ಲಾಕ್​ಡೌನ್​ನಲ್ಲಿ ಕ್ರಿಕೆಟ್​ ಆಡುವುದೇ ಮರೆತುಹೋಗುತ್ತೆ ಎಂದು ಹೆದರಿದ್ದ ಕೆಎಲ್​ ರಾಹುಲ್​!

ಬೆಂಗಳೂರು: ಕರೊನಾ ಹಾವಳಿಯಿಂದಾಗಿ ಕ್ರಿಕೆಟ್​ನಿಂದ ಸಂಪೂರ್ಣ ದೂರವಾಗಿದ್ದ ಕ್ರಿಕೆಟಿಗರು ಇದೀಗ, ಯುಎಇಯಲ್ಲಿ ಐಪಿಎಲ್​ ಟೂರ್ನಿ ಆಡುವುದಕ್ಕೆ ಪೂರ್ವಭಾವಿಯಾಗಿ ಅಭ್ಯಾಸಕ್ಕೆ ಮರಳುತ್ತಿದ್ದಾರೆ. ಐಪಿಎಲ್​ನಲ್ಲಿ ಕಿಂಗ್ಸ್​ ಇಲೆವೆನ್​ ಪಂಜಾಬ್​ ತಂಡವನ್ನು ಮುನ್ನಡೆಸಲು ಸಜ್ಜಾಗುತ್ತಿರುವ ಕನ್ನಡಿಗ ಕೆಎಲ್​ ರಾಹುಲ್​, ಮರಳಿ ಕ್ರಿಕೆಟ್​ ಮೈದಾನಕ್ಕಿಳಿದ ಬಗ್ಗೆ ಸಂಭ್ರಮ ವ್ಯಕ್ತಪಡಿಸಿದ್ದಾರೆ. ಜತೆಗೆ ಲಾಕ್​ಡೌನ್​ ಸಮಯದಲ್ಲಿ ತಮಗೆ ಕ್ರಿಕೆಟ್​ ಆಟವೇ ಮರೆತುಹೋಗುತ್ತದೆ ಎಂದು ಭಯಪಟ್ಟ ಬಗ್ಗೆ ಹೇಳಿಕೊಂಡಿದ್ದಾರೆ.

'ಲಾಕ್​ಡೌನ್​ ವೇಳೆ ನಾನು ಸಾಕಷ್ಟು ಹೆದರಿದ್ದೆ. ಮತ್ತೆ ಕ್ರಿಕೆಟ್​ ಮೈದಾನಕ್ಕೆ ಇಳಿದಾಗ ನನ್ನ ಕ್ರಿಕೆಟ್​ ಕೌಶಲ ಹಾಗೆಯೇ ಇರಬಹುದೇ ಎಂದು ಆತಂಕಪಟ್ಟಿದ್ದೆ. ನಾನು ದುಃಸ್ವಪ್ನಗಳನ್ನು ಕಂಡಿದ್ದೆ. ಕೆಲವೊಮ್ಮೆ ಮಧ್ಯರಾತ್ರಿಯ ವೇಳೆ ಎದ್ದುಕುಳಿತಿದ್ದೆ. ಯಾಕೆಂದರೆ ಮೈದಾನಕ್ಕಿಳಿದು ಲೈನ್​ ಮತ್ತು ಲೆಂತ್​ ಎಸೆತಗಳನ್ನು ಎದುರಿಸುವುದೇ ಮರೆತುಹೋದಂತೆ ಕನಸು ಬೀಳುತ್ತಿತ್ತು. ಅದು ನನಗೆ ಭಯ ಹುಟ್ಟಿಸಿತ್ತು. ಪ್ರಾಮಾಣಿಕವಾಗಿ ಹೇಳಬೇಕೆಂದರೆ ಅಭ್ಯಾಸಕ್ಕೆ ಮರಳಿದ ಮೊದಲ ದಿನ ಸಾಕಷ್ಟು ಪರದಾಡಬೇಕಾಯಿತು. ಯಾಕೆಂದರೆ ದೇಹ ಸಾಕಷ್ಟು ಜಡವಾಗಿತ್ತು' ಎಂದು ಕೆಎಲ್​ ರಾಹುಲ್​ ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ದಾರೆ.

'5 ತಿಂಗಳ ಕಾಲ ಟ್ರೆಡ್​ಮಿಲ್​ನಲ್ಲಷ್ಟೇ ದೇಹಕ್ಕೆ ವ್ಯಾಯಾಮ ಸಿಗುತ್ತಿತ್ತು. ಮತ್ತೆ ಮೈದಾನಕ್ಕೆ ಇಳಿದಾಗ ಮೋಡದ ನಡುವೆ ನಡೆಯುವಂತಾಗಿತ್ತು. ಆ ಅನುಭವವನ್ನು ವಿವರಿಸುವುದು ಕಷ್ಟ. ಕಣ್ಣುಗಳು ತುಂಬಿದ್ದವು. ಮುಖದಲ್ಲಿ ನಗು ಮೂಡುತ್ತಿತ್ತು. ಮತ್ತೆ ಮೈದಾನಕ್ಕಿಳಿದು ಓಡುವುದು ಸಾಕಷ್ಟು ಉತ್ತಮವೆನಿಸುತ್ತಿತ್ತು' ಎಂದು ರಾಹುಲ್ ವಿವರಿಸಿದ್ದಾರೆ.

ಇದನ್ನೂ ಓದಿ:  ಸ್ಮಿತ್​ ಗೈರಿನಲ್ಲಿ ರಾಜಸ್ಥಾನ ರಾಯಲ್ಸ್​ಗೆ ಉನಾದ್ಕತ್​ ಹಂಗಾಮಿ ನಾಯಕ?

ಲಾಕ್​ಡೌನ್​ ಸಮಯದಲ್ಲಿ ಹೆಚ್ಚಿನ ಕ್ರೀಡಾಪಟುಗಳು ಮನೆಯಲ್ಲೇ ಬಂಧಿಯಾಗಿದ್ದರು. ಈ ವೇಳೆ ಜೀವನ ಮತ್ತು ವೃತ್ತಿಜೀವನದ ಬಗ್ಗೆ ಸಾಕಷ್ಟು ಪಾಠಗಳನ್ನು ಕಲಿತುಕೊಂಡೆ ಎಂದು 28 ವರ್ಷದ ರಾಹುಲ್​ ಹೇಳಿದ್ದಾರೆ. 'ಸಾಕಷ್ಟು ವಿಷಯಗಳಿಗೆ ನಾವು ಋಣಿಯಾಗಿರಬೇಕು ಎಂಬುದನ್ನು ತಿಳಿದುಕೊಂಡೆ. ಹೆಚ್ಚಿನ ತಾಳ್ಮೆಯನ್ನೂ ಕಲಿತುಕೊಂಡಿದ್ದೇನೆ. ಕುಟುಂಬದ ಜತೆಗೆ ಹೆಚ್ಚಿನ ಸಮಯವನ್ನೂ ಕಳೆದೆ. ಜೂನಿಯರ್​ ಕ್ರಿಕೆಟ್​ ಪ್ರವೇಶಿಸಿದ ದಿನಗಳಿಂದಲೂ ಇಷ್ಟೊಂದು ಬಿಡುವಿನ ಸಮಯ ನನಗೆ ದೊರೆತಿರಲಿಲ್ಲ. ಇದೇ ವೇಳೆ ಕೆಲ ಜನರಿಗೆ ನೆರವು ಒದಗಿಸುವ ಅವಕಾಶವೂ ನನಗೆ ಲಭಿಸಿತು. ನಾನು ಅಡುಗೆ ಮಾಡುವುದನ್ನೂ ಕಲಿತುಕೊಂಡೆ' ಎಂದು ರಾಹುಲ್​ ಹೇಳಿದ್ದಾರೆ.

ಐಪಿಎಲ್​ ಟೂರ್ನಿಯಲ್ಲಿ ಕನ್ನಡಿಗರೇ ಆದ ತಂಡದ ಕೋಚ್​ ಅನಿಲ್​ ಕುಂಬ್ಳೆ ಅವರೊಂದಿಗೆ ಕಾರ್ಯನಿರ್ವಹಿಸುವುದನ್ನು ಎದುರುನೋಡುತ್ತಿದ್ದೇನೆ ಎಂದಿರುವ ರಾಹುಲ್​, ಅವರು ಜೂನಿಯರ್​ ದಿನಗಳಿಂದಲೂ ನನ್ನನ್ನು ನೋಡಿದ್ದಾರೆ. ಅವರು ಅಪಾರವಾದ ಅನುಭವವನ್ನು ಹೊಂದಿದ್ದಾರೆ. ಅವರ ಅನುಭವ ನನ್ನ ನಾಯಕತ್ವಕ್ಕೆ ಸಾಕಷ್ಟು ನೆರವಾಗಲಿದೆ ಎಂದು ಹೇಳಿದ್ದಾರೆ.

https://www.vijayavani.net/kl-rahuls-comment-on-athiya-shettys-swimwear-pic/