ಬ್ರಿಟನ್ ಕಂಪನಿಗೆ ಗೇಟ್‌ಪಾಸ್, ಐಪಿಎಲ್ ಟೂರ್ನಿಯನ್ನು ತಾನೇ ನಿರ್ವಹಿಸಲು ಮುಂದಾದ ಬಿಸಿಸಿಐ

ನವದೆಹಲಿ: ಮುಂಬರುವ 14ನೇ ಆವೃತ್ತಿಯ ಐಪಿಎಲ್ ಟೂರ್ನಿಯನ್ನು ಸ್ವತಃ ತಾನೇ ಸಂಘಟಿಸಲು ಬಿಸಿಸಿಐ ಮುಂದಾಗಿದೆ. ಹೀಗಾಗಿ ಕಳೆದ 13 ವರ್ಷಗಳಿಂದ ಟೂರ್ನಿಯ ಆಯೋಜನೆಯನ್ನು ನೋಡಿಕೊಳ್ಳುತ್ತಿದ್ದ ಬ್ರಿಟನ್‌ನ ಇಂಟರ್‌ನ್ಯಾಷನಲ್ ಮ್ಯಾನೇಜ್‌ಮೆಂಟ್ ಗ್ರೂಪ್ (ಐಎಂಜಿ) ಜತೆಗಿನ ಒಪ್ಪಂದವನ್ನು ಕಡಿದುಕೊಂಡಿದೆ. ಈ ವರ್ಷ ಬಿಸಿಸಿಐ ತನ್ನದೇ ವೃತ್ತಿಪರ ತಂಡದೊಂದಿಗೆ ಟೂರ್ನಿಯ ಆಯೋಜನೆಯನ್ನು ನಿರ್ವಹಿಸಲು ಬಯಸಿದೆ.

2008ರಿಂದ 10 ವರ್ಷಗಳ ಕಾಲ ಮೊದಲಿಗೆ ಐಎಂಜಿ ಜತೆಗೆ ಒಪ್ಪಂದ ಮಾಡಿಕೊಂಡಿದ್ದ ಬಿಸಿಸಿಐ, ಇದಕ್ಕಾಗಿ ಪ್ರತಿ ವರ್ಷ 27 ಕೋಟಿ ರೂ. ಪಾವತಿಸುತ್ತಿತ್ತು. ಈ ನಡುವೆ 2009ರಲ್ಲಿ ದಕ್ಷಿಣ ಆಫ್ರಿಕಾದಲ್ಲಿ ಟೂರ್ನಿ ನಡೆದಾಗ 33 ಕೋಟಿ ರೂ. ನೀಡಿತ್ತು. 2017ರಲ್ಲಿ ಮತ್ತೆ 5 ವರ್ಷಗಳಿಗೆ ಒಪ್ಪಂದ ಮಾಡಿಕೊಂಡಾಗ ವಾರ್ಷಿಕ ಮೊತ್ತದಲ್ಲಿ ಶೇ. 40 (12 ಕೋಟಿ ರೂ.) ಏರಿಕೆ ಮಾಡಿತ್ತು. ಇದೀಗ ಇನ್ನೂ 2 ವರ್ಷಗಳ ಒಪ್ಪಂದ ಬಾಕಿ ಇರುವಂತೆಯೇ ಬಿಸಿಸಿಐ ಅದನ್ನು ಮುರಿದುಕೊಂಡಿದೆ.

ಇದನ್ನೂ ಓದಿ:  VIDEO | ಸ್ಟೀವನ್ ಸ್ಮಿತ್‌ರನ್ನು ರವೀಂದ್ರ ಜಡೇಜಾ ರನೌಟ್ ಮಾಡಿದ ರೀತಿಗೆ ಕ್ರಿಕೆಟ್​ ಪ್ರೇಮಿಗಳು ಫಿದಾ!

2021ರ ಐಪಿಎಲ್ ಟೂರ್ನಿ ಎಂದಿನಂತೆ ಏಪ್ರಿಲ್-ಮೇನಲ್ಲಿ ನಡೆಯುವ ನಿರೀಕ್ಷೆ ಇದ್ದರೂ, ಭಾರತದಲ್ಲೇ ನಡೆಯುವುದೇ ಅಥವಾ ಕಳೆದ ಬಾರಿಯಂತೆ ಯುಎಇಗೆ ಸ್ಥಳಾಂತರಗೊಳ್ಳುವುದೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. ಇದನ್ನು ನಿರ್ಧರಿಸಲು ಬಿಸಿಸಿಐ, ಇನ್ನೂ ಒಂದು ತಿಂಗಳ ಕಾಲ ಕಾದು ನೋಡಲಿದೆ ಎನ್ನಲಾಗಿದೆ. ಈ ನಡುವೆ ಫೆಬ್ರವರಿಯಲ್ಲಿ ಆಟಗಾರರ ಮಿನಿ ಹರಾಜು ಪ್ರಕ್ರಿಯೆ ನಡೆಯಬೇಕಿದೆ.

https://www.vijayavani.net/gymnast-does-gravity-defying-backflips-in-a-saree-and-the-internet-cant-keep-calm/