ಕನ್ನಡಕ್ಕೆ ನನ್ನ ಮೊದಲ ಪ್ರಾಶಸ್ತ್ಯ; ಮನದ ಮಾತು ಬಿಚ್ಚಿಟ್ಟ ಸಪ್ತಮಿ ಗೌಡ

ಬೆಂಗಳೂರು: 'ಕಾಂತಾರ' ಚಿತ್ರದ ಯಶಸ್ಸಿನ ಅಲೆಯಲ್ಲಿ ತೇಲುತ್ತಿರುವ ಸಪ್ತಮಿ ಗೌಡ, ಇದೀಗ ಬಾಲಿವುಡ್​ಗೆ ಹಾರಿದ್ದಾರೆ. 'ಕಾಶ್ಮೀರ್​ ಫೈಲ್ಸ್​' ಖ್ಯಾತಿಯ ನಿರ್ದೇಶಕ ವಿವೇಕ್​ ಅಗ್ನಿಹೋತ್ರಿ ನಿರ್ದೇಶನದ 'ದಿ ವ್ಯಾಕ್ಸಿನ್​ ವಾರ್​' ಚಿತ್ರದಲ್ಲಿ ಅವರು ನಟಿಸುತ್ತಿದ್ದಾರೆ. ಬೇರೆ ಭಾಷೆಗಳ ಚಿತ್ರಗಳಲ್ಲಿ ನಟಿಸಿದರೂ, ತಮ್ಮ ಮೊದಲ ಪ್ರಾಶಸ್ತ್ಯ ಕನ್ನಡಕ್ಕೆ ಎಂದಿದ್ದಾರೆ.

ಇದನ್ನೂ ಓದಿ: ಪ್ರಿಯಾಂಕಾ ಚೋಪ್ರಾ ಬಾಡಿಗೆ ತಾಯ್ತನದ ಮೊರೆ ಹೋಗಿದ್ದು ಏಕೆ?

ಇತ್ತೀಚೆಗೆ ಸಂದರ್ಶನವೊಂದರಲ್ಲಿ ಮಾತನಾಡಿರುವ ಅವರು, ಹಿಂದಿ ಚಿತ್ರವೊಂದಕ್ಕೆ ಆಯ್ಕೆಯಾಗಿದ್ದು ಹೇಗೆ ಎನ್ನುವುದರ ಜತೆಗೆ, ಹಲವು ವಿಷಯಗಳ ಕುರಿತು ಮಾತನಾಡಿದ್ದಾರೆ.

'ವಿವೇಕ್​ ಅಗ್ನಿಹೋತ್ರಿ ಅವರು 'ಕಾಂತಾರ' ಚಿತ್ರ ನೋಡಿ, ರಿಷಬ್​ ಶೆಟ್ಟಿ ಅವರನ್ನು ಸಂಪರ್ಕಿಸಿದರಂತೆ. ಚಿತ್ರದಲ್ಲಿನ ಒಂದು ಪಾತ್ರಕ್ಕೆ ನಾನು ಸೂಕ್ತ ಎಂದನಿಸಿ ನನ್ನ ಫೋನ್​ ನಂಬರ್​ ಕೇಳಿದರಂತೆ. ಅವರಿಂದ ನಂಬರ್​ ಪಡೆದು, ನನಗೆ ಕಾಲ್ ಮಾಡಿದ್ದಾರೆ. ಈ ಪಾತ್ರ ನಾನು ಮಾಡಿದರೆ ಚೆನ್ನಾಗಿರುತ್ತದೆ ಎಂದು ಅವರು ಹೇಳಿದರು. ನಾನು ತಕ್ಷಣ ಒಪ್ಪಿಕೊಂಡೆ. ನನಗೆ ಸ್ಕ್ರಿಪ್ಟ್​ ಕಳಿಸಲಾಯಿತು. ಹೀಗೆ ನೋಡುನೋಡುತ್ತಿದ್ದಂತೆ, ನಾನು ಬಾಲಿವುಡ್​ ಚಿತ್ರವೊಂದರ ಭಾಗವಾದೆ' ಎಂದು ಅವರು ಹೇಳಿಕೊಂಡಿದ್ದಾರೆ.

ಬಾಲಿವುಡ್​ ಚಿತ್ರಗಳಲ್ಲಿ ಇನ್ನು ಮುಂದೆ ಸಹ ನಟಿಸುತ್ತೀರಾ ಎಂದರೆ, 'ನನಗೆ ಕಥೆ ಇಷ್ಟವಾದರೆ, ನಾನು ಒಪ್ಪಿಕೊಳ್ಳುತ್ತೇನೆ. ಆದರೆ, ನನ್ನ ಮೊದಲ ಪ್ರಾಶಸ್ತ್ಯ ಕನ್ನಡ ಚಿತ್ರಗಳು ಮತ್ತು ಕನ್ನಡ ಚಿತ್ರಗಳಿಗಾಗಿ ನಾನು ಎದುರು ನೋಡುತ್ತೇನೆ' ಎಂದು ಹೇಳಿದ್ದಾರೆ.

ಇದನ್ನೂ ಓದಿ: ರಾಜ್ಯಪಾಲರಾದ ರಾಘಣ್ಣ; ಧ್ರುವ 369 ಚಿತ್ರದಲ್ಲಿ ಅಭಿನಯ

'ವ್ಯಾಕ್ಸಿನ್​ ವಾರ್​' ಚಿತ್ರದಲ್ಲಿ ನಾಯಕ-ನಾಯಕಿ ಅಂತಿಲ್ಲವಂತೆ. ಚಿತ್ರದಲ್ಲಿ ಎಲ್ಲ ಪಾತ್ರಗಳೂ ಪ್ರಮುಖ ಪಾತ್ರಗಳಂತೆ. 'ನನ್ನ ಪಾತ್ರವಂತೂ ಸ್ವಲ್ಪ ಕಷ್ಟಕರವಾದದ್ದು. ಇದೊಂದೇ ಅಲ್ಲ, ಎಲ್ಲ ಪಾತ್ರಗಳೂ ಕಷ್ಟವಾಗಿರುತ್ತವೆ. ಪಾತ್ರ ಸುಲಭವಾಗಿದ್ದರೆ ಮಜ ಇರುವುದಿಲ್ಲ. ಈ ಪಾತ್ರ ಮಾಡುವುದಕ್ಕೆ ವಿವೇಕ್​ ಅಗ್ನಿಹೋತ್ರಿ ನನಗೆ ಬಹಳ ಸಹಾಯ ಮಾಡಿದ್ದಾರೆ' ಎಂದು ಸಪ್ತಮಿ ಹೇಳಿದ್ದಾರೆ.

https://www.vijayavani.net/tamanna-to-act-first-time-with-rajinikanth/