ಡ್ರೈವರ್‌ಗೆ ಕರೊನಾ ಬಂದರೂ ಎಫ್​1 ರೇಸ್ ನಿಲ್ಲಲ್ಲ!

ಲಂಡನ್: ಫಾರ್ಮುಲಾ ಒನ್ ಹೊಸ ಋತುವಿನ ಆರಂಭದಲ್ಲೇ ಕರೊನಾ ಹಾವಳಿ ಶುರುವಾದ ಕಾರಣ ಇದುವರೆಗೆ ಒಂದೂ ರೇಸ್ ನಡೆದಿಲ್ಲ. ಆದರೆ ಜುಲೈ 5ರಿಂದ ಈ ವರ್ಷ ಒಟ್ಟು 8 ಗ್ರಾೃನ್ ಪ್ರಿಗಳನ್ನು ಸಂಘಟಿಸಲು ಎಫ್​1 ಸಂಘಟಕರು ಮುಂದಾಗಿದ್ದಾರೆ. ಇದರ ನಡುವೆ, ಚಾಲಕನೊಬ್ಬನಿಗೆ ಕರೊನಾ ಬಂದರೆ ಅಥವಾ ತಂಡವೊಂದು ಹಿಂದೆ ಸರಿದರೂ ಎಫ್​1 ರೇಸ್ ರದ್ದುಗೊಳ್ಳುವುದಿಲ್ಲ ಎಂದು ಎಫ್​1 ಸಿಇಒ ಚೇಸ್ ಕ್ಯಾರಿ ಸ್ಪಷ್ಟಪಡಿಸಿದ್ದಾರೆ.

ಇದನ್ನೂ ಓದಿ: ಬೈಕ್, ಕಾರು ಪ್ರಿಯ ಧೋನಿ ಟ್ರ್ಯಾಕ್ಟರ್ ಕೊಂಡಿದ್ದು ಏಕೆ..?

ಕಳೆದ ಮಾರ್ಚ್‌ನಲ್ಲಿ ಆಸ್ಟ್ರೇಲಿಯನ್ ಜಿಪಿಯೊಂದಿಗೆ ಎಫ್​1 ರೇಸ್ ಋತು ಆರಂಭವಾಗಬೇಕಾಗಿತ್ತು. ಆದರೆ ಸಿಬ್ಬಂದಿಯೊಬ್ಬನಿಗೆ ಕರೊನಾ ಸೋಂಕು ದೃಢಪಟ್ಟ ಕಾರಣ ಮೆಕ್‌ಲಾರೆನ್ ತಂಡ ಕೂಟದಿಂದ ಹಿಂದೆ ಸರಿದುದರಿಂದ ಕೊನೇಕ್ಷಣದಲ್ಲಿ ರೇಸ್ ರದ್ದುಗೊಂಡಿತ್ತು. ಆದರೆ ಮುಂದೆ ಹೀಗಾಗುವುದಿಲ್ಲ ಎಂದು ಅವರು ಹೇಳಿದ್ದಾರೆ. ಜುಲೈ 5 ಮತ್ತು 12ರಂದು ಆಸ್ಟ್ರಿಯಾದಲ್ಲಿ ನಡೆಯುವ 2 ರೇಸ್‌ನೊಂದಿಗೆ ಎಫ್​1 ಋತು ಆರಂಭವಾಗಲಿದ್ದು, ಬಳಿಕ ಹಂಗೆರಿ (ಜು.19), ಬ್ರಿಟನ್ (ಆ.2, ಆ. 9), ಸ್ಪೇನ್ (ಆ. 14), ಬೆಲ್ಜಿಯಂ (ಆ. 28) ಮತ್ತು ಇಟಲಿಯಲ್ಲಿ (ಸೆ. 6) ರೇಸ್‌ಗಳು ನಿಗದಿಯಾಗಿವೆ.

ಇದನ್ನೂ ಓದಿ: ಅಂದು ಸ್ಪೋರ್ಟ್ಸ್ ಸ್ಟಾರ್ಸ್‌..ಇಂದು ಕೋವಿಡ್ ವಾರಿಯರ್ಸ್‌..

‘ತಂಡವೊಂದಕ್ಕೆ ಸ್ಪರ್ಧೆಯಲ್ಲಿ ಪಾಲ್ಗೊಳ್ಳಲು ಸಾಧ್ಯವಾಗದಿದ್ದರೂ ರೇಸ್ ಸ್ಥಗಿತಗೊಳ್ಳುವುದಿಲ್ಲ. ಕರೊನಾ ಸೋಂಕಿನಿಂದ ಇನ್ನು ರೇಸ್ ನಿಲ್ಲುವುದಿಲ್ಲ. ಚಾಲಕನೊಬ್ಬನಿಗೆ ಕರೊನಾ ದೃಢಪಟ್ಟರೆ, ಮೀಸಲು ಚಾಲಕ ಕಣಕ್ಕಿಳಿಯಬಹುದು’ ಎಂದು ಕ್ಯಾರಿ ಎಫ್​1 ವೆಬ್‌ಸೈಟ್‌ನಲ್ಲಿ ತಿಳಿಸಿದ್ದಾರೆ. ಮೊದಲ ಪ್ರತಿ ತಂಡದ ಸದಸ್ಯರನ್ನೂ ಕರೊನಾ ಪರೀಕ್ಷೆಗೆ ಒಳಪಡಿಸಲಾಗುವುದು. ಬಳಿಕ ಪ್ರತಿ 2 ದಿನಕ್ಕೊಮ್ಮೆ ಪರೀಕ್ಷೆ ನಡೆಯಲಿದೆ. ನಮ್ಮ ಕ್ರೀಡೆಯಲ್ಲಿ ವ್ಯಕ್ತಿಗಳ ನಡುವೆ 2 ಮೀಟರ್ ಅಂತರ ಕಾಯ್ದುಕೊಳ್ಳಲು ಸಾಧ್ಯವಾಗದು. ಪಿಟ್‌ಗೆ ಮರಳಿದ ಕಾರಿನ 4 ಚಕ್ರಗಳನ್ನು ಬದಲಾಯಿಸುವಾಗ ಅಂತರ ಕಾಯ್ದುಕೊಂಡು ಕೆಲಸ ಮಾಡಲಾಗದು. ಈ ಅಪಾಯಗಳನ್ನು ಎದುರಿಸಿ ನಿಲ್ಲುವುದೇ ನಮಗಿರುವ ಮಾರ್ಗ ಎಂದು ಚೇಸ್ ಕ್ಯಾರಿ ವಿವರಿಸಿದ್ದಾರೆ. ಮೂಲ ವೇಳಾಪಟ್ಟಿಯ ಪ್ರಕಾರ ಈ ವರ್ಷ ಒಟ್ಟು 22 ಎಫ್​1 ರೇಸ್‌ಗಳು ನಡೆಯಬೇಕಾಗಿದ್ದವು.

https://www.vijayavani.net/wasim-akram-refuses-to-add-a-year-to-his-age/