ರಾಯಪುರ (ಛತ್ತೀಸಗಢ): ಹಸುವಿನ ಕಳ್ಳತನವಾಗುವ ವಿಷಯ ಹೊಸತೇನಲ್ಲ, ಆದರೆ ಛತ್ತೀಸಗಢದ ರಾಯಪುರದಲ್ಲಿ ಸೆಗಣಿ ಕಳ್ಳತನ ಹೆಚ್ಚಾಗತೊಡಗಿದೆ.
ನಾಲ್ಕೈದು ದಿನಗಳಿಂದ ಈ ಕಳ್ಳತನ ಹೆಚ್ಚಾಗಿದ್ದು, ಇದುವರೆಗೆ ರೈತಾಪಿ ಜನರು ಕೂಡಿಟ್ಟಿರುವ 100ಕೆ.ಜಿಗೂ ಅಧಿಕ ಸೆಗಣಿಗಳು ಕಳ್ಳತನವಾಗಿವೆ. ಹಸುವನ್ನು ಕದಿಯುವವರು ಬಲು ಚಾಣಾಕ್ಷಕರು, ತುಂಬಾ ನುರಿತ ಕಳ್ಳರೂ ಆಗಿರಬೇಕು. ಆದರೆ ಸೆಗಣಿ ಕದಿಯುವುದು ಸುಲಭ ಎಂಬ ಕಾರಣಕ್ಕೆ ಇದರ ಕಳ್ಳತನ ಮಾಡುವ ದೊಡ್ಡ ಗ್ಯಾಂಗ್ ಹುಟ್ಟಿಕೊಂಡುಬಿಟ್ಟಿದೆ!
ಅಷ್ಟಕ್ಕೂ ಸೆಗಣಿಯ ಮೇಲೆ ಕಳ್ಳರಿಗೆ ಈ ಪರಿಯ ಪ್ರೀತಿ ಹುಟ್ಟಲು ಕಾರಣವೆಂದರೆ ಛತ್ತೀಸಗಢ ಸರ್ಕಾರವು ಜೂನ್ 25ರಂದು ಗೋಧನ್ ನ್ಯಾಯ ಯೋಜನೆ ಎನ್ನುವ ಯೋಜನೆಯನ್ನು ಆರಂಭಿಸಿರುವುದು. ಸಾವಯವ ವಿಧಾನದಲ್ಲಿ ಕೃಷಿ ಬೆಳೆಯುವುದನ್ನು ಉತ್ತೇಜಿಸುವ ಸಲುವಾಗಿ ಇಂಥದ್ದೊಂದು ಯೋಜನೆಯನ್ನು ಸರ್ಕಾರ ಆರಂಭಿಸಿದೆ.
ಈ ಯೋಜನೆಯ ಭಾಗವಾಗಿ ಇದೀಗ ಕೃಷಿಕರಿಂದ ರಾಜ್ಯ ಸರ್ಕಾರ ಹಸುವಿನ ಸೆಗಣಿ ಖರೀದಿಗೆ ಮುಂದಾಗಿದೆ. ಪ್ರತಿ ಕಿಲೋಗ್ರಾಂಗೆ 2 ರೂಪಾಯಿಗಳಂತೆ ಸೆಗಣಿ ಖರೀದಿಸಲು ಯೋಜನೆ ರೂಪಿಸಲಾಗಿದೆ.
ಸರ್ಕಾರಕ್ಕೆ ಕೊಡುವ ಸಲುವಾಗಿ ರೈತರೆಲ್ಲಾ ಸೇರಿ 100 ಕೆ.ಜಿಗೂ ಅಧಿಕ ಸೆಗಣಿಯನ್ನು ಸಂಗ್ರಹಿಸಿ ಇಟ್ಟಿದ್ದರು. ಅದು ದಿಢೀರ್ ಕಣ್ಮರೆಯಾಗಿಬಿಟ್ಟಿದೆ. ಮಾತ್ರವಲ್ಲದೇ ಮನೆಗಳಿಂದಲೂ ಸೆಗಣಿ ಕಾಣೆಯಾಗುತ್ತಿರುವ ಪ್ರಕರಣಗಳು ಇಲ್ಲಿ ನಡೆಯುತ್ತಿವೆ.
