ಪ್ರೊಡಕ್ಷನ್​ ಮ್ಯಾನೇಜರ್​ನಿಂದ ಬೇಡಿಕೆಯ ನಟನಾಗುವ ತನಕ ...

ಬೆಂಗಳೂರು: ತಮ್ಮ ವಿಶಿಷ್ಟ್ಯ ಧ್ವನಿ ಮತ್ತು ನಟನೆಯಿಂದ ಎಲ್ಲರ ಗಮನಸೆಳೆದಿದ್ದ ರಾಕ್​ಲೈನ್​ ಸುಧಾಕರ್​ ಇಂದು ಬೆಳಿಗ್ಗೆ 'ಶುಗರ್​ಲೆಸ್​' ಚಿತ್ರದಲ್ಲಿ ನಟಿಸುವ ಸಂದರ್ಭದಲ್ಲಿ ನಿಧನರಾಗಿದ್ದಾರೆ. ಸುಧಾಕರ್​ ಸಾವಿಗೆ ಧನಂಜಯ್​, ಪವನ್​ ಒಡೆಯರ್​, ಪುಷ್ಕರ್​ ಮಲ್ಲಿಕಾರ್ಜುನಯ್ಯ ಸೇರಿದಂತೆ ಹಲವರು ಕಂಬನಿ ಮಿಡಿದಿದ್ದಾರೆ.

ಅಂದಹಾಗೆ, ಸುಧಾಕರ್ ಅವರು ನಟರಾಗಿದ್ದೇ ಒಂದು ಆಕಸ್ಮಿಕ. ಹಾಗೆಯೇ ಅವರ ಹೆಸರಿನ ಹಿಂದೆ ರಾಕ್​ಲೈನ್​ ಎಂಬ ಹೆಸರಿರುವುದನ್ನು ನೋಡಿ ಅವರು ರಾಕ್​ಲೈನ್​ ವೆಂಕಟೇಶ್​ ಅವರ ಸಂಬಂಧಿ ಇರಬಹುದು ಎಂದು ಭಾವಿಸಿದ ಹಲವರಿದ್ದಾರೆ.

ಇದನ್ನೂ ಓದಿ: ಉಸಿರುಗಟ್ಟಿಸಿದ, ಕೂದಲು ಎಳೆದ, ಗೋಡೆಗೆ ನೂಕಿದ; ಪತಿ ನೀಡಿದ ಕಿರುಕುಳ ಬಿಚ್ಚಿಟ್ಟ ಪೂನಂ

ವೆಂಕಟೇಶ್​ ಮತ್ತು ಸುಧಾಕರ್​ ಅವರಿಗೂ ಯಾವುದೇ ರಕ್ತ ಸಂಬಂಧ ಇಲ್ಲ. ಆದರೆ, ಸುಧಾಕರ್​ ಅವರು ರಾಕ್​ಲೈನ್​ ವೆಂಕಟೇಶ್​ ಅವರ ರಾಕ್​ಲೈನ್​ ಪ್ರೊಡಕ್ಷನ್ಸ್​ನಲ್ಲಿ ಪ್ರೊಡಕ್ಷನ್​ ಮ್ಯಾನೇಜರ್​ ಆಗಿ ಕೆಲಸ ನಿರ್ವಹಿಸಿದ್ದರಿಂದ ಅವರಿಗೆ ರಾಕ್​ಲೈನ್​ ಸುಧಾಕರ್​ ಎಂಬ ಹೆಸರು ಬಂದಿದೆ. ಸುಧಾಕರ್​ ಅವರು ರಾಕ್​ಲೈನ್​ ಪ್ರೊಡಕ್ಷನ್ಸ್​ನಲ್ಲಿ ನಿರ್ಮಾಣವಾದ ಹಲವು ಚಿತ್ರಗಳಿಗೆ ಪ್ರೊಡಕ್ಷನ್​ ಮ್ಯಾನೇಜರ್​ ಆಗಿ ಕೆಲಸ ನಿರ್ವಹಿಸಿದ್ದರು. ಅದೇ ಕಾರಣಕ್ಕೆ ಅವರಿಗೆ ಎಲ್ಲರೂ ರಾಕ್​ಲೈನ್​ ಸುಧಾಕರ್​ ಎಂದು ಕರೆಯುತ್ತಿದ್ದರು.

ಪ್ರೊಡಕ್ಷನ್​ ಕೆಲಸಗಳಲ್ಲಿ ತೊಡಗಿಸಿಕೊಂಡಿದ್ದ ಸುಧಾಕರ್​, 'ಡಕೋಟ ಎಕ್ಸ್​ಪ್ರೆಸ್​' ಚಿತ್ರದಲ್ಲೊಂದು ಸಣ್ಣ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಆದರೆ, ಅವರಲ್ಲೊಬ್ಬ ನಟನನ್ನು ಗುರುತಿಸಿದ ಯೋಗರಾಜ್​ ಭಟ್​, ತಮ್ಮ 'ಪಂಚರಂಗಿ' ಚಿತ್ರದಲ್ಲಿ ಒಂದು ಪ್ರಮುಖ ಪಾತ್ರ ಕೊಟ್ಟರು. ಈ ಪಾತ್ರವನ್ನು ಅದ್ಭುತವಾಗಿ ಬಳಿಸಿಕೊಂಡ ಸುಧಾಕರ್​, ಎಲ್ಲರ ಮನಗೆದ್ದರು.

ಇದನ್ನೂ ಓದಿ: ಪೊಲೀಸ್​ ಭರ್ತಿ ಕನಸು ಕಂಡಿದ್ದ ಯುವತಿಗೆ ಸೋನು ಸೂದ್​ ಶ್ರೀರಕ್ಷೆ

ಆ ನಂತರ ಅವರು ಹಿಂದುರಿಗಿ ನೋಡುವ ಪ್ರಮೇಯವೇ ಬರಲಿಲ್ಲ. 'ಲವ್​ ಇನ್​ ಮಂಡ್ಯ', 'ಜೂಮ್​', 'ಕೆಮಿಸ್ಟ್ರಿ ಆಫ್​ ಕರಿಯಪ್ಪ', 'ಮಿಸ್ಟರ್​ ಅಂಡ್​ ಮಿಸಸ್​ ರಾಮಾಚಾರಿ', 'ಅಧ್ಯಕ್ಷ' ಸೇರಿದಂತೆ ಬಹಳ ಕಡಿಮೆ ಸಮಯದಲ್ಲಿ ಸುಧಾಕರ್​ ನೂರಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದರು. ಕನ್ನಡ ಚಿತ್ರರಂಗದಲ್ಲಿ ನಟನಾಗಿ ಜನಪ್ರಿಯರಾದ ಮೇಲೆ ಕ್ರಮೇಣ, ರಾಕ್​ಲೈನ್​ ಸಂಸ್ಥೆಯಿಂದ ಹೊರಬಂದ ಅವರು, ನಂತರದ ವರ್ಷಗಳಲ್ಲಿ ನಟರಾಗಿಯೇ ಗುರುತಿಸಿಕೊಂಡರು.

ಇಂದು ಬೆಳಿಗ್ಗೆ ಹೃದಯಾಘಾತದಿಂದ ನಿಧನರಾದ ಜನಪ್ರಿಯ ಪೋಷಕ ನಟ ರಾಕ್​ಲೈನ್​ ಸುಧಾಕರ್​ ಅವರ ಅಂತ್ಯಕ್ರಿಯೆ ನಾಳೆ ಬೆಳಿಗ್ಗೆ 10 ಗಂಟೆ ಹರಿಶ್ಚಂದ್ರ ಘಾಟ್​ನಲ್ಲಿ ನಡೆಯಲಿದೆ.

https://www.vijayavani.net/sandalwood-actor-rockline-sudhakar-died/