ಕ್ರಿಕೆಟ್​ ಪ್ರೇಮಿಗಳೇ ಗಮನಿಸಿ; ಮಾರ್ಚ್​ 29ರಂದು ಐಪಿಎಲ್​ ನಡೆಯಲ್ಲ

ನವದೆಹಲಿ: ಕರೊನಾ ವೈರಸ್​ನಿಂದಾಗಿ ತತ್ತರಿಸಿರುವ ದೇಶದಲ್ಲಿ ಸಾರ್ವಜನಿಕ ಸಭೆ ಸಮಾರಂಭಗಳಿಗೆ ಬ್ರೇಕ್​ ನೀಡಲಾಗಿದೆ. ಹೊರ ದೇಶದಿಂದ ಬರುವವರಿಗೂ ಸಹ ವೀಸಾ ರದ್ದು ಮಾಡಲಾಗಿದೆ. ಹೀಗಿರುವಾಗ ಪ್ರಸಿದ್ಧ ಐಪಿಎಲ್​ ಪಂದ್ಯಾವಳಿ ನಡೆಯುತ್ತದೆಯೋ ಇಲ್ಲವೋ ಎನ್ನುವುದು ದೊಡ್ಡ ಚರ್ಚೆಯಾಗಿತ್ತು. ಇದೀಗ ಐಪಿಎಲ್​ ಪಂದ್ಯಾವಳಿಯನ್ನು ಮುಂದೂಡಲಾಗಿರುವುದಾಗಿ ಮಾಹಿತಿ ಲಭಿಸಿದೆ.

ನಿಗದಿಯಾಗಿರುವ ಪ್ರಕಾರ ಇದೇ ತಿಂಗಳ 29ನೇ ತಾರೀಖಿನಿಂದ ಐಪಿಎಲ್​ ಆರಂಭವಾಗಬೇಕಿತ್ತು. ಆದರೆ ವಿದೇಶಿ ಆಟಗಾರರಿಲ್ಲದೆ ಪಂದ್ಯ ನಡೆಸಬೇಕು ಎಂದು ಹೇಳಲಾಗಿತ್ತು. ಹಾಗೆಯೇ ಪಂದ್ಯವನ್ನು ಕೇವಲ ಟಿವಿಗಳಲ್ಲಿ ಮಾತ್ರ ವೀಕ್ಷಿಸುವುದಕ್ಕೆ ಅವಕಾಶ ಮಾಡಿಕೊಡಲಾಗುವುದು ಎನ್ನಲಾಗಿತ್ತು. ಆದರೆ ಇದೀಗ ಬಿಸಿಸಿಐ ಅಧಿಕಾರಿಗಳು ಪಂದ್ಯಾವಳಿಯನ್ನು ಏಪ್ರಿಲ್​ 15ಕ್ಕೆ ಮುಂದೂಡಿರುವುದಾಗಿ ತಿಳಿಸಿದ್ದಾರೆ.

ಐಪಿಎಲ್​ ಪಂದ್ಯಾವಳಿಯನ್ನು ಏಪ್ರಿಲ್​ 15ಕ್ಕೆ ಮುಂದೂಡಲು ಬಿಸಿಸಿಐ ಆಂತರಿಕ ನಿರ್ಧಾರ ತೆಗೆದುಕೊಂಡಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.

ಈ ವಿಚಾರವಾಗಿ ಬಿಸಿಸಿಐ ಅಧಿಕಾರಿಗಳು ಐಪಿಎಲ್​ ತಂಡಗಳ ಮಾಲೀಕರನ್ನು ಶನಿವಾರದಂದು ಭೇಟಿ ಮಾಡಿ ಚರ್ಚಿಸಲಿದ್ದಾರೆ. ಟಿವಿಯಲ್ಲಿ ಮಾತ್ರ ಐಪಿಎಲ್​ ವೀಕ್ಷಣೆಗೆ ಎಲ್ಲಾ ಫ್ರಾಂಚೈಸಿಗಳು ಒಪ್ಪಿಕೊಂಡಿವೆ ಆದರೆ ವಿದೇಶಿ ಆಟಗಾರರನ್ನು ಹೊರೆತುಪಡಿಸಿ ಆಡುವುದಕ್ಕೆ ಒಪ್ಪಿಕೊಂಡಿಲ್ಲ. ಪ್ರತಿ ತಂಡದಲ್ಲಿ ನಾಲ್ಕು ಜನ ವಿದೇಶಿ ಆಟಗಾರರು ಇದ್ದರೆ ಮಾತ್ರವೇ ಅದು ಐಪಿಎಲ್​ ಎನಿಸಿಕೊಳ್ಳುತ್ತದೆ ಎಂದು ಅವು ತಿಳಿಸಿವೆ.

ಏಪ್ರಿಲ್​ 15ರಿಂದ ಐಪಿಎಲ್​ ನಡೆಯಲಿದ್ದು, ಅದರಲ್ಲಿ ವೀದೇಶಿ ಆಟಗಾರರು ಆಡುತ್ತಾರೋ ಇಲ್ಲವೋ ಎನ್ನುವುದನ್ನು ಬಿಸಿಸಿಐ ತಿಳಿಸಬೇಕಿದೆ. ದೆಹಲಿಯಲ್ಲಿ ಐಪಿಎಲ್​ ಪಂದ್ಯವನ್ನು ನಿಷೇಧಿಸಲಾಗಿದ್ದು, ದೆಹಲಿ ಹೊರೆತಾಗಿ ಬೇರೆ ರಾಜ್ಯಗಳಲ್ಲಿ ಐಪಿಎಲ್​ ನಡೆಯಲಿದೆ. (ಏಜೆನ್ಸೀಸ್​)

https://www.vijayavani.net/ipl-2020-banned-due-to-coronavirus/

https://www.vijayavani.net/roadies-revolution-neha-dhupia-got-trolled/