2008ರಿಂದಲೂ ಆರ್ಸಿಬಿ ಅಭಿಮಾನಿಗಳ ಬಳಗ ದೊಡ್ಡದಾಗಿದೆಯೇ ವಿನಃ ಚಿಕ್ಕದಾಗಲೇ ಇಲ್ಲ, ಸಣ್ಣದಾಗಿಯೂ ಕಾಣಿಸಲಿಲ್ಲ. ತಮ್ಮನ್ನು ನೋಡಿ, ಪ್ರತಿ ಪಂದ್ಯದಲ್ಲೂ ಹುರಿದುಂಬಿಸುವ ಅಪಾರ ಸಂಖ್ಯೆಯ ನಿಷ್ಠಾವಂತ ಫ್ಯಾನ್ಸ್ಗೆ ಗೆಲುವಿನ ಕಿರೀಟ ತೊಡಿಸಬೇಕು ಎಂದು ಪಣತೊಟ್ಟಿರುವ ವಿರಾಟ್ ಕೊಹ್ಲಿ, ಇದೊಂದಕ್ಕಾಗಿ ಮೈದಾನದಲ್ಲಿ ಇಂದಿಗೂ ಚಿರ ಯುವಕನಂತೆ ಓಡಾಡಿ, ಗೆಲುವಿಗಾಗಿ ಶ್ರಮಿಸುತ್ತಾರೆ. ಇಷ್ಟಾದರೂ ಸಹ 17ನೇ ಆವೃತ್ತಿಯಲ್ಲಿಯೂ ಸಹ ಟ್ರೋಫಿಗೆ ಮುತ್ತಿಡಲು ಸಾಧ್ಯವಾಗಲಿಲ್ಲ. ಇದರಿಂದ ಫ್ಯಾನ್ಸ್ ಕೊಂಚ ನಿರಾಸೆಗೊಂಡಿದ್ದೇ ಆದರೂ 'ಮುಂದಿನ ಸಲ ಕಪ್ ನಮ್ದೇ' ಎಂಬ ಅದೇ ಭರವಸೆ, ಪ್ರೀತಿ, ಅಭಿಮಾನವನ್ನು ಬಿಡದೆ ಮುಂದುವರೆಸಿಕೊಂಡು ಬಂದಿದ್ದಾರೆ.
