೆಸ್ಟ್ ಪಂದ್ಯ ಮುಗಿದ ಮರುದಿನವೇ ಹರಾಜು ಪ್ರಕ್ರಿಯೆ ನಿಗದಿಯಾಗಿದೆ. ಮೊದಲೆರಡು ಟೆಸ್ಟ್ ಪಂದ್ಯಗಳೂ ಚೆನ್ನೈನಲ್ಲೇ ನಡೆಯಲಿವೆ. ಫೆಬ್ರವರಿ 5ರಂದು ಟೆಸ್ಟ್ ಸರಣಿ ಆರಂಭವಾಗಲಿದ್ದು, ಫೆಬ್ರವರಿ 13ರಿಂದ 17ರವರೆಗೆ 2ನೇ ಟೆಸ್ಟ್ ಪಂದ್ಯ ನಡೆಯಲಿದೆ.

ಇದನ್ನೂ ಓದಿ: ಟೀಮ್ ಇಂಡಿಯಾದ ಈ ಕ್ರಿಕೆಟಿಗನ ಅಕ್ಕ ಕೂಡ ವೃತ್ತಿಪರ ಕ್ರಿಕೆಟರ್, ತಮ್ಮನ ಯಶಸ್ಸಿಗೂ ನೆರವು!

ಆಟಗಾರ ರಿಟೇನ್ ಪ್ರಕ್ರಿಯೆ ಜನವರಿ 20ರಂದೇ ಮುಕ್ತಾಯಗೊಂಡಿದ್ದು, ಎಲ್ಲ 8 ತಂಡಗಳು ಕೆಲ ಪ್ರಮುಖ ಆಟಗಾರರನ್ನು ಹರಾಜು ಪ್ರಕ್ರಿಯೆಗೆ ಬಿಟ್ಟುಕೊಟ್ಟಿವೆ. ಈ ನಡುವೆ ಆಟಗಾರರ ವರ್ಗಾವಣೆಗೆ ಫೆಬ್ರವರಿ 8ರವರೆಗೆ ಕಾಲಾವಕಾಶ ನೀಡಲಾಗಿದೆ.

ಆಸ್ಟ್ರೇಲಿಯಾದ ಸ್ಟೀವನ್ ಸ್ಮಿತ್, ಗ್ಲೆನ್ ಮ್ಯಾಕ್ಸ್‌ವೆಲ್, ಆರನ್ ಫಿಂಚ್, ದಕ್ಷಿಣ ಆಫ್ರಿಕಾದ ಆಲ್ರೌಂಡರ್ ಕ್ರಿಸ್ ಮಾರಿಸ್, ಭಾರತದ ಹರ್ಭಜನ್ ಸಿಂಗ್, ಕೇದಾರ್ ಜಾಧವ್, ಪೀಯುಷ್ ಚಾವ್ಲಾ ಈ ಬಾರಿ ಹರಾಜಿನಲ್ಲಿ ಕಾಣಿಸಿಕೊಳ್ಳಲಿರುವ ಪ್ರಮುಖ ತಾರೆಯರು.

ಸದ್ಯ ನಡೆಯುತ್ತಿರುವ ಸಯ್ಯದ್ ಮುಷ್ತಾಕ್ ಅಲಿ ಟ್ರೋಫಿ ಟಿ20 ಟೂರ್ನಿಯ ನಿರ್ವಹಣೆಯೂ ಫ್ರಾಂಚೈಸಿಗಳಿಗೆ ದೇಶೀಯ ಆಟಗಾರರ ಖರೀದಿ ವೇಳೆ ನೆರವಿಗೆ ಬರಲಿದೆ. 8 ತಂಡಗಳು ಒಟ್ಟು 139 ಆಟಗಾರರನ್ನು ರಿಟೇನ್ ಮಾಡಿಕೊಂಡಿದ್ದು, 57 ಆಟಗಾರರನ್ನು ತಂಡದಿಂದ ಬಿಡುಗಡೆ ಮಾಡಲಾಗಿದೆ.

ಇದನ್ನೂ ಓದಿ: ದಕ್ಷಿಣ ಆಫ್ರಿಕಾ ವಿರುದ್ಧ ಟೆಸ್ಟ್ ಸರಣಿಯಲ್ಲಿ ಅಂದು ಬಾಲ್ ಬಾಯ್, ಇಂದು ಪಾಕ್ ತಂಡದ ನಾಯಕ!

ಒಟ್ಟು 85 ಕೋಟಿ ರೂ. ಬಜೆಟ್‌ನಲ್ಲಿ ತಂಡಗಳು ಹರಾಜು ಪ್ರಕ್ರಿಯೆಯಲ್ಲಿ ಆಟಗಾರರನ್ನು ಖರೀದಿಸಲು ಉಳಿಸಿಕೊಂಡಿರುವ ಮೊತ್ತದ ವಿವರ ಹೀಗಿದೆ: ಕಿಂಗ್ಸ್ ಇಲೆವೆನ್ ಪಂಜಾಬ್: 53.20 ಕೋಟಿ ರೂ.; ಆರ್‌ಸಿಬಿ: 35.90 ಕೋಟಿ ರೂ; ರಾಜಸ್ಥಾನ ರಾಯಲ್ಸ್: 34.85 ಕೋಟಿ ರೂ; ಸಿಎಸ್‌ಕೆ: 22.90 ಕೋಟಿ ರೂ; ಮುಂಬೈ ಇಂಡಿಯನ್ಸ್: 15.35 ಕೋಟಿ ರೂ; ಡೆಲ್ಲಿ ಕ್ಯಾಪಿಟಲ್ಸ್: 12.90 ಕೋಟಿ ರೂ; ಕೆಕೆಆರ್: 10.75 ಕೋಟಿ ರೂ; ಸನ್‌ರೈಸರ್ಸ್‌: 10.75 ಕೋಟಿ ರೂ.

ಪ್ರತಿ ತಂಡ ಹರಾಜಿನಲ್ಲಿ ಖರೀದಿಸಬಹುದಾದ ಗರಿಷ್ಠ ಆಟಗಾರರ ಸಂಖ್ಯೆ ಹೀಗಿದೆ (ಗರಿಷ್ಠ 25 ಆಟಗಾರರ ತಂಡ): ಕಿಂಗ್ಸ್ ಇಲೆವೆನ್ ಪಂಜಾಬ್: 9 (5 ವಿದೇಶಿ); ಆರ್‌ಸಿಬಿ: 13 (4 ವಿದೇಶಿ); ರಾಜಸ್ಥಾನ ರಾಯಲ್ಸ್: 8 (3 ವಿದೇಶಿ); ಸಿಎಸ್‌ಕೆ: 7 (1 ವಿದೇಶಿ); ಮುಂಬೈ ಇಂಡಿಯನ್ಸ್: 7 (4 ವಿದೇಶಿ); ಡೆಲ್ಲಿ ಕ್ಯಾಪಿಟಲ್ಸ್: 6 (2 ವಿದೇಶಿ); ಕೆಕೆಆರ್: 8 (2 ವಿದೇಶಿ); ಸನ್‌ರೈಸರ್ಸ್‌: 3 (1 ವಿದೇಶಿ).

ಈ ಬಾರಿ ಭಾರತದಲ್ಲೇ ಐಪಿಎಲ್?
ಈ ವರ್ಷ ಐಪಿಎಲ್ ಟೂರ್ನಿ ನಡೆಯುವ ತಾಣ ಇನ್ನೂ ಅಂತಿಮಗೊಂಡಿಲ್ಲ. ಆದರೆ, ಕರೊನಾ ಹಾವಳಿಯ ನಡುವೆ ಟೂರ್ನಿಯನ್ನು ಈ ಬಾರಿ ಭಾರತದಲ್ಲೇ ಆಯೋಜಿಸಲು ಆದ್ಯತೆ ನೀಡಲಾಗುವುದು ಎಂದು ಬಿಸಿಸಿಐ ಅಧ್ಯಕ್ಷ ಸೌರವ್ ಗಂಗೂಲಿ ಹೇಳುತ್ತ ಬಂದಿದ್ದಾರೆ. ಹೀಗಾಗಿ ಇಂಗ್ಲೆಂಡ್ ವಿರುದ್ಧದ ದ್ವಿಪಕ್ಷೀಯ ಕ್ರಿಕೆಟ್ ಸರಣಿ ಸರಾಗವಾಗಿ ನಡೆದರೆ, ಐಪಿಎಲ್ ಟೂರ್ನಿಯನ್ನು ಈ ಬಾರಿ ಸ್ಥಳಾಂತರ ಮಾಡಲು ಯಾವುದೂ ಸಕಾರಣ ಲಭಿಸುವುದಿಲ್ಲ. ಟೂರ್ನಿ ಭಾರತದಲ್ಲಿ ನಡೆಯುವುದೇ ಅಥವಾ ವಿದೇಶದಲ್ಲಿ ನಡೆಯುವುದೇ ಎಂಬುದು ಕೂಡ ತಂಡಗಳಿಗೆ ಹರಾಜಿನಲ್ಲಿ ಹೊಸ ಆಟಗಾರರ ಖರೀದಿಯ ಕಾರ್ಯತಂತ್ರ ರೂಪಿಸಲು ಪ್ರಮುಖವೆನಿಸಲಿದೆ. ಕಳೆದ ವರ್ಷ ಭಾರತದಲ್ಲಿ ನಡೆಯಬೇಕಿದ್ದ ಐಪಿಎಲ್, 6 ತಿಂಗಳು ತಡವಾಗಿ ಸೆಪ್ಟೆಂಬರ್-ನವೆಂಬರ್‌ನಲ್ಲಿ ಯುಎಇಯಲ್ಲಿ ನಡೆದಿತ್ತು.

ಹರಾಜಿಗೆ ಹಾಜರಾಗುವವರ 2 ನೆಗೆಟಿವ್ ವರದಿ ಕಡ್ಡಾಯ
ಐಪಿಎಲ್ ಹರಾಜು ಪ್ರಕ್ರಿಯೆಗೆ ಹಾಜರಾಗುವ ಫ್ರಾಂಚೈಸಿಗಳ ಮಾಲೀಕರು ಮತ್ತು ಇತರ ಪ್ರತಿನಿಧಿಗಳಿಗೆ ಕ್ವಾರಂಟೈನ್ ಇರುವುದಿಲ್ಲ. ಆದರೆ 72 ಗಂಟೆಗಳ ಮುನ್ನ ಕೋವಿಡ್-19 ಪರೀಕ್ಷೆಗೆ ಒಳಗಾದ 2 ನೆಗೆಟಿವ್ ವರದಿಗಳನ್ನು ಅವರು ಹೊಂದಿರುವುದು ಕಡ್ಡಾಯಗೊಳಿಸಲಾಗಿದೆ. ಚೆನ್ನೈನ ಗ್ರಾಂಡ್ ಚೋಲಾ ಹೋಟೆಲ್‌ಗೆ ಆಮಿಸಿದಂದು ಮತ್ತು ಹರಾಜಿನ ದಿನ ಈ ಪರೀಕ್ಷೆಗೆ ಒಳಗಾಗಬೇಕಿದೆ. ಫ್ರಾಂಚೈಸಿಯೊಂದರಿಂದ ಗರಿಷ್ಠ 13 ಸದಸ್ಯರು ಹರಾಜಿಗೆ ಹಾಜರಾಗಲು ಅವಕಾಶವಿದ್ದು, ಈ ಪೈಕಿ 8 ಸದಸ್ಯರಷ್ಟೇ ಹರಾಜು ಟೇಬಲ್‌ನಲ್ಲಿ ಕುಳಿತುಕೊಳ್ಳಬಹುದಾಗಿದೆ.

ಹಸೆಮಣೆಗೇರಿದ ಟೀಮ್ ಇಂಡಿಯಾ ಆಲ್ರೌಂಡರ್ ವಿಜಯ್ ಶಂಕರ್

ಕ್ರಿಕೆಟಿಗ ಸಿರಾಜ್‌ಗೆ ಆಸೀಸ್ ಪ್ರವಾಸದ ಯಶಸ್ಸಿಗೆ ಸ್ಫೂರ್ತಿ ತುಂಬಿದ್ದ ಭಾವಿ ಪತ್ನಿ!