ನಿರ್ದೇಶಕ ಹಿರಾನಿಯ ಇದುವರೆಗಿನ ದುರ್ಬಲ ಕಥೆ, ಚಿತ್ರಕಥೆ ‘ಡಂಕಿ’. ಮೊದಲರ್ಧ ನಗಿಸುತ್ತಾ ಸಾಗುವ ಕಥೆ ಮಧ್ಯಂತರದ ಬಳಿಕ ಗಂಭೀರ ತಿರುವು ಪಡೆಯುತ್ತದೆ. ಬಳಿಕ ಕ್ಲೈಮ್ಯಾಕ್ಸ್ನಲ್ಲಿ ಭಾವುಕರನ್ನಾಗಿಸುತ್ತದೆ. ಆದರೆ, ರಾತ್ರಿಯೆಲ್ಲ ನದಿಯೊಳಗೆ ಕಳೆಯುವ ಸನ್ನಿವೇಶ, ಅಕ್ರಮ ವಲಸೆಯನ್ನು ಸಮರ್ಥಿಸಿಕೊಂಡಿರುವ ರೀತಿ ಹಾಸ್ಯಾಸ್ಪದ. ಒಂದೊಳ್ಳೆ ತಾರಾಗಣ ಹೊಂದಿದ್ದರೂ 161 ನಿಮಿಷಗಳ ಸಿನಿಮಾ ಸುದೀರ್ಘವೆನಿಸುತ್ತದೆ. 1995 ಹಾಗೂ 2020, ಎರಡು ಕಾಲಘಟ್ಟದಲ್ಲಿ ನಡೆಯುವ ಕಥೆಯಿದು. ಆದರೆ, 25 ವರ್ಷಗಳ ಬದಲಾವಣೆಯನ್ನು ಪಾತ್ರಗಳಲ್ಲಷ್ಟೇ ಕಾಣಬಹುದು. ಹಿನ್ನೆಲೆಯಲ್ಲಿ ಹೆಚ್ಚು ಭಿನ್ನತೆಯಿಲ್ಲ. ಕೆಲವೇ ಸನ್ನಿವೇಶಗಳಲ್ಲಿ ಬಂದು ಹೋಗುವ ವಿಕ್ಕಿ ಕೌಶಲ್ ‘ಡಂಕಿ’ ಚಿತ್ರದ ನಿಜವಾದ ಹೀರೋ. ತಾಪ್ಸೀ, ಬೊಮನ್ ಇರಾನಿ ನಟನೆ ಇಷ್ಟವಾಗುತ್ತದೆ. ಉಳಿದವರು ಅಚ್ಚುಕಟ್ಟಾಗಿ ತಮ್ಮ ಪಾತ್ರಗಳಿಗೆ ಜೀವ ತುಂಬಿದ್ದಾರೆ. ಪ್ರೀತಮ್ ಸಂಗೀತದಲ್ಲಿ ‘ಬಂದಾ’ ಮತ್ತು ‘ಓ ಮಾಹಿ’ ಕೇಳಬಹುದು. ಇನ್ನೂ 20 ನಿಮಿಷಗಳ ಕತ್ತರಿ ಪ್ರಯೋಗವಾಗಿದ್ದರೆ, ಕಥೆಗೆ ಮತ್ತಷ್ಟು ವೇಗ ಸಿಗುತ್ತಿತ್ತು.
