ನಿಯಮಬಾಹಿರ ಧ್ವಂಸಕ್ಕೆ ಸುಪ್ರೀಂ ಕೆಂಡ: ರಸ್ತೆ ಅಗಲೀಕರಣ ಮತ್ತು ಅತಿಕ್ರಮ ತೆರವು ಕಾರ್ಯಾಚರಣೆ ವೇಳೆ ಪಾಲಿಸಬೇಕಾದ ನಿಯಮಗಳ ಬಗ್ಗೆ ಎಲ್ಲಾ ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ನಿರ್ದೇಶನ ಜಾರಿ ಮಾಡಿದ ವೇಳೆ ಸುಪ್ರೀಂಕೋರ್ಟ್ ಉತ್ತರ ಪ್ರದೇಶ ಸರ್ಕಾರವನ್ನು ತೀವ್ರ ತರಾಟೆಗೆ ತೆಗೆದುಕೊಂಡಿದ್ದು, 2019ರಲ್ಲಿ ನಿಯಮಬಾಹಿರ ಧ್ವಂಸ ಕಾರ್ಯಾಚರಣೆ ಕೈಗೊಂಡಿದ್ದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದೆ. ರಸ್ತೆ ಅಗಲೀಕರಣ ಯೋಜನೆ ಹೆಸರಲ್ಲಿ ವ್ಯಕ್ತಿಯೊಬ್ಬನ ಮನೆ ನೆಲಸಮಗೊಳಿಸಿದ್ದಕ್ಕೆ 25 ಲಕ್ಷ ರೂ. ಪರಿಹಾರ ನೀಡಬೇಕೆಂದು ಉತ್ತರಪ್ರದೇಶ ಸರ್ಕಾರಕ್ಕೆ ಆದೇಶಿಸಿದ ಸಿಜೆಐ ನೇತೃತ್ವದ ನ್ಯಾಯಪೀಠ, ಬುಲ್ಡೋಜರ್ಗಳಿಂದ ರಾತ್ರೋರಾತ್ರಿ ಮನಸೋಇಚ್ಛೆ ಧ್ವಂಸ ಕಾರ್ಯಾಚರಣೆ ನಡೆಸಲು ಸಾಧ್ಯವಿಲ್ಲ. ಮನೆ ಖಾಲಿ ಮಾಡಲೂ ಸಮಯ ನೀಡುವುದಿಲ್ಲ. ಹೀಗಿದ್ದಾಗ ಮನೆಯೊಳಗೆ ಇರುವ ಸಾಮಗ್ರಿಗಳ ಕಥೆ ಏನು ಎಂದು ಕಟುವಾಕ್ಯಗಳಲ್ಲಿ ಪ್ರಶ್ನಿಸಿದೆ. ಮಹಾರಾಜ್ ಗಂಜ್ ಜಿಲ್ಲೆಯಲ್ಲಿರುವ ಈ ಮನೆ ಪ್ರಕರಣದ ಬಗ್ಗೆ ತನಿಖೆ ನಡೆಸುವಂತೆ ರಾಜ್ಯ ಮುಖ್ಯ ಕಾರ್ಯದರ್ಶಿಗೆ ಸೂಚಿಸಿದ ನ್ಯಾಯಪೀಠ, ಸಂಬಂಧಪಟ್ಟವರ ವಿರುದ್ಧ ಕ್ರಮ ಕೈಗೊಳ್ಳುವಂತೆ ತಿಳಿಸಿತು. ಅತಿಕ್ರಮ ಕಂಡುಬಂದಲ್ಲಿ ಮೊದಲು ಸರ್ಕಾರ ಅದನ್ನು ತೆರವು ಮಾಡುವಂತೆ ನೋಟಿಸ್ ನೀಡಬೇಕು. ನಂತರ ಆಕ್ಷೇಪಣೆಗಳಿದ್ದಲ್ಲಿ ಅದನ್ನು ಆಲಿಸಬೇಕು. ಒಂದುವೇಳೆ ಅತಿಕ್ರಮ ನಿಜವಾಗಿದ್ದು, ನೋಟಿಸ್ಗೆ ಪೂರಕವಾಗಿ ನಡೆದುಕೊಳ್ಳಲು ವ್ಯಕ್ತಿ ಹಿಂಜರಿದಾಗ ಅಗತ್ಯ ಕ್ರಮ ಕೈಗೊಳ್ಳಲು ಸಕ್ಷಮ ಪ್ರಾಧಿಕಾರಗಳು ಮುಂದಾಗಬೇಕು ಎಂದು ಕೋರ್ಟ್ ಸಲಹೆ ನೀಡಿತು.
