ಆಸಿಸ್​ ನೆಲದಲ್ಲಿ ಅಬ್ಬರಿಸಿದ ರೋಕೊ ಜೋಡಿ ಮತ್ತೆ ಮೈದಾನಕ್ಕೆ ಇಳಿಯವುದು ಯಾವಾಗ? ಇಲ್ಲಿದೆ ಮುಂದಿನ ಪಂದ್ಯಗಳ ಪಟ್ಟಿ... Rohit Sharma and Virat Kohli

ನವದೆಹಲಿ: ಸುಮಾರು ಏಳು ತಿಂಗಳ ದೀರ್ಘ ವಿರಾಮದ ಬಳಿಕ ಟೀಮ್ ಇಂಡಿಯಾದ ದಿಗ್ಗಜರಾದ ರೋಹಿತ್ ಶರ್ಮ ಮತ್ತು ವಿರಾಟ್ ಕೊಹ್ಲಿ ( Rohit Sharma and Virat Kohli ) ಇತ್ತೀಚೆಗಷ್ಟೇ ಮುಕ್ತಾಯಗೊಂಡ ಆತಿಥೇಯ ಆಸ್ಟ್ರೇಲಿಯಾ ವಿರುದ್ಧದ ಏಕದಿನ ಸರಣಿಯಲ್ಲಿ ಮರುಪ್ರವೇಶ ಮಾಡಿದ್ದು ನಿಮಗೆಲ್ಲ ಗೊತ್ತೇ ಇದೆ. ಟಿ20 ಮತ್ತು ಟೆಸ್ಟ್ ಪಂದ್ಯಗಳಿಂದ ನಿವೃತ್ತಿ ಘೋಷಿಸಿರುವ ಈ ಜೋಡಿ ಪ್ರಸ್ತುತ ಏಕದಿನ ಪಂದ್ಯಗಳನ್ನು ಮಾತ್ರ ಆಡುತ್ತಿದೆ. 2027ರ ಏಕದಿನ ವಿಶ್ವಕಪ್ ಆಡುವುದು ರೋಕೊ ಜೋಡಿಯ ಏಕೈಕ ಗುರಿಯಾಗಿದೆ. ಇದಕ್ಕಾಗಿ ಅವರಿಬ್ಬರು ತಮ್ಮದೇಯಾದ ಯೋಜನೆಗಳನ್ನು ಸಹ ರೂಪಿಸಿಕೊಂಡಿದ್ದಾರೆ.

ರೋಕೊ ಜೋಡಿಯ ಮುಂದಿನ ಗುರಿ ದಕ್ಷಿಣ ಆಫ್ರಿಕಾ ವಿರುದ್ಧದ ಏಕದಿನ ಸರಣಿ. ಈ ಸರಣಿ ತವರು ನೆಲದಲ್ಲಿ ನಡೆಯಲಿದೆ. ಒಟ್ಟು ಮೂರು ಏಕದಿನ ಪಂದ್ಯಗಳು ನವೆಂಬರ್ 30, ಡಿಸೆಂಬರ್ 3 ಮತ್ತು 6 ರಂದು ರಾಂಚಿ, ರಾಯ್‌ಪುರ ಮತ್ತು ವೈಜಾಗ್‌ನಲ್ಲಿ ನಡೆಯಲಿವೆ. ರೋಹಿತ್ ಮತ್ತು ಕೊಹ್ಲಿ ಈ ಸರಣಿಯಲ್ಲೂ ಮಿಂಚುವ ಸಾಧ್ಯತೆಯಿದೆ. ಏಕೆಂದರೆ, ಅವರಿಬ್ಬರು ತವರು ನೆಲದಲ್ಲಿ ನಡೆದಿರುವ ಏಕದಿನ ಪಂದ್ಯಗಳಲ್ಲಿ ಉತ್ತಮ ದಾಖಲೆಯನ್ನು ಹೊಂದಿದ್ದಾರೆ. ಯಾವುದೇ ಎದುರಾಳಿ ತಂಡವು ರೋಕೊ ಜೋಡಿಯನ್ನು ತವರು ನೆಲದಲ್ಲಿ ತಡೆಯುವುದು ಅಸಾಧ್ಯ ಎಂದು ಪರಿಗಣಿಸಲಾಗಿದೆ.

ಇತ್ತೀಚಿನ ಆಸ್ಟ್ರೇಲಿಯಾ ವಿರುದ್ಧದ ಸರಣಿಯಲ್ಲಿ ರೋಹಿತ್ ಶರ್ಮ ಸೂಪರ್ ಹಿಟ್ ಪ್ರದರ್ಶನ ನೀಡಿದರು. ಒಟ್ಟು 3 ಪಂದ್ಯಗಳಲ್ಲಿ ಒಂದು ಶತಕ ಮತ್ತು ಅರ್ಧಶತಕದ ಸಹಾಯದಿಂದ 202 ರನ್ ಗಳಿಸಿದರು. ಭಾರತ 1-2 ಅಂತರದಲ್ಲಿ ಸರಣಿಯನ್ನು ಸೋತರೂ, ರೋಹಿತ್ ಅವರ ಪ್ರದರ್ಶನ ಮಾತ್ರ ಎಲ್ಲರ ಮೆಚ್ಚುಗೆಗೆ ಪಾತ್ರವಾಯಿತು. ವಿಶೇಷವಾಗಿ, ಕೊನೆಯ ಏಕದಿನ ಪಂದ್ಯದಲ್ಲಿ ರೋಹಿತ್ ಅವರ ಶತಕ, ಟೀಕಾಕಾರರ ಬಾಯಿಯನ್ನು ಮುಚ್ಚಿಸಿತು.

ಸಾಕಷ್ಟು ತೂಕ ಇಳಿಸಿಕೊಂಡು ಫಿಟ್‌ನೆಸ್ ಸುಧಾರಿಸಿಕೊಂಡಿರುವ ರೋಹಿತ್, ಆಸಿಸ್​ ವಿರುದ್ಧದ ಕೊನೆಯ ಏಕದಿನ ಪಂದ್ಯದಲ್ಲಿ ಸುಲಭವಾಗಿ ಶಾಟ್‌ಗಳನ್ನು ಆಡಿದರು. ಅವರ ಆಟ ಹೇಗಿತ್ತು ಅಂದರೆ ಆರಂಭ ದಿನದ ರೋಹಿತ್ ನೆನಪಾದರು. ಎರಡನೇ ಏಕದಿನ ಪಂದ್ಯದಲ್ಲೂ ರೋಹಿತ್ ಅದ್ಭುತ ಇನ್ನಿಂಗ್ಸ್ ಆಡಿದರು. ಅವರು ತಮ್ಮ ಸ್ಫೋಟಕ ಬ್ಯಾಟಿಂಗ್​ ಶೈಲಿಗೆ ವಿರುದ್ಧವಾಗಿ, ಕಠಿಣ ಪಿಚ್‌ನಲ್ಲಿ ಬಹಳ ತಾಳ್ಮೆಯಿಂದ ಬ್ಯಾಟಿಂಗ್ ಮಾಡಿದರು ಮತ್ತು ಅರ್ಧಶತಕ ಸಿಡಿಸಿದರು.

ಈ ಎರಡು ಇನ್ನಿಂಗ್ಸ್‌ಗಳ ನಂತರ, ರೋಹಿತ್ ಅವರ ಭವಿಷ್ಯದ ಬಗ್ಗೆ ಚರ್ಚೆ ಹುಟ್ಟಿಕೊಂಡಿವೆ. ಪ್ರಸ್ತುತ 38 ವರ್ಷ ವಯಸ್ಸಿನ ರೋಹಿತ್, 2027ರ ವಿಶ್ವಕಪ್ ವೇಳೆಗೆ 40ರ ಹರೆಯದಲ್ಲಿರುತ್ತಾರೆ. ಆ ವಯಸ್ಸಿನಲ್ಲಿ ಅವರು ಹೇಗೆ ಆಡಬಲ್ಲರು ಎಂದು ಹಲವರು ಅನುಮಾನ ವ್ಯಕ್ತಪಡಿಸಿದ್ದರು. ಆದರೆ, ರೋಹಿತ್ ತಮ್ಮ ಅದ್ಭುತ ಪ್ರದರ್ಶನದ ಮೂಲಕ ಆ ಅನುಮಾನಗಳಿಗೆ ಅಂತ್ಯವಾಡಿದ್ದಾರೆ. ಹೀಗೆಯೇ ಫಿಟ್ನೆಸ್ ಕಾಯ್ದುಕೊಂಡರೆ 40 ವರ್ಷ ಅಲ್ಲ, ಇನ್ನೂ ಐದು ವರ್ಷ ಆಡಬಹುದು ಎಂಬ ಸೂಚನೆಗಳನ್ನು ರೋಹಿತ್​ ನೀಡಿದ್ದಾರೆ. ಒಟ್ಟಾರೆಯಾಗಿ, ಆಸ್ಟ್ರೇಲಿಯಾ ಸರಣಿಯಲ್ಲಿ ಹಿಟ್ ಆಗಿರುವ ರೋಹಿತ್, 2027ರ ವಿಶ್ವಕಪ್‌ಗೆ ಸಿದ್ಧ ಎಂಬ ಖಡಕ್​ ಸಂದೇಶವನ್ನು ರವಾನಿಸಿದ್ದಾರೆ.

ಇದನ್ನೂ ಓದಿ: ಪರಿಸ್ಥಿತಿ ಏನೇ ಇರಲಿ ಈ 3 ರಾಶಿಯವರು ಸತ್ಯವನ್ನೇ ಮಾತನಾಡುತ್ತಾರಂತೆ! ನೀವೂ ಇದೇ ರಾಶಿನಾ? Zodiac Signs

ಘನತೆ ಉಳಿಸಿಕೊಂಡ ಕೊಹ್ಲಿ

ಆಸ್ಟ್ರೇಲಿಯಾ ಸರಣಿಯಲ್ಲಿ ರೋಹಿತ್ ಸೂಪರ್​ ಹಿಟ್ ಪ್ರದರ್ಶನ ನೀಡಿದರು. ಅದೇ ರೀತಿ ಕೊಹ್ಲಿ ಕೂಡ ತಮ್ಮ ಘನತೆಯನ್ನು ಉಳಿಸಿಕೊಂಡಿದ್ದಾರೆ. ಮೊದಲ ಎರಡು ಏಕದಿನ ಪಂದ್ಯಗಳಲ್ಲಿ ಶೂನ್ಯಕ್ಕೆ ಔಟ್ ಆದರು ಕೂಡ ಮೂರನೇ ಏಕದಿನ ಪಂದ್ಯದಲ್ಲಿ ರೋಹಿತ್ ಜೊತೆಗೆ ಪಂದ್ಯ ಗೆಲ್ಲುವ ಇನ್ನಿಂಗ್ಸ್ (ಅಜೇಯ 74) ಆಡುವ ಮೂಲಕ ಕೊಹ್ಲಿ ತಮ್ಮ ಘನತೆ ಉಳಿಸಿಕೊಂಡರು. ಈ ಇನ್ನಿಂಗ್ಸ್ ಕೊಹ್ಲಿಯ ಭವಿಷ್ಯದ ಬಗ್ಗೆ ಇದ್ದ ಅನುಮಾನಗಳಿಗೆ ತೆರೆ ಎಳೆಯಿತು. ಕೊಹ್ಲಿ 2027ರ ವಿಶ್ವಕಪ್‌ಗೆ ಸಿದ್ಧ ಎಂಬ ಸಂದೇಶವನ್ನು ಕಳುಹಿಸಿದ್ದಾರೆ. ಫಿಟ್‌ನೆಸ್ ವಿಷಯದಲ್ಲಿ ಯಾವಾಗಲೂ ಪರಿಪೂರ್ಣರಾಗಿರುವ ಕೊಹ್ಲಿ, ತಮ್ಮ ಫಾರ್ಮ್ ಅನ್ನು ಉಳಿಸಿಕೊಂಡರೆ ಇನ್ನೂ ನಾಲ್ಕರಿಂದ ಐದು ವರ್ಷಗಳ ಕಾಲ ಸುಲಭವಾಗಿ ಆಡಬಹುದು. ಒಟ್ಟಾರೆಯಾಗಿ, ಈ ಸರಣಿಯು ರೋಹಿತ್ ಮತ್ತು ಕೊಹ್ಲಿಯ ಭವಿಷ್ಯದ ಬಗ್ಗೆ ಅನುಮಾನಗಳಿಗೆ ಅಂತ್ಯ ಹಾಡಿದೆ. ಅವರು ವಿಶ್ವಕಪ್​ವರೆಗೆ ಸುಲಭವಾಗಿ ಮುಂದುವರಿಯಬಹುದು.

ಈ ಮಧ್ಯೆ ರೋಕೊ ಜೋಡಿ ಆಡುವ ಸಾಧ್ಯತೆಯಿರುವ ಏಕದಿನ ಪಂದ್ಯಗಳ ಬಗ್ಗೆ ತಿಳಿಯೋಣ. ದಕ್ಷಿಣ ಆಫ್ರಿಕಾ ವಿರುದ್ಧದ ತವರಿನಲ್ಲಿ ನಡೆಯುವ ಸರಣಿಯ ನಂತರ, ಮುಂದಿನ ವರ್ಷ ನ್ಯೂಜಿಲೆಂಡ್ ವಿರುದ್ಧದ ಮೂರು ಪಂದ್ಯಗಳ ಸರಣಿಯನ್ನು ತವರಿನಲ್ಲಿ ಆಡಲಾಗುತ್ತದೆ. ಇದರ ನಂತರ, ಅಫ್ಘಾನಿಸ್ತಾನ, ಭಾರತ ಪ್ರವಾಸವನ್ನು ಮಾಡಿ ಏಕದಿನ ಪಂದ್ಯಗಳನ್ನು ಆಡಲಿದೆ. ಅದರ ನಂತರ, ಭಾರತ ಇಂಗ್ಲೆಂಡ್ ಮತ್ತು ಬಾಂಗ್ಲಾದೇಶದಲ್ಲಿ ಏಕದಿನ ಸರಣಿಯನ್ನು ಆಡಲಿದೆ. ಇದಾದ ಬಳಿಕ ವೆಸ್ಟ್ ಇಂಡೀಸ್, ಭಾರತ ಪ್ರವಾಸ ಮಾಡಿ ಏಕದಿನ ಪಂದ್ಯಗಳನ್ನು ಆಡಲಿದೆ. ನಂತರ, ಭಾರತ ನ್ಯೂಜಿಲೆಂಡ್ ಪ್ರವಾಸ ಮಾಡಿ ಏಕದಿನ ಪಂದ್ಯಗಳನ್ನು ಆಡಲಿದೆ. 2027 ರ ಏಕದಿನ ವಿಶ್ವಕಪ್‌ಗೂ ಕೆಲವು ತಿಂಗಳ ಮೊದಲು ಭಾರತ, ಶ್ರೀಲಂಕಾ ವಿರುದ್ಧ ತವರಿನಲ್ಲಿ ಏಕದಿನ ಪಂದ್ಯಗಳನ್ನು ಆಡಲಿದೆ. ಈ ಎಲ್ಲಾ ಸರಣಿಗಳಲ್ಲಿ ರೋಕೊ ಆಡುತ್ತಾರೆಯೇ ಎಂಬುದು ಖಚಿತವಿಲ್ಲ, ಆದರೆ, ಹೆಚ್ಚಿನ ಪಂದ್ಯಗಳನ್ನು ಆಡುವ ಸಾಧ್ಯತೆಯಿದೆ. (ಏಜೆನ್ಸೀಸ್​)

https://www.vijayavani.net/actress-childhood-photo-can-you-guess-this-actress-who-presently-star-heroine

https://www.vijayavani.net/kurnool-bus-accident-they-are-terrorists-human-bombs-sajjanars-sensational-comments