ತಮಾಷೆಯಾಗಿ ಕಂಡರೂ ಸತ್ಯವೊಂದನ್ನು ಹೇಳುತ್ತೇನೆ. ನೀವು ವಿದ್ಯಾರ್ಥಿಯಾಗಿದ್ದಾಗ ಅತ್ಯಂತ ಸಾಧಾರಣರು ಎಂದಿಟ್ಟುಕೊಳ್ಳಿ. ಬೆಳೆಯುವ ಪೈರು ಮೊಳಕೆಯಲ್ಲಿ ಎಂಬಂತೆ ಮುಂದೆಯೂ ಸಾಧಾರಣ ವ್ಯಕ್ತಿಯೇ . ಆದರೆ ನಿಮ್ಮ ಸಹಪಾಠಿಗಳಲ್ಲಿ ಕೆಲವರು ವಿದ್ಯಾರ್ಥಿದೆಸೆ ಹಾಗೂ ಮುಂದುವರೆದ ಘಟ್ಟಗಳಲ್ಲಿ ಅದ್ಭುತ ಪ್ರತಿಭೆ ಸಾಮರ್ಥ್ಯಗಳನ್ನು ತೋರಿ ಜೀವನದಲ್ಲಿ ಹೆಸರು, ಕೀರ್ತಿ, ಅಧಿಕಾರ ಇವುಗಳನ್ನು ಸಂಪಾದಿಸಿ ಸುಖ ಸಮೃದ್ಧಿಗಳನ್ನು ಕಾಲುಕಸವಾಗಿಸಿಕೊಂಡವರು. ಅವರನ್ನು ನೋಡಿದಾಗ, ಅವರನ್ನು ನೆನೆಸಿಕೊಂಡಾಗ ನಿಮಗೆ ಏನೋ ತಳಮಳ. ಸಂಕಟ ಹಾಗೂ ಹಲವು ಸುಖಗಳಿಂದ ವಂಚಿತರಾದ ಅನುಭವ. ನಿಮಗೂ ಕೀರ್ತಿ, ಪ್ರಶಸ್ತಿ, ಸನ್ಮಾನಗಳು, ಬಿರುದು ಬಾವಲಿಗಳು, ಜೈಕಾರಗಳು ಸಿಗಬೇಕೆಂಬ ಆಸೆ ಇತ್ತು. ಆದರೆ ಏನೂ ಸಿಗುತ್ತಿಲ್ಲವಲ್ಲ ಎಂದು ಕೈ ಕೈ ಹಿಸುಕಿಕೊಳ್ಳುವ ಸಂದರ್ಭ. ಏನು ಮಾಡುವುದು! ವಿದ್ಯಾರ್ಥಿಯಾಗಿದ್ದಾಗ ಗಣಿತ, ವಿಜ್ಞಾನ ಕೆಲವೊಮ್ಮೆ ಇಂಗ್ಲೀಷ್ ಕೂಡ ಅರ್ಥವಾಗದೇ ಮಾತೃಭಾಷೆಯಲ್ಲೋ ಅಥವಾ ಅಷ್ಟೇ ಸರಳವಾದ ಇನ್ನಾವುದೋ ವಿಷಯದಲ್ಲೋ ಒಂದು ಪದವಿಯನ್ನೋ ಸ್ನಾತಕೋತ್ತರ ಹಂತವನ್ನೋ ತಲುಪಿದ್ದಾಗಿದೆ. ಆದರೆ ಈಗ ಸಮಕಾಲೀನರು ಸಾಧನೆಗಳ ರಾಜಮಾರ್ಗದಲ್ಲಿ ದಾಪುಗಾಲು ಹಾಕಿಕೊಂಡು ನಡೆಯುತ್ತಿರುವಾಗ ನಮ್ಮ ಕಡೆಗೆ ಕಣ್ಣೆತ್ತಿ ನೋಡುವವರೂ ಇಲ್ಲವಲ್ಲ ಎಂಬ ಬೇಗುದಿಯಲ್ಲಿ ಬೆಂದುಹೋಗುತ್ತಿದ್ದೀರಿ ಎಂದುಕೊಳ್ಳಿ. ಏನೇನೂ ಯೋಚಿಸಬೇಡಿ! ನಿಮಗೊಂದು ಸರಳ ಉಪಾಯವಿದೆ! ಅದೇನು ಗೊತ್ತೇ? ರಾಮನನ್ನೋ, ಕೃಷ್ಣನನ್ನೋ, ಶಂಕರಾಚಾರ್ಯರನ್ನೋ, ಸೀತೆ, ಚಾಮುಂಡಿಯನ್ನೋ, ಕೊನೆಗೆ ಇವರೆಲ್ಲರ ಆಶ್ರಯದಾಣವಾದ ಹಿಂದೂಧರ್ಮ, ಸನಾತನ ಧರ್ಮವನ್ನೋ ಕಟುವಾಗಿ ಒಮ್ಮೆ ಟೀಕಿಸಿಬಿಡಿ! ನೋಡಿ ಅದರ ಗಮ್ಮತ್ತು! ರಾತ್ರೋರಾತ್ರಿ ನೀವೊಬ್ಬ ಚಿಂತಕ! ಸುಪ್ರಸಿದ್ದ ಚಿಂತಕ! ನಿಮ್ಮದು ಪ್ರಬುದ್ಧ ಮನಸ್ಸು. ನಿಮ್ಮ ಬಗ್ಗೆ ಎಲ್ಲ ಮಾಧ್ಯಮಗಳಲ್ಲೂ ಚರ್ಚೆ. ನೀವು ಹಲವು ಪ್ರಶಸ್ತಿಗಳಿಗೆ ಅರ್ಹರು! ಹಲವು ಅಕಾಡೆಮಿ, ಸಮಿತಿಗಳಲ್ಲಿ ಸದಸ್ಯತ್ವ ಇಲ್ಲವೇ ಅಧ್ಯಕ್ಷ ಪದವಿ. ಈ ಬಿಸಿಯಲ್ಲಿ ನೀವು ಒಂದೆರೆಡು ಕವನ, ಅದರಲ್ಲಿ ಆಯ್ದ ಕೆಲವು ಪದಗಳ ಸಂಯೋಜನೆ ಇದ್ದರಾಯಿತು! ಸಾಹಿತ್ಯವಲಯಗಳಲ್ಲಿ ನೀವು ಸೃಜನಶೀಲರು!! ನೀವು ಕ್ರಾಂತಿಕಾರಿ ಚಿಂತಕರು! ಒಂದೆರಡು ಪ್ರಶಸ್ತಿಗಳಿಗೂ ಭಾಜನರು. ಇನ್ನು ಮುಂದೆ ಚಿಂತಕರ ಚಾವಡಿಯಲ್ಲಿ ನಿಮಗೆ ಖಾಯಂ ಸ್ಥಾನ!!!
