ಅನುಷ್ಕಾ ಸೇನ್ ಹಾಗೂ ಎಂಎಸ್ ಧೋನಿ ಇಬ್ಬರೂ ಜಾಹೀರಾತು ಜಗತ್ತಿನಲ್ಲಿ ಒಂದಾಗಿ ಹಲವು ವರ್ಷ ಕೆಲಸ ಮಾಡಿದ್ದಾರೆ. ಇಬ್ಬರಿಗೂ ಸಾಮಾಜಿಕ ಜಾಲತಾಣಗಳಲ್ಲಿ ಕೋಟ್ಯಂತರ ಅಭಿಮಾನಿಗಳಿದ್ದಾರೆ. ಸುಮಾರು 7 ವರ್ಷಗಳ ಕಾಲ ವಿವಿಧ 21 ಪ್ರಸಿದ್ಧ ಬ್ರ್ಯಾಂಡ್‌ಗಳ ಜಾಹೀರಾತುಗಳಲ್ಲಿ ಇವರಿಬ್ಬರೂ ಒಂದಾಗಿ ಕಾಣಿಸಿಕೊಂಡಿದ್ದಾರೆ. ಬೇವರಿಜ್ ಕಂಪನಿಗಳಿಂದ ಹಿಡಿದು ಶೂಟಿಂಗ್ ಸೆಟ್‌ಗಳವರೆಗೆ ಇಬ್ಬರ ನಡುವೆ ಬೆಳೆದ ಬಾಂಧವ್ಯವು ಕೇವಲ ವೃತ್ತಿಪರ ಸಹೋದ್ಯೋಗಿಗಳ ಸಂಬಂಧವಾಗಿ ಉಳಿಯದೆ, ಒಂದೇ ಊರಿನವರು ಎಂಬ ಕಾರಣಕ್ಕೆ ಅತ್ಯಂತ ಆತ್ಮೀಯ ಹಾಗೂ ಕುಟುಂಬದ ಸದಸ್ಯರಂತಾಗುವ ಹಂತಕ್ಕೆ ತಲುಪಿದೆ.
ತಮ್ಮ ಮೊದಲ ಭೇಟಿಯ ನೆನಪನ್ನು ಮೆಲುಕು ಹಾಕಿದ ಅನುಷ್ಕಾ ಸೇನ್, "ನಾನು ಧೋನಿ ಅವರನ್ನು ಮೊದಲು ಭೇಟಿಯಾದಾಗ ನನಗೆ ಸುಮಾರು 14 ವರ್ಷ. ತೀರಾ ಚಿಕ್ಕವಳಾಗಿದ್ದ ನಾನು ಮೇಕಪ್ ರೂಮ್‌ಗೆ ಹೋದ ತಕ್ಷಣ ನೇರವಾಗಿ ಧೋನಿ ಅವರ ಬಳಿ ಹೋಗಿ, 'ನೀವು ರಾಂಚಿಯವರಲ್ವೇ? ನಾನು ಕೂಡ ರಾಂಚಿಯವಳೇ!' ಎಂದು ಹೆಮ್ಮೆಯಿಂದ ಹೇಳಿದೆ. ನನ್ನ ಮಾತು ಕೇಳಿ ಧೋನಿ ಮುಖದಲ್ಲಿ ದೊಡ್ಡ ಮಂದಹಾಸ ಮೂಡಿತು. 'ಹೌದಾ? ನಿಜವಾಗಲೂ ನೀನು ರಾಂಚಿಯವಳಾ?' ಎಂದು ಅತ್ಯಂತ ಆತ್ಮೀ ಯತೆಯಿಂದ ಕೇಳಿದರು. ಆ ಕ್ಷಣದಿಂದಲೇ ನಮ್ಮಿಬ್ಬರ ನಡುವೆ ಸ್ನೇಹದ ಸೇತುವೆ ನಿರ್ಮಾಣವಾಯಿತು" ಎಂದು ಹೇಳಿಕೊಂಡಿದ್ದಾರೆ.
ಮೊದಲ ಭೇಟಿಯ ನಂತರದ ದಿನಗಳಲ್ಲಿ ಶೂಟಿಂಗ್ ಸ್ಪಾಟ್‌ನಲ್ಲಿ ಇಬ್ಬರ ಬಾಂಧವ್ಯ ಇನ್ನಷ್ಟು ಗಟ್ಟಿಯಾಯಿತು. "ನಮ್ಮ ಸಂಬಂಧ ಎಂದಿಗೂ ಇಬ್ಬರು ನಟ-ನಟಿಯರ ಸಂಬಂಧವಾಗಿರಲಿಲ್ಲ. ಧೋನಿ ಸೆಟ್‌ಗೆ ಬಂದ ತಕ್ಷಣ ನನ್ನನ್ನು ಪ್ರೀತಿಯಿಂದ 'ಚಿಕ್ಕಿ!' ಎಂದು ಕರೆಯುತ್ತಿದ್ದರು. ನಾನು ತಕ್ಷಣ 'ಚಾಚು!' ಎಂದು ಓಡಿ ಹೋಗುತ್ತಿದ್ದೆ. ಧೋನಿ ಅವರ ಸರಳತೆ ಹಾಗೂ ಪ್ರೀತಿಯ ಸ್ವಭಾವದಿಂದಾಗಿ ನಾವಿಬ್ಬರೂ ಸತತ 7 ವರ್ಷಗಳ ಕಾಲ 21 ಜಾಹೀರಾತುಗಳಲ್ಲಿ ಅತ್ಯಂತ ಖುಷಿಯಿಂದ ಅಭಿನಯಿಸಲು ಸಾಧ್ಯವಾಯಿತು" ಎಂದು ಅನುಷ್ಕಾ ತಮ್ಮ ನಡುವಿನ ಸುಂದರ ಬಾಂಧವ್ಯದ ಗುಟ್ಟನ್ನು ಬಿಚ್ಚಿಟ್ಟಿದ್ದಾರೆ.
