ಮೊದಲ ಮದುವೆ ಮುಚ್ಚಿಟ್ಟು ವಿವಾಹವಾಗಿದ್ದರೂ ಇಂಥ ಕೇಸ್‌ಗಳಲ್ಲಿ ಅದು ತಪ್ಪೂ ಅಲ್ಲ, ಪತ್ನಿಗೆ ಆಸ್ತಿನೂ ಸಿಗುತ್ತೆ...

ನನ್ನ ಸ್ನೇಹಿತ ಹೊರದೇಶದಲ್ಲಿ ಇದ್ದಾಗ ಅವನ ಹೆಂಡತಿಗೆ ಅನೈತಿಕ ಸಂಬಂಧ ಇತ್ತು ಎಂದು ತಿಳಿಯಿತು. ಇದರ ವಿಚಾರವಾಗಿ ಇಬ್ಬರಿಗೂ ಜಗಳ ಆಗುತ್ತಿತ್ತು. ಅಲ್ಲದೆ, ಅವಳು ಇದಕ್ಕೂ ಮೊದಲು ಬೇರೆ ಹುಡುಗನನ್ನು ಮದುವೆ ಆಗಿ ಡೈವೋರ್ಸ್ ಪಡೆದ ವಿಚಾರವೂ ಅವನಿಗೆ ತಿಳಿಯಿತು. ಆಸ್ತಿಗಾಗಿ ಮಾತ್ರ ನನ್ನ ಸ್ನೇಹಿತನನ್ನು ಮದುವೆ ಆಗಿದ್ದಳು. ಆದರೆ, ಈಗ ಅವನಿಲ್ಲ. ಕೆಲವರ ಹೇಳಿಕೆಯ ಪ್ರಕಾರ, ಅವಳೇ ತನ್ನ ಲವರ್ ಜತೆ ಸೇರಿ ನನ್ನ ಸ್ನೇಹಿತನನ್ನು ಕೊಲೆ ಮಾಡಿದ್ದಾಳೆ.

ಆದರೆ ಅವಳು ನನ್ನ ಸ್ನೇಹಿತನ ಮನೆಯವರಿಗೆ ಅವನು ಕುಡಿದು ಸತ್ತಿದ್ದಾನೆ ಎಂದು ಹೇಳಿದ್ದಾಳೆ. ಪೊಲೀಸರೂ ಬಿ ರಿಪೋರ್ಟ್​ ಹಾಕಿದ್ದಾರೆ. ಈಗ ಅವಳು ನನ್ನ ಗೆಳೆಯನ ಮನೆಗೆ ಬಂದು ಅವನ ಹೆಸರಿನಲ್ಲಿರುವ ಮನೆಯನ್ನು ತನಗೆ ಬಿಟ್ಟುಕೊಡಬೇಕು ಎನ್ನುತ್ತಿದ್ದಾಳೆ. ನನ್ನ ಗೆಳೆಯನ ಜತೆ ಅವಳ ರಿಜಿಸ್ಟರ್ ಮದುವೆ ಸಿಂಧು ಆಗುತ್ತದೆಯೇ? ಅವಳಿಗೂ ಆಸ್ತಿಯಲ್ಲಿ ಭಾಗ ಇದೆಯೇ?

ಉತ್ತರ: ನಿಮ್ಮ ಗೆಳೆಯನ ವಿವಾಹ ಸಿಂದೂವಾದ ವಿವಾಹವೇ ಆಗಿರುತ್ತದೆ. ನಿಮ್ಮ ಗೆಳೆಯನ ಹೆಂಡತಿ ತನ್ನ ಮೊದಲಿನ ಪತಿಯಿಂದ ಡೈವೋರ್ಸ್ ಪಡೆದ ನಂತರ ನಿಮ್ಮ ಗೆಳೆಯನನ್ನು ವಿವಾಹ ಆಗಿರುವುದರಿಂದ ಆ ವಿವಾಹ ಕಾನೂನಿನಲ್ಲಿ ಮಾನ್ಯತೆ ಪಡೆಯುತ್ತದೆ.

ನಿಮ್ಮ ಗೆಳೆಯನ ಹೆಸರಿನಲ್ಲಿರುವ ಎಲ್ಲಾ ಆಸ್ತಿಯಲ್ಲಿ ನಿಮ್ಮ ಗೆಳೆಯನ ಹೆಂಡತಿಗೆ ಮತ್ತು ಆತನ ತಾಯಿಗೆ ಸಮಪಾಲು ಇರುತ್ತದೆ. ನಿಮ್ಮ ಗೆಳೆಯನಿಗೆ ಮಕ್ಕಳು ಇದ್ದರೆ ಅವರಿಗೂ ಸಮಪಾಲು ಸಿಗುತ್ತದೆ. ಕೊಲೆಯ ಆರೋಪ ಒಬ್ಬ ವ್ಯಕ್ತಿಯ ಮೇಲೆ ಅಂತಿಮವಾಗಿ ನ್ಯಾಯಾಲಯದ ತೀರ್ಪಿನ ಮೂಲಕ ಸಾಬೀತಾದಾಗ ಮಾತ್ರ ಅಂತಹ ವ್ಯಕ್ತಿಗೆ ಕೊಲೆಯಾದ ವ್ಯಕ್ತಿಯ ಆಸ್ತಿಯಲ್ಲಿ ಪಾಲಿ ಸಿಗುವುದಿಲ್ಲ.

ನಿಮ್ಮ ಗೆಳೆಯನ ವಿಷಯದಲ್ಲಿ ಆತನ ಹೆಂಡತಿಯ ಮೇಲೆ ದೋಷಾರೋಪಣೆ ಸಹ ಆಗಿಲ್ಲ. ಹೀಗಾಗಿ, ಆಕೆಯ ಮೃತ ಗಂಡನ ಆಸ್ತಿಯಲ್ಲಿ ಆಕೆಯ ಹಕ್ಕನ್ನು ಯಾರೂ ಚ್ಯುತಿ ಮಾಡುವಂತಿಲ್ಲ.

ಸಾಧ್ಯವಾದರೆ ನಿಮ್ಮ ಗೆಳೆಯನ ತಂದೆ ತಾಯಿ ಇರುವ ತಾಲೂಕಿನ ಮಧ್ಯಸ್ಥಿಕೆ ಕೇಂದ್ರದಲ್ಲಿ ವ್ಯಾಜ್ಯ ಪೂರ್ವ ಮಧ್ಯಸ್ಥಿಕೆಗೆ ಅರ್ಜಿ ಕೊಡಲು ತಿಳಿಸಿ. ಅವರು ನಿಮ್ಮ ಗೆಳೆಯನ ಹೆಂಡತಿಯನ್ನು ಕರೆಯಿಸಿ ಮಾತುಕತೆ ನಡೆಸಿ ಸಮಸ್ಯೆ ಬಗೆಹರಿಸಲು ಸಹಾಯ ಮಾಡಬಹುದು. ಇದಕ್ಕೆ ಹಣ ಖರ್ಚು ಆಗುವುದಿಲ್ಲ.

ಕಾನೂನಿಗೆ ಸಂಬಂಧಿಸಿದ ಇತರ ಪ್ರಶ್ನೋತ್ತರಗಳಿಗಾಗಿ ಈ ಲಿಂಕ್​ ಕ್ಲಿಕ್ಕಿಸಿ:

https://www.vijayavani.net/category/%e0%b2%a8%e0%b3%8d%e0%b2%af%e0%b2%be%e0%b2%af%e0%b2%a6%e0%b3%87%e0%b2%b5%e0%b2%a4%e0%b3%86/

https://www.vijayavani.net/s-dead-husband-property-nyaya/

https://www.vijayavani.net/s-divorce-conditions-after-death-nyaya/

https://www.vijayavani.net/s-how-much-property-iget-nyaya/