ಮುಂಬೈ: ಪ್ರಧಾನಿ ಮೋದಿ ಅವರನ್ನು ಭೇಟಿಯಾಗಲು ಹಲವಾರು ತಿಂಗಳುಗಳಿಂದ ಕಾಯುತ್ತಿದ್ದ 10 ವರ್ಷದ ಬಾಲಕಿ ಅನಿಶಾ ಪಾಟೀಲ್ ಕನಸು ಕೊನೆಗೂ ಈಡೇರಿದೆ. ಮಹಾರಾಷ್ಟ್ರದ ಅಹ್ಮದ್ನಗರದ ಬಿಜೆಪಿ ಸಂಸದ ಡಾ.ಸುಜಯ್ ವಿಖೆ ಪಾಟೀಲ್ ಮಗಳಾಗಿರುವ ಅನಿಶಾ ಮೋದಿಯವರನ್ನು ಭೇಟಿ ಮಾಡಿಸುವಂತೆ ತಂದೆಗೆ ಹೇಳಿ ಹೇಳಿ ಸಾಕಾಗಿ ತಾನೇ ಕೊನೆಗೆ ಇ-ಮೇಲ್ ಕಳುಹಿಸಿದ್ದಾಳೆ.
‘ನಾನು ಪ್ರಧಾನಿ ಮೋದಿ ಅವರನ್ನು ಭೇಟಿಯಾಗಬೇಕು. ನನ್ನನ್ನು ನಿನ್ನೊಂದಿಗೆ ಕರೆದುಕೊಂಡು ಹೋಗು’ ಎಂದು ಅಪ್ಪನನ್ನು ಸದಾ ಪೀಡಿಸುತ್ತಿದ್ದಳು ಅನಿಶಾ. ಆದರೆ ಪ್ರಧಾನಿ ಅವರನ್ನು ಭೇಟಿಯಾಗುವುದು ಅಷ್ಟು ಸುಲಭವಲ್ಲ ಎಂದು ಹೇಳುತ್ತಿದ್ದರು ಅಪ್ಪ. ಇನ್ನು ಅಪ್ಪನಿಂದ ಕೆಲಸ ಆಗುವುದಿಲ್ಲ ಎಂದು ತಿಳಿದುಕೊಂಡ ಈ ಪುಟಾಣಿ ಅಪ್ಪನ ಲ್ಯಾಪ್ಟಾಪ್ ಹಿಡಿದು ಅವರ ಮೇಲ್ನಿಂದ ತಾನೇ ಮೇಲ್ ಕಳುಹಿಸಿದ್ದಾಳೆ.
ನನಗೆ ನೀವು ಎಂದರೆ ತುಂಬಾ ಇಷ್ಟ. ಡ್ಯಾಡಿಗೆ ಹೇಳಿದ್ರೂ ನಿಮ್ಮನ್ನು ಭೇಟಿ ಮಾಡಿಸುತ್ತಿಲ್ಲ, ಪ್ಲೀಸ್ ನನ್ನನ್ನು ಮೀಟ್ ಆಗಿ ಎಂದು ಮೇಲ್ ಮಾಡಿದ್ದಾಳೆ ಅನಿಶಾ. ಇದನ್ನು ನೋಡಿದ ಪ್ರಧಾನಿ ಮೋದಿಯವರು ತುಂಬಾ ಖುಷಿಯಿಂದ ‘ದೌಡ್ ಕೆ ಆವೋ ಬೇಟಿ’ (ಓಡಿ ಬಾ ಮಗಳೇ) ಎಂದು ರಿಪ್ಲೈ ಮಾಡಿದ್ದಾರೆ. ಇದನ್ನು ಓದುತ್ತಲೇ ಖುಷಿಯಿಂದ ಜಿಗಿದಾಡಿದ ಬಾಲಕಿ ಈ ಇ-ಮೇಲ್ ಅನ್ನು ಅಪ್ಪನಿಗೆ ತೋರಿಸಿದ್ದಾಳೆ. ನಂತರ ಅವಳ ಹಠಕ್ಕೆ ಮಣಿದು ತಂದೆ ಮೋದಿಯವರ ಅಪಾಯಿಮಟ್ಮೆಂಟ್ ತೆಗೆದುಕೊಂಡು ಅವರನ್ನು ಭೇಟಿ ಮಾಡಿಸಿದ್ದಾರೆ.
ವರ್ಷಗಳ ಕನಸು ನನಸಾದ ಖುಷಿಯಲ್ಲಿ ಓಡೋಡಿ ಪ್ರಧಾನಿಯವರ ಬಳಿ ಸಾಗಿದ ಬಾಲಕಿ, ಅವರ ಬಳಿ ಬಂದು, ಅಂಕಲ್ ಅಂಕಲ್ ನೀವು ಗುಜರಾತ್ನವರು ಅಲ್ವಾ? ನೀವ್ಯಾಕೆ ಪ್ರಧಾನಿ ಹುದ್ದೆಯಿಂದ ಇನ್ನೂ ಮೇಲಿನ ಹುದ್ದೆಗೆ ಹೋಗಿ ರಾಷ್ಟ್ರಪತಿಯಾಗಬಾರದು? ನೀವೆಂದರೆ ನನಗೆ ತುಂಬಾ ಇಷ್ಟ ಎಂದಿದ್ದಾಳೆ. ಮುದ್ದು ಮಾತಿನಲ್ಲಿ ಈ ಪ್ರಶ್ನೆ ಕೇಳಿದ್ದಕ್ಕೆ ಪ್ರಧಾನಿ ಮೋದಿಯಾದಿಯಾಗಿ ಅಲ್ಲಿದ್ದವರೆಲ್ಲ ನಗೆಗಡಲಿನಲ್ಲಿ ತೇಲಿಹೋಗಿದ್ದಾರೆ.
ಅನಿಶಾ ಪ್ರಧಾನಿ ಅವರನ್ನು ಭೇಟಿಯಾಗಿರುವ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ನಾಸಾದಿಂದ ಬಂದಿದೆ ಆಘಾತಕಾರಿ ವರದಿ: ಕರ್ನಾಟಕದ ಊರು ಸೇರಿದಂತೆ ಭಾರತದ 12 ನಗರ ಮುಳುಗಡೆ
ರೋಹಿಣಿ ಸಿಂಧೂರಿಗೆ ಎದುರಾಯ್ತು ಮತ್ತೊಂದು ಸಂಕಷ್ಟ: ಅಮಾನತಿಗೆ ಕೋರಿ ಕೇಸ್ ದಾಖಲು