ಬೆಂಗಳೂರು: ಕ್ರಿಕೆಟಿಗ ಕೆಎಲ್ ರಾಹುಲ್ ಮತ್ತು ಬಾಲಿವುಡ್ ನಟಿ ಅಥಿಯಾ ಶೆಟ್ಟಿ ನಡುವಿನ ಡೇಟಿಂಗ್ ಗುಸುಗುಸು ಸುದ್ದಿ ಹೊಸದಲ್ಲ. ಮಂಗಳೂರು ಮೂಲದ ನಟ ಸುನೀಲ್ ಶೆಟ್ಟಿ ಅವರ ಪುತ್ರಿಯೂ ಆಗಿರುವ ಅಥಿಯಾ ಶೆಟ್ಟಿ ಇನ್ಸ್ಟಾಗ್ರಾಂನಲ್ಲಿ ಹಾಕಿರುವ ಪೋಸ್ಟ್ಗೆ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ನಾಯಕ ಕೆಎಲ್ ರಾಹುಲ್ ಅವರ ಕಮೆಂಟ್ ಈ ಬಗ್ಗೆ ಇನ್ನಷ್ಟು ಪುಷ್ಠಿ ನೀಡಿದೆ. ಜತೆಗೆ ಅಭಿಮಾನಿಗಳು ಕೂಡ ಈ ಕಮೆಂಟ್ಗೆ ದಂಗಾಗಿದ್ದಾರೆ.
ಈಜುಡುಪು ಧರಿಸಿ ಕನ್ನಡಿ ಮುಂದೆ ಸೆಲ್ಫಿ ಕ್ಲಿಕ್ಕಿಸಿಕೊಳ್ಳುತ್ತಿರುವ ಚಿತ್ರವನ್ನು ಅಥಿಯಾ ಶೆಟ್ಟಿ ಬುಧವಾರ ಇನ್ಸ್ಟಾಗ್ರಾಂನಲ್ಲಿ ಪ್ರಕಟಿಸಿದ್ದಾರೆ. ಇದಕ್ಕೆ ಯಾವುದೇ ಅಡಿಬರಹವನ್ನೂ ಅವರು ಹಾಕಿಲ್ಲ. ಅದರ ಬೆನ್ನಲ್ಲೇ ಕೆಎಲ್ ರಾಹುಲ್ ಚಿತ್ರಕ್ಕೆ ಕಮೆಂಟ್ ಹಾಕಿದ್ದು, ಹೃದಯದ ಇಮೋಜಿ ಜತೆಗೆ ‘ಜೆಫಾ’ ಎಂದು ಬರೆದುಕೊಂಡಿದ್ದಾರೆ. ಇದೊಂದು ಸ್ಪ್ಯಾನಿಷ್ ಪದವಾಗಿದ್ದು, ಇದರ ಅರ್ಥ ‘ಬಾಸ್’ ಎಂದಾಗಿದೆ. ರಾಹುಲ್ ಅವರ ಈ ಕಮೆಂಟ್ನ ಅರ್ಥವೇನೆಂದು ಈಗ ಅಭಿಮಾನಿಗಳ ನಡುವೆ ದೊಡ್ಡ ಚರ್ಚೆಯೇ ಶುರುವಾಗಿದೆ.
ಸಾಮಾಜಿಕ ಜಾಲತಾಣಗಳಲ್ಲೇ ಇವರಿಬ್ಬರು ತಮ್ಮ ಡೇಟಿಂಗ್ ಬಗ್ಗೆ ಸುಳಿವು ಬಿಟ್ಟುಕೊಡುತ್ತಿರುವುದು ಇದೇ ಮೊದಲಲ್ಲ. ಈ ಮುನ್ನ ಕೆಎಲ್ ರಾಹುಲ್ ಅವರ 28ನೇ ಜನ್ಮದಿನದಂದು ಅಥಿಯಾ ಶೆಟ್ಟಿ ಅವರು, ‘ಮೈ ಪರ್ಸನ್’ ಎಂಬ ಬರಹದೊಂದಿಗೆ ಇನ್ಸ್ಟಾಗ್ರಾಂನಲ್ಲಿ ಕೆಎಲ್ ರಾಹುಲ್ಗೆ ಶುಭಹಾರೈಸಿದ್ದರು. ಅದಕ್ಕೆ ಮುನ್ನ ಕೆಎಲ್ ರಾಹುಲ್ ಅವರು ಅಥಿಯಾ ಶೆಟ್ಟಿ ಜತೆಗೆ ಫೋನ್ ಬೂತ್ನಲ್ಲಿರುವ ಚಿತ್ರವನ್ನು ಪ್ರಕಟಿಸಿ, ಸುನೀಲ್ ಶೆಟ್ಟಿ ಅವರ ‘ಹೇರಾ ಫೇರಿ’ ಸಿನಿಮಾದ ಜನಪ್ರಿಯ ಸಂಭಾಷಣೆಯ ಉಲ್ಲೇಖವಾಗಿ, ‘ಹೆಲೋ, ದೇವಿ ಪ್ರಸಾದ್?’ ಎಂದು ಬರೆದುಕೊಂಡಿದ್ದರು. ಈ ಚಿತ್ರಕ್ಕೆ ಸುನೀಲ್ ಶೆಟ್ಟಿ ಕೂಡ ನಗುವಿನ ಇಮೋಜಿಯೊಂದಿಗೆ ಪ್ರತಿಕ್ರಿಯಿಸಿದ್ದರು.
ಇದನ್ನೂ ಓದಿ: ಇನ್ನು ಬಿಕಿನಿ ಚಿತ್ರ ಪೋಸ್ಟ್ ಮಾಡುವುದಿಲ್ಲ ಎಂದು ಟೆನಿಸ್ ತಾರೆ ಬೌಚಾರ್ಡ್ ಹೇಳಿದ್ಯಾಕೆ?
ಮಂಗಳೂರು ಮೂಲದ ಕ್ರಿಕೆಟಿಗ ಕೆಎಲ್ ರಾಹುಲ್ ಮುಂಬರುವ ಐಪಿಎಲ್ ಟೂರ್ನಿಯಲ್ಲಿ ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡವನ್ನು ಮುನ್ನಡೆಸಲಿದ್ದು, ಈಗಾಗಲೆ ಬೆಂಗಳೂರಿನಲ್ಲಿ ಕೋಚ್ ಅನಿಲ್ ಕುಂಬ್ಳೆ ಮಾರ್ಗದರ್ಶನದಲ್ಲಿ ಅಭ್ಯಾಸವನ್ನೂ ಆರಂಭಿಸಿದ್ದಾರೆ. ಎಂಎಸ್ ಧೋನಿ ನಿವೃತ್ತಿ ನಂತರದಲ್ಲಿ ಕೆಎಲ್ ರಾಹುಲ್ ಸೀಮಿತ ಓವರ್ ಕ್ರಿಕೆಟ್ ಪ್ರಕಾರದಲ್ಲಿ ಇನ್ನು ಭಾರತ ತಂಡದ ವಿಕೆಟ್ ಕೀಪರ್-ಬ್ಯಾಟ್ಸ್ಮನ್ ಆಗಿ ಹೆಚ್ಚಿನ ಸಮಯ ಮುಂದುವರಿಯುವ ನಿರೀಕ್ಷೆಯೂ ಹರಡಿದೆ.