ಮೇ 18ರಂದು ಸಿಎಸ್​ಕೆ ವಿರುದ್ಧ ಆರ್​ಸಿಬಿ ಗೆಲುವು ನಿಶ್ಚಿತ ಪ್ಲೇಆಫ್ ಪ್ರವೇಶ​ ಖಚಿತ! ಇದಕ್ಕೆ ಕೊಹ್ಲಿಯೇ ಸಾಕ್ಷಿ

ನವದೆಹಲಿ: ಪ್ರಸಕ್ತ ಐಪಿಎಲ್ ಟೂರ್ನಿಯು ಅಂತಿಮ ಹಂತಕ್ಕೆ ಬಂದಿದೆ. ಟೂರ್ನಿ ಮುಗಿಯಲು ಇನ್ನೂ ಕೆಲವೇ ದಿನಗಳು ಬಾಕಿ ಇವೆ. ಸದ್ಯ ಎಲ್ಲರ ಗಮನ ಆ ಒಂದು ಪಂದ್ಯದ ಮೇಲಿದೆ. ಹೀಗಾಗಿ ಆ ಪಂದ್ಯದ ಕುರಿತು ಜೋರು ಚರ್ಚೆಗಳು ನಡೆಯುತ್ತಿವೆ. ರಾಜಸ್ಥಾನ ರಾಯಲ್ಸ್ (ಆರ್​ಆರ್​) ಮತ್ತು ಕೋಲ್ಕತ್ತ ನೈಟ್ ರೈಡರ್ಸ್ (ಕೆಕೆಆರ್​) ಈಗಾಗಲೇ ಪ್ಲೇಆಫ್‌ನಲ್ಲಿ ತಮ್ಮ ಸ್ಥಾನವನ್ನು ಖಚಿತಪಡಿಸಿಕೊಂಡಿವೆ. ಇನ್ನುಳಿದ ಎರಡು ಸ್ಥಾನಕ್ಕೆ ಭಾರಿ ಪೈಪೋಟಿ ನಡೆದಿದೆ.

ಸದ್ಯ ಎಲ್ಲರೂ ಮೇ 18ಕ್ಕಾಗಿ ಕಾತರದಿಂದ ಕಾಯುತ್ತಿದ್ದಾರೆ. ಏಕೆಂದರೆ, ಅಂದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್​ಸಿಬಿ) ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್​ಕೆ) ನಡುವೆ ಹೈವೋಲ್ಟೇಜ್​ ಪಂದ್ಯ ನಡೆಯಲಿದೆ. ಇದೊಂದು ರೀತಿಯಲ್ಲಿ ನಾಕೌಟ್​ ಪಂದ್ಯದಂತಿದೆ. ಇದರಲ್ಲಿ ಗೆದ್ದವರು ಪ್ಲೇಆಫ್‌ನಲ್ಲಿ ಮತ್ತೊಂದು ಸ್ಥಾನವನ್ನು ಖಚಿತಪಡಿಸಿಕೊಳ್ಳಲಿದ್ದಾರೆ. ಸದ್ಯ ಸಿಎಸ್​ಕೆ 14 ಅಂಕಗಳೊಂದಿಗೆ ಪಾಯಿಂಟ್ಸ್ ಪಟ್ಟಿಯಲ್ಲಿ 3ನೇ ಸ್ಥಾನದಲ್ಲಿದೆ. ಎಸ್​​ಆರ್​ಎಚ್​ ಮತ್ತು ಡೆಲ್ಲಿ ಕ್ಯಾಪಿಟಲ್ಸ್ 14 ಅಂಕಗಳೊಂದಿಗೆ ಕ್ರಮವಾಗಿ 4 ಮತ್ತು 5ನೇ ಸ್ಥಾನದಲ್ಲಿದೆ. ಎಸ್​ಆರ್​ಎಚ್​ಗೆ ಇನ್ನೂ ಎರಡು ಪಂದ್ಯಗಳು ಬಾಕಿ ಇದೆ. ಆದರೆ, ಡೆಲ್ಲಿ ಕ್ಯಾಪಿಟಲ್ಸ್​ ತಂಡದ ಲೀಗ್​ ಪಂದ್ಯಗಳು ಮುಗಿದಿವೆ. ಆರ್​ಸಿಬಿ ಮತ್ತು ಲಖನೌ 12 ಅಂಕಗಳೊಂದಿಗೆ ಕ್ರಮವಾಗಿ 6 ಮತ್ತು 7ನೇ ಸ್ಥಾನದಲ್ಲಿವೆ. ಆದರೆ, ಆರ್​ಸಿಬಿ, ಡೆಲ್ಲಿ ಮತ್ತು ಲಖನೌಗಿಂತ ಉತ್ತಮ ರನ್ ರೇಟ್ ಹೊಂದಿದೆ.

ಆರ್‌ಸಿಬಿ ತಂಡ ಸಿಎಸ್‌ಕೆ ವಿರುದ್ಧ ಉತ್ತಮ ಅಂತರದಿಂದ ಗೆದ್ದರೆ ಪ್ಲೇ ಆಫ್‌ಗೆ ಹೋಗಲಿದೆ. ಸಿಎಸ್‌ಕೆಗೆ ಯಾವುದೇ ರನ್​ ರೇಟ್​ ಅವಶ್ಯಕತೆ ಇಲ್ಲ, ಕೇವಲ ಗೆದ್ದರೆ ಸಾಕು ಪ್ಲೇಆಫ್​ಗೆ ಹೋಗುತ್ತದೆ. ಆದರೆ, ಆರ್‌ಸಿಬಿ ಮೊದಲು ಬ್ಯಾಟಿಂಗ್​ ಮಾಡಿದರೆ 18 ರನ್​​​ಗಳ ಅಂತರದಿಂದ ಗೆಲ್ಲಬೇಕು. ಒಂದು ವೇಳೆ ಚೇಸಿಂಗ್​ ಮಾಡಿದರೆ 18.1 ಓವರ್​ಗಳಲ್ಲೇ ಗುರಿ ಮುಟ್ಟಬೇಕು. ಹೀಗಾಗಿ ಇದೇ 18ರ ಶನಿವಾರ ಬೆಂಗಳೂರಿನ ಚಿನ್ನಸ್ವಾಮಿ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆಯಲಿರುವ ಈ ಪಂದ್ಯಕ್ಕಾಗಿ ಇಡೀ ಕ್ರಿಕೆಟ್ ಜಗತ್ತು ಕಾಯುತ್ತಿದೆ. ಪ್ರಸಕ್ತ ಐಪಿಎಲ್ ಋತುವಿನಲ್ಲಿ ನಾಕೌಟ್ ಪಂದ್ಯವಾಗಿ ಮಾರ್ಪಟ್ಟಿದೆ. ಇಂತಹ ನಿರ್ಣಾಯಕ ಪಂದ್ಯದಲ್ಲಿ 18ನೇ ನಂಬರ್​ ಆರ್​ಸಿಬಿಗೆ ಮ್ಯಾಜಿಕ್​ ಮಾಡಲಿದೆಯಂತೆ.

ಅಂದಹಾಗೆ ಆರ್​ಸಿಬಿ ಜಾತಕ 18ರ ಸುತ್ತ ಸುತ್ತುತ್ತಿದೆ. ಮೇಲಾಗಿ ಆರ್​ಸಿಬಿ ಪ್ರಮುಖ ಬ್ಯಾಟ್ಸ್​ಮನ್​ ವಿರಾಟ್ ಕೊಹ್ಲಿ ಅವರ ಜೆರ್ಸಿ ಸಂಖ್ಯೆಯೂ 18. ಪಂದ್ಯ ನಡೆಯುವ ದಿನಾಂಕವೂ 18 ಮತ್ತು ಗೆಲುವಿನ ಅಂತರವೂ 18 ರನ್​ ಮತ್ತು 18 ಓವರ್​ನಲ್ಲಿ ಗೆಲ್ಲಬೇಕಾಗಿರುವುದರಿಂದ​ 18ನೇ ನಂಬರ್​ ಆರ್​ಸಿಬಿ ಪಾಲಿಗೆ ತುಂಬಾ ನಿರ್ಣಾಯಕವಾಗಿದೆ. ಅದರಲ್ಲೂ ಕೊಹ್ಲಿ 18ರ ಮೇಲೆ ವಿಶೇಷ ಒಲವಿದೆ. 18ನೇ ತಾರೀಖಿನಂದು ನಡೆದ ಪಂದ್ಯಗಳಲ್ಲಿ ಉತ್ತಮ ಪ್ರದರ್ಶನವನ್ನು ನೀಡಿದ್ದಾರೆ ಮತ್ತು ಆರ್​ಸಿಬಿ ಆ ಪಂದ್ಯಗಳನ್ನು ಗೆದ್ದಿದೆ.

2013ರ ಮೇ 18ರಲ್ಲಿ ಸಿಎಸ್​ಕೆ ವಿರುದ್ಧದ ಪಂದ್ಯದಲ್ಲಿ ಕೊಹ್ಲಿ ಕೇವಲ 29 ಎಸೆತಗಳಲ್ಲಿ 56 ರನ್​ ಕಲೆಹಾಕಿದ್ದರು. 20216ರಲ್ಲಿ ಪಂಜಾಬ್​ ವಿರುದ್ಧ ನಡೆದ ಪಂದ್ಯದಲ್ಲಿ 50 ಎಸೆತಕ್ಕೆ 113 ರನ್​ ಬಾರಿಸಿದ್ದರು. 2023ರಲ್ಲಿ ಸನ್​ ರೈಸರ್ಸ್​ ಹೈದರಾಬಾದ್​ ವಿರುದ್ಧ ನಡೆದ ಪಂದ್ಯದಲ್ಲಿ 63 ಎಸೆತದಲ್ಲಿ ಕೊಹ್ಲಿ 100 ರನ್​ ಗಳಿಸಿದ್ದರು. ಈ ಮೂರೂ ಪಂದ್ಯಗಳಲ್ಲೂ ಆರ್​ಸಿಬಿ ಗೆಲುವು ಸಾಧಿಸಿದೆ. ಹೀಗಾಗಿ ಮೇ 18ರಂದು ತಮ್ಮ ಬ್ಯಾಟ್​ನಿಂದ ಕೊಹ್ಲಿ ರನ್​ ಮಳೆ ಹರಿಸಲಿದ್ದು, ಈ ಬಾರಿ ಸಿಎಸ್​ಕೆ ವಿರುದ್ಧವೂ ಇದು ಮರುಕಳಿಸಲಿದೆ ಎಂದು ಅಭಿಮಾನಿಗಳು ಬಲವಾಗಿ ನಂಬಿದ್ದಾರೆ.

ಒಂದು ರನ್​ ಸೋಲೇ ಗೆಲುವಿನ ಮೆಟ್ಟಿಲು?

ಐಪಿಎಲ್​ಗೆ ಮುನ್ನ ನಡೆದ ವುಮೆನ್ಸ್​ ಪ್ರೀಮಿಯರ್​ ಲೀಗ್​ನಲ್ಲಿ (ಡಬ್ಲ್ಯುಪಿಎಲ್​) ಆರ್​ಸಿಬಿ ಮಹಿಳಾ ತಂಡ ತನ್ನ 7ನೇ ಲೀಗ್​ ಪಂದ್ಯದಲ್ಲಿ ಡೆಲ್ಲಿ ವಿರುದ್ಧ 1 ರನ್​ನಿಂದ ಸೋತಿತು. ಬಳಿಕ ಪುಟಿದೆದ್ದು ಫೈನಲ್​ ಸಹಿತ ಸತತ 3 ಪಂದ್ಯ ಜಯಿಸುವ ಮೂಲಕ ಸ್ಮೃತಿ ಮಂದನಾ ಬಳಗ ಚೊಚ್ಚಲ ಪ್ರಶಸ್ತಿಗೆ ಮುತ್ತಿಕ್ಕಿತು. ಇದೀಗ ಐಪಿಎಲ್​ನಲ್ಲೂ ಆರ್​ಸಿಬಿ ತಂಡ ಕೆಕೆಆರ್​ ವಿರುದ್ಧ 1 ರನ್​ನಿಂದ ಸೋತ ಬಳಿಕ ಪುಟಿದೆದ್ದು ಸತತ 5 ಪಂದ್ಯ ಗೆದ್ದುಕೊಂಡಿದೆ. ಅಂದರೆ ಅದೇ ರೀತಿಯಲ್ಲಿ ಪ್ಲೇಆಫ್​ ಪ್ರವೇಶಿಸುವುದು ಮಾತ್ರವಲ್ಲದೆ ಚೊಚ್ಚಲ ಕಪ್​ ಕನಸನ್ನೂ ನನಸಾಗಿಸಲಿದೆ ಎಂಬುದು ಆರ್​ಸಿಬಿ ಅಭಿಮಾನಿಗಳ ಸಿಹಿ ಲೆಕ್ಕಾಚಾರವಾಗಿದೆ. (ಏಜೆನ್ಸೀಸ್​)

https://www.vijayavani.net/if-they-do-that-one-thing-then-whats-the-playoffs-rcb-will-win-the-cup-too-mohammad-kaif

https://www.vijayavani.net/the-fight-between-rcb-csk-for-the-playoffs-berth-harbhajan-said-who-will-win

https://www.vijayavani.net/she-is-54-he-is-52-love-marriage-at-a-late-age