ಅದು ನನ್ನ ಬರ್ತ್​ಡೇಟ್​ ಅಲ್ವೋ, ಡೆತ್​ಡೇಟ್​ ಎಂದಿದ್ದ ಬಾಲಕ: ಸ್ನೇಹಿತನಿಗೆ ಹೇಳಿದ್ದ ಮಾತು ನಿಜವಾಗಿತ್ತು!

ಹೈದರಾಬಾದ್: 'ಅದೇನದೋ ನಿನ್ನ ಇನ್​ಸ್ಟಾಗ್ರಾಂನಲ್ಲಿ ಇರೋ ಡೇಟು? ನಿನ್ನ ಹುಟ್ಟಿದ ಹಬ್ಬ ಅಂತೂ ಅಲ್ಲ, ಮತ್ಯಾಕೆ ಆ ದಿನಾಂಕ ಬರೆದುಕೊಂಡಿರುವಿ?' ಎಂದು 10 ನೇ ತರಗತಿ ವಿದ್ಯಾರ್ಥಿ ಶಿವಲೋಕೇಶ್​ನನ್ನು ಆತನ ಸ್ನೇಹಿತ ಕೇಳಿದ್ದ. ಆಗ ಶಿವಲೋಕೇಶ್​ ಅದು ನನ್ನ ಬರ್ತ್​ಡೇಟ್​ ಅಲ್ಲವೋ, ಡೆತ್​ ಡೇಟ್​ ಎಂದಿದ್ದ. ಆ ಸ್ನೇಹಿತನ ಹುಟ್ಟುಹಬ್ಬ ಇದ್ದುದರಿಂದ ಆತನಿಗೆ ಶುಭಾಶಯ ಕೂಡ ಕೋರಿದ್ದ.

ಮಾರನೆಯ ದಿನವೇ ಬಂದ ಸುದ್ದಿ ಕೇಳಿ ಆ ಸ್ನೇಹಿತನಿಗೆ ಆಕಾಶವೇ ಕಳಚಿ ಬಿದ್ದಂತಾಯಿತು. ಏಕೆಂದರೆ ಹಿಂದಿನ ದಿನವಷ್ಟೇ ತನಗೆ ವಿಷ್​ ಮಾಡಿದ್ದ ಸ್ನೇಹಿತ ಶಿವಲೋಕೇಶ್​ ಆತ್ಮಹತ್ಯೆ ಮಾಡಿಕೊಂಡಿರುವ ವಿಷಯ ತಿಳಿಯಿತು! ಮತ್ತೊಮ್ಮೆ ಆತನ ಇನ್​ಸ್ಟಾಗ್ರಾಂ ನೋಡಿದಾಗ ಅಲ್ಲಿ ನಮೂದಾಗಿದ್ದ ದಿನಾಂಕವೇ ಆತನ ಸಾವಿನ ದಿನ ಎಂದು ತಿಳಿಯುವಷ್ಟರಲ್ಲಿ ಎಲ್ಲವೂ ಮುಗಿದು ಹೋಗಿತ್ತು. ಅದು ತನ್ನ ಡೆತ್​ಡೇಟ್​ ಎಂದು ಶಿವಲೋಕೇಶ್​ ಹೇಳಿದ್ದಾಗ ಅದನ್ನು ತಮಾಷೆ ಎಂದುಕೊಂಡು ನಕ್ಕಿದ್ದ ಸ್ನೇಹಿತನಿಗೆ ಈ ವಿಷಯ ಜೀರ್ಣಿಸಿಕೊಳ್ಳಲು ಆಗಲಿಲ್ಲ.

ಈ ದುರ್ಘಟನೆ ನಡೆದಿರುವುದು ತೆಲಂಗಾಣದ ಭದ್ರಾದ್ರಿ ಕೊತಗುಡೆಂನಲ್ಲಿ. 14 ವರ್ಷದ ಶಿವಲೋಕೇಶ್​ ನೇಣು ಬಿಗಿದುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ. ಸಾವಿಗೆ ನಿಖರ ಕಾರಣ ಏನೆಂದು ತಿಳಿದುಬಂದಿಲ್ಲ. ಆದರೆ ಹಿಂದಿನ ದಿನವಷ್ಟೇ (ಜುಲೈ 19) ಸ್ನೇಹಿತನಿಗೆ ಹುಟ್ಟುಹಬ್ಬದ ಶುಭಾಶಯ ಹೇಳುವಾಗಲೂ ಸರಿಯಾಗಿಯೇ ಇದ್ದಂತೆ ತೋರುತ್ತಿದ್ದ ಈ ಬಾಲಕ, ಕೆಲ ದಿನಗಳ ಹಿಂದೆಯೇ ತನ್ನ ಸಾವಿನ ದಿನವನ್ನು (20-07-22) ಏಕೆ ಬರೆದಿಟ್ಟ ಎನ್ನುವುದು ಮಾತ್ರ ನಿಗೂಢವಾಗಿಯೇ ಉಳಿದಿದೆ. ಇನ್​ಸ್ಟಾಗ್ರಾಮ್​ನ ಪ್ರೊಫೈಲ್​ನಲ್ಲಿ ಈ ದಿನಾಂಕವನ್ನು ನಮೂದು ಮಾಡಲಾಗಿದೆ.

ಶಿವಲೋಕೇಶ್ ಮೊಬೈಲ್​ ಗೀಳು ಹಚ್ಚಿಕೊಂಡಿದ್ದ. ಸಾಮಾಜಿಕ ಜಾಲತಾಣದಲ್ಲಿ ಸದಾ ಮುಳುಗಿರುತ್ತಿದ್ದ. ಸ್ನೇಹಿತರ ಬಳಿಯೂ ಅಷ್ಟೆಲ್ಲಾ ಸರಿಯಾಗಿ ವರ್ತಿಸುತ್ತಿರಲಿಲ್ಲ. ಯಾವಾಗ ನೋಡಿದರೂ ಮೊಬೈಲ್​ ಗುಂಗಿನಲ್ಲಿ ಇರುತ್ತಿದ್ದ. ಇದೇ ಆತನ ಸಾವಿಗೆ ಕಾರಣ ಆಗಿರಬಹುದು, ಮೊಬೈಲ್​ನಲ್ಲಿ ಯಾವುದೋ ಆಟದ ಹುಚ್ಚು ಇಲ್ಲವೇ ವಿಡಿಯೋ ನೋಡಿ ಸಾವಿನ ಹಾದಿ ತುಳಿದಿರಬಹುದು ಎಂದು ಸ್ನೇಹಿತರು ಶಂಕೆ ವ್ಯಕ್ತಪಡಿಸಿದ್ದಾರೆ. ಸದ್ಯ ಪೊಲೀಸರು ಪ್ರಕರಣ ದಾಖಲು ಮಾಡಿಕೊಂಡು ತನಿಖೆ ನಡೆಸುತ್ತಿದ್ದಾರೆ. (ಏಜೆನ್ಸೀಸ್​)

https://www.vijayavani.net/s-lady-behead-by-youth-horrible-incident-in-vijayapura/

https://www.vijayavani.net/s-woman-refuses-to-use-deodorant-as-she-loves-the-smell-of-sweat/

https://www.vijayavani.net/s-up-baby-comes-out-alive-from-womb/