ಲಂಡನ್: ಸುಮಾರು 60 ವರ್ಷಗಳ ಹಿಂದೆ 7 ಸಾವಿರ ರೂಪಾಯಿಗೆ ಖರೀದಿಸಿದ್ದ ರೊಲೆಕ್ಸ್ ವಾಚ್, ಪ್ರಸ್ತುತ ನಡೆದ ಹರಾಜಿನಲ್ಲಿ ದಾಖಲೆಯ ಬೆಲೆಗೆ ಮಾರಾಟವಾಗುವ ಮೂಲಕ ಎಲ್ಲರ ಹುಬ್ಬೇರುವಂತೆ ಮಾಡಿದೆ.
ರೊಲೆಕ್ಸ್ ವಾಚ್ ಅನ್ನು 1964ರಲ್ಲಿ 7000 ರೂ.ಗೆ ಖರೀಸಿದಲಾಗಿತ್ತು. ಇದೀಗ ಯುನೈಟೆಡ್ ಕಿಂಗ್ಡಮ್ನಲ್ಲಿ ನಡೆದ ಹರಾಜಿನಲ್ಲಿ 41,11,692 ರೂಪಾಯಿಗೆ ಮಾರಾಟವಾಗಿದೆ.
ಇದನ್ನೂ ಓದಿ: ಅಪಘಾತವಾಗಿ ಒಂದು ಗಂಟೆಯಾದ್ರೂ ಬಾರದ ಆಂಬ್ಯುಲೆನ್ಸ್: ರಸ್ತೆಯಲ್ಲೇ ಒದ್ದಾಡಿ ಪ್ರಾಣ ಬಿಟ್ಟ ಯುವಕ
ಮೊಟ್ಟ ಮೊದಲ ಡೈವರ್ಸ್ ವಾಚ್
ಇದು ರೊಲೆಕ್ಸ್ ಸಬ್ಮರಿನರ್ ಮಾಡೆಲ್ ವಾಚ್ ಆಗಿದ್ದು, ದಿ ಡೈವರ್ಸ್ ವಾಚ್ ಎಂತಲೂ ಕರೆಯುತ್ತಾರೆ. ಇದನ್ನು 1953ರಲ್ಲಿ ಮೊದಲ ಬಾರಿಗೆ ಲಾಂಚ್ ಮಾಡಲಾಯಿತು. ಇದು ಮೊಟ್ಟ ಮೊದಲ ಡೈವರ್ಸ್ ಕೈ ಗಡಿಯಾರವಾಗಿದೆ. ಇದು 100 ಮೀಟರ್ (330 ಅಡಿ) ಆಳದ ವಾಟರ್ಪ್ರೂಫ್ ವಾಚ್ ಆಗಿತ್ತು. ಪ್ರಸ್ತುತ 300 ಮೀಟರ್ (1,000 ಅಡಿ) ಆಳದವರೆಗೂ ವಾಟರ್ಪ್ರೂಫ್ ಸಾಮರ್ಥ್ಯ ಹೊಂದಿದೆ.
ಡೈವರ್ ಆಗಿದ್ದ ಸಿಮನ್
ಬಿಬಿಸಿ ಪ್ರಕಾರ ಸಿಮನ್ ಬಾರ್ನೆಟ್ ಎಂಬುವರು ಈ ವಾಚ್ ಅನ್ನು ಮೊದಲು ಖರೀದಿ ಮಾಡಿದ್ದರು. ಡೈವರ್ ಆಗಿದ್ದ ಸಿಮನ್, ರಾಯಲ್ ನೌಕಾಪಡೆಯಲ್ಲಿ ಹೆಲಿಕಾಪ್ಟರ್ ರಕ್ಷಣಾ ತಂಡದಲ್ಲಿ ಕೆಲಸ ಮಾಡುತ್ತಿದ್ದರು. 2019ರಲ್ಲಿ ಸಿಮನ್ ಮೃತಪಟ್ಟರು. ಬಳಿಕ ಈ ವಾಚ್ ಅವರ ಮಗ ಪೀಟೆ ಬರ್ನೆಟ್ ಬಳಿಯಿತ್ತು. ಇದೀಗ ಅದನ್ನು ಯುನೈಟೆಡ್ ಕಿಂಗ್ಡಮ್ನ ನಾರ್ಫೋಲ್ಕ್ ಕೌಂಟಿಯ ಡಿಸ್ ಪಟ್ಟಣದಲ್ಲಿ ಹರಾಜು ಹಾಕಲಾಯಿತು. ಅಂತಿಮವಾಗಿ ವಾಚ್ 41 ಲಕ್ಷ ರೂ.ಗೆ ಮಾರಾಟವಾಯಿತು.
ನೌಕಾಪಡೆಯಲ್ಲಿ ಸೇವೆ ಸಲ್ಲಿಸುವಾಗ ರಕ್ಷಣಾ ಕಾರ್ಯನಿಮಿತ್ತ ನೀರಿಗೆ ಧುಮುಕಲು ಈ ವಾಚ್ ಅನ್ನು ನನ್ನ ತಂದೆ ಬಳಸುತ್ತಿದ್ದರು ಎಂದು ಮಗ ಪೀಟೆ ಬರ್ನೆಟ್ ಹೇಳಿದ್ದಾರೆ.
ಏಕೈಕ ಸಾಧನ
ತಾನು ಎಷ್ಟು ಸಮಯದವರೆಗೆ ನೀರಿನ ಅಡಿಯಲ್ಲಿ ಇದ್ದೇನೆ ಎಂದು ತಿಳಿದುಕೊಳ್ಳಬೇಕಾಗಿತ್ತು. ಆ ಸಮಯದಲ್ಲಿ ಈ ವಾಚ್ ಏಕೈಕ ಸಾಧನವಾಗಿತ್ತು. ಆ ದಿನಗಳಲ್ಲಿ ರೊಲೆಕ್ಸ್ ಒಂದು ಜಲಾಂತರ್ಗಾಮಿ ಸಾಧನವಾಗಿತ್ತು. ಆದರೆ ಈಗ ಅದೊಂದು ಫ್ಯಾಷನ್ ಪರಿಕರವಾಗಿದೆ ಎಂದು ಪೀಟೆ ಬರ್ನೆಟ್ ತಿಳಿಸಿದ್ದಾರೆ. (ಏಜೆನ್ಸೀಸ್)
ಮತ ಎಣಿಕೆ ಹಿನ್ನೆಲೆಯಲ್ಲಿ ನಾಳೆ ಸೆಕ್ಷನ್ 144 ಜಾರಿ; ಯಾವುದಕ್ಕೆಲ್ಲ ವಿನಾಯಿತಿ?
ಸ್ಪ್ಯಾಮ್ ಕರೆ ತಡೆಗಟ್ಟಲು ಟ್ರೂ ಕಾಲರ್ ಜತೆ ಕೈ ಜೋಡಿಸಿದ ವಾಟ್ಸ್ಆ್ಯಪ್!