ಹೈದರಾಬಾದ್: ಎಸ್.ಎಸ್. ರಾಜಮೌಳಿ ನಿರ್ದೇಶನದ ಬಹುನಿರೀಕ್ಷಿತ ‘ಆರ್ಆರ್ಆರ್’ ಚಿತ್ರದ ಚಿತ್ರೀಕರಣ ಕೆಲವು ದಿನಗಳ ಹಿಂದೆ ಪ್ರಾರಂಭವಾಗಿದೆ. ಈ ಮಧ್ಯೆ, ಅಕ್ಟೋಬರ್ 22ರಂದು ಇನ್ನೊಂದು ಟೀಸರ್ ಬಿಡುಗಡೆ ಮಾಡುವುದಾಗಿ ಚಿತ್ರತಂಡ ಘೋಷಿಸಿತ್ತು. ಅದರಂತೆ ಜೂ. ಎನ್ಟಿಆರ್ ಅವರನ್ನು ಪರಿಚಯಿಸುವ ಟೀಸರ್ ಬಿಡುಗಡೆಯಾಗಿದೆ. ಆದರೆ, ಈ ಟೀಸರ್ ವಿಚಾರದಲ್ಲಿ ಗೆದ್ದಿದ್ದು ಮಾತ್ರ ಜೂ. ಎನ್ಟಿಆರ್!
ಇದನ್ನೂ ಓದಿ: ‘ಬ್ಲಾಂಕ್’ ಆಗಿದ್ದಾರೆ ಕೃಷಿ ತಾಪಂಡ … ಮುಂದೇನು?
ಹೌದು, ಮಾರ್ಚ್ 27ರಂದು ರಾಮ್ಚರಣ್ ತೇಜ ಅವರ ಭೀಮ್ ಫಾರ್ ರಾಮರಾಜು ಪಾತ್ರವನ್ನು ಪರಿಚಯಿಸುವ ವಿಡಿಯೋ ಟೀಸರ್ ಬಿಡುಗಡೆ ಆಗಿತ್ತು. ಆ ಟೀಸರ್ಗೆ 24 ಗಂಟೆಯಲ್ಲಿ ತೆಲುಗು ಅವತರಣಿಕೆಯನ್ನು 7 ಮಿಲಿಯನ್ ಜನರಿಂದ ವೀಕ್ಷಣೆಯಾಗಿತ್ತು. ಎಲ್ಲ ಭಾಷೆಗಳ ಟೀಸರ್ ಸೇರಿದರೆ, 24 ಗಂಟೆಗಳಲ್ಲಿ 15 ಮಿಲಿಯನ್ ವೀಕ್ಷಣೆ ಕಂಡಿತ್ತು. ಈಗ ಆ ದಾಖಲೆಯನ್ನು ಜೂ.ಎನ್ಟಿಆರ್ ಟೀಸರ್ ಮುರಿದಿದೆ.
ಹೌದು, ಅ. 22ರಂದು ಜೂ. ಎನ್ಟಿಆರ್ ಪಾತ್ರ ಪರಿಚಯಿಸುವ ಟೀಸರ್ ಬಿಡುಗಡೆಯಾಗಿದೆ. ಕೇವಲ 24 ಗಂಟೆಗಳಲ್ಲಿ ತೆಲುಗು ಟೀಸರ್ವೊಂದೆ ಬರೋಬ್ಬರಿ 14 ಮಿಲಿಯನ್ ವೀಕ್ಷಣೆ ದಾಖಲಿಸಿದೆ. ಈ ಮೂಲಕ ರಾಮ್ಚರಣ್ ಅವರನ್ನು ಹಿಂದಿಕ್ಕಿ ಎನ್ಟಿಆರ್ ಮುನ್ನುಗ್ಗಿದ್ದಾರೆ.
ಇದನ್ನೂ ಓದಿ: ಪಾತ್ರ ಮಾಡಿದ್ದಷ್ಟೇ ಅಲ್ಲ, ಕನ್ನಡದಲ್ಲಿ ಮಾತಾಡಿದ್ರಂತೆ ಬಾಬು …
ಈ ಹಿಂದೆ, ರಾಮ್ಚರಣ್ ಅವರ ಟೀಸರ್ಗೆ ಜ್ಯೂನಿಯರ್ ಎನ್ಟಿಆರ್ ಧ್ವನಿ ನೀಡಿದ್ದರು. ಇದೀಗ ಜ್ಯೂನಿಯರ್ ಎನ್ಟಿಆರ್ ಟೀಸರ್ಗೆ ರಾಮ್ಚರಣ್ ತೇಜ ಧ್ವನಿ ನೀಡಿದ್ದಾರೆ. ಅಷ್ಟೇ ಅಲ್ಲ, ಟೀಸರ್ ತೆಲುಗು, ಕನ್ನಡ ಸೇರಿದಂತೆ ಬೇರೆ ಭಾಷೆಗಳಲ್ಲಿ ಸಹ ಬಿಡುಗಡೆಯಾಗಿದ್ದು, ಎಲ್ಲಾ ಭಾಷೆಗಳಿಗೂ ರಾಮ್ಚರಣ್ ಧ್ವನಿ ನೀಡಿದ್ದಾರೆ. ಈಗಾಗಲೇ ಈ ಟೀಸರ್ಗಳು ಯೂಟ್ಯೂಬ್ನಲ್ಲಿ ಸಖತ್ ವೀಕ್ಷಣೆ ಕಾಣುತ್ತಿವೆ.