ರೋಡೀಸ್​ ಶೋನಲ್ಲಿ ಹೆಣ್ಣಿಗೊಂದು ನ್ಯಾಯ ಗಂಡಿಗೊಂದು ನ್ಯಾಯ! ವೈರಲ್​ ಆಯ್ತು ಆಡಿಷನ್​ ವಿಡಿಯೋ

ನವದೆಹಲಿ: ರೋಡೀಸ್​ ರಿಯಾಲಿಟಿ ಶೋ ಯಾರಿಗೆ ತಾನೇ ಗೊತ್ತಿಲ್ಲ ಹೇಳಿ? ಪ್ರತಿ ವರ್ಷ ಒಂದಿಷ್ಟು ಸ್ಪರ್ಧಿಗಳನ್ನಿಟ್ಟುಕೊಂಡು ಅವರ ಕೈಲಿ ಸಾಹಸಮಯ ಟಾಸ್ಕ್​ಗಳನ್ನು ಮಾಡಿಸಿ ಮಾಸ್​ ಶೋ ಆಗಿ ಮಿಂಚುವ ರಿಯಾಲಿಟಿ ಶೋ ಅದು. ಅದರ ಆಡಿಷನ್​ ಕೂಡ ಅಷ್ಟೇ ಸಾಹಸಮಯವಾಗಿರುತ್ತದೆ. ಈ ಬಾರಿಯ ರೋಡೀಸ್​ ಶೋನ ಆಡಿಷನ್​ನಲ್ಲಿ ನಡೆದ ಸಣ್ಣ ಸನ್ನಿವೇಶವೊಂದು ಇದೀಗ ಸಖತ್​ ವೈರಲ್​ ಆಗಿದೆ.

ರೋಡೀಸ್​ನ ಆಡಿಷನ್​ನಲ್ಲಿ ಗ್ಯಾಂಗ್​ ಲೀಡರ್​ಗಳು ಕೇಳುವ ಪ್ರಶ್ನೆಗಳಿಗೆ ಸ್ಪರ್ಧಿಗಳು ಉತ್ತರಿಸಬೇಕು. ಅವರು ಹೇಳುವ ಟಾಸ್ಕ್​ನ್ನು ಮಾಡಿ ತೋರಿಸಬೇಕು. ಈ ಮೂಲಕ ಗ್ಯಾಂಗ್​ ಲೀಡರ್​ಗಳ ಮೆಚ್ಚುಗೆ ಪಡೆಯುವ ಸ್ಪರ್ಧಿ ಮಾತ್ರ ಸ್ಪರ್ಧೆಯಲ್ಲಿ ಮುಂದುವರೆಯುತ್ತಾನೆ. ಇಂತಹ ಆಡಿಷನ್​ನಲ್ಲಿ ಸ್ಪರ್ಧಿಯೊಬ್ಬ ತನ್ನ ಪ್ರೇಯಸಿಗೆ ಹೊಡೆದಿರುವ ವಿಚಾರವನ್ನು ಹೇಳಿಕೊಂಡಿದ್ದಾನೆ. ಆಕೆ ತನ್ನನ್ನು ಪ್ರೀತಿಸುತ್ತಿದ್ದಾಗಲೇ ನಾಲ್ವರು ಯುವಕರ ಜತೆ ಪ್ರೀತಿಯ ನಾಟಕವಾಡುತ್ತಿದ್ದುದ್ದರಿಂದ ಆಕೆಗೆ ಹೊಡೆದಿದ್ದಾಗಿ ತಿಳಿಸಿದ್ದಾನೆ.

ಈ ವಿಚಾರವನ್ನು ಗಂಭೀರವಾಗಿ ಪರಿಗಣಿಸಿದ ಗ್ಯಾಂಗ್​ ಲೀಡರ್​ ನೇಹಾ ಧೂಪಿಯಾ, ಯಾವುದೇ ಹೆಣ್ಣು ಎಷ್ಟೇ ಜನ ಯುವಕರೊಂದಿಗೆ ಆಟವಾಡುತ್ತಿದ್ದರೂ ಆಕೆಗೆ ಹೊಡೆಯುವ ಹಕ್ಕು ಯಾವ ಹುಡುಗನಿಗೂ ಇಲ್ಲ ಎಂದು ಆ ಸ್ಪರ್ಧಿಯನ್ನು ತರಾಟೆಗೆ ತೆಗೆದುಕೊಂಡಿದ್ದಾರೆ. ನಟಿ ಸ್ಪರ್ಧಿಯನ್ನು ಬೈಯುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಸಿಕ್ಕಾಪಟ್ಟೆ ವೈರಲ್​ ಆಗಿದೆ.

ಹಳೆಯ ಸೀಸನ್​ನ ಆಡಿಷನ್​ ಒಂದರಲ್ಲಿ ಹೆಣ್ಣೊಬ್ಬಳು ಹುಡುಗನಿಗೆ ಹೊಡೆದೆ ಎಂದಿದ್ದಕ್ಕೆ ಸಂತಸದಿಂದ ಭೇಷ್​ ಎಂದಿದ್ದ ಗ್ಯಾಂಗ್​ ಲೀಡರ್​ಗಳು, ಈ ಯುವಕನಿಗೆ ಈ ರೀತಿಯಲ್ಲಿ ಬೈದಿರುವುದುಕ್ಕೆ ನೆಟ್ಟಿಗರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಹೆಣ್ಣಿಗೊಂದು ನ್ಯಾಯ ಗಂಡಿಗೊಂದು ನ್ಯಾಯ. ಇದೇನಾ ನೀವು ಕೇಳುವ ಸಮಾನತೆ ಎಂದು ಪ್ರಶ್ನಿಸಲಾರಂಭಿಸಿದ್ದಾರೆ. (ಏಜೆನ್ಸೀಸ್​)

https://www.vijayavani.net/an-old-tweet-from-2013-re-emerged-and-became-viral-on-twitter-and-left-netizens-shocked/

https://www.vijayavani.net/ipl-2020-banned-due-to-coronavirus/