ಆಲಿಯಾ ಬದ್ಲಾಗಲ್ಲ ... ರಾಜಮೌಳಿ ಮಹತ್ವದ ತೀರ್ಮಾನ

ಬಾಲಿವುಡ್​ ನಟಿ ಆಲಿಯಾ ಭಟ್​ ಬಗ್ಗೆ ಜನರಲ್ಲಿ ಇಷ್ಟೊಂದು ಆಕ್ರೋಶವಿದೆಯಾ ಎಂಬ ಪ್ರಶ್ನೆ ಎಲ್ಲರನ್ನೂ ಕಾಡುತ್ತಿದೆ. ಅದಕ್ಕೆ ಕಾರಣ, ಆಲಿಯಾ ಅಭಿನಯದ 'ಸಡಕ್​ 2' ಚಿತ್ರಕ್ಕೆ ಪ್ರೇಕ್ಷಕರಿಂದ ಒಂದೇ ಸಮನೆ ಡಿಸ್ಲೈಕ್​ಗಳು ಸಿಗುತ್ತಿರುವುದು. ಈಗಾಗಲೇ ಚಿತ್ರಕ್ಕೆ ಒಂದು ಕೋಟಿಗೂ ಹೆಚ್ಚು ಡಿಸ್ಲೈಕ್​ಗಳು ಸಿಕ್ಕಿದ್ದು, ಭಾರತೀಯ ಚಿತ್ರರಂಗದಲ್ಲಿ ಒಂದು ಚಿತ್ರದ ಟ್ರೈಲರ್​ಗೆ ಇಷ್ಟೊಂದು ಡಿಸ್ಲೈಕ್​ ಸಿಕ್ಕಿದ್ದು, ಹೊಸ ದಾಖಲೆಯಾಗಿದೆ.

ಇದರಿಂದಾಗಿ ಬೇರೆ ನಿರ್ಮಾಪಕರಲ್ಲಿ ಒಂದು ಭಯ ಶುರುವಾಗಿದೆ. ಆಲಿಯಾ ನಟಿಸಿದ್ದಾರೆ ಎಂಬ ಕಾರಣಕ್ಕೆ ನಾಳೆ ನಮ್ಮ ಚಿತ್ರಗಳಿಗೂ ಇಷ್ಟೊಂದು ಡಿಸ್ಲೈಕ್​ಗಳು ಸಿಕ್ಕರೆ ಹೇಗೆ, ವಿನಾಕಾರಣ ಜನ ತಮ್ಮ ಚಿತ್ರವನ್ನು ತಿರಸ್ಕರಿಸಿದರೆ ಮುಂದೇನು ಕಥೆ ಎಂದು ಆಲಿಯಾ ಅಭಿನಯದ ಚಿತ್ರಗಳ ನಿರ್ಮಾಪಕರ ಪ್ರಶ್ನೆಯಾಗಿದೆ. ಅಷ್ಟೇ ಅಲ್ಲ, ಆಲಿಯಾ ಜತೆಗೆ ಚಿತ್ರ ಮಾಡುವುದಕ್ಕೆ ಮುಂದಾಗಿದ್ದವರು, ಈಗ ಚಿತ್ರವನ್ನು ಮುಂದುವರೆಸಬೇಕಾ ಎಂಬ ಯೋಚನೆಯಲ್ಲಿದ್ದಾರೆ.

ಇದನ್ನೂ ಓದಿ: ಕೆಜಿಎಫ್​-2 ಸಿನಿಮಾ ಚಿತ್ರೀಕರಣಕ್ಕೆ ಅನುಮತಿ ರದ್ದುಪಡಿಸುವ ಬಗ್ಗೆ ಹೈಕೋರ್ಟ್​ ಹೇಳಿದ್ದೇನು?

ಆದರೆ, ನಿರ್ದೇಶಕ ರಾಜಮೌಳಿ ಮಾತ್ರ ತಮ್ಮ 'ಆರ್​ಆರ್​ಆರ್​' ಚಿತ್ರದಿಂದ ಯಾವುದೇ ಕಾರಣಕ್ಕೂ ತಮ್ಮ ಚಿತ್ರದಿಂದ ಆಲಿಯಾ ಅವರನ್ನು ಕೈಬಿಡದಿರಲು ತೀರ್ಮಾನಿಸದ್ದಾರೆ. ಎಲ್ಲರಿಗೂ ಗೊತ್ತಿರುವಂತೆ, 'ಆರ್​ಆರ್​ಆರ್​' ಚಿತ್ರದಲ್ಲಿ ರಾಮ್​ಚರಣ್​ ತೇಜ ಎದುರು ಆಲಿಯಾ ಭಟ್​ ನಾಯಕಿಯಾಗಿ ನಟಿಸಬೇಕಿತ್ತು. 'ಸಡಕ್​ 2' ಚಿತ್ರಕ್ಕೆ ಸಿಗುತ್ತಿರುವ ಪ್ರತಿಕ್ರಿಯೆಯಿಂದ ಎಲ್ಲಿ ರಾಜಮೌಳಿ ಸಹ ಆಲಿಯಾ ಅವರನ್ನು ತಮ್ಮ ಚಿತ್ರದಿಂದ ಕೈಬಿಡುತ್ತಾರೋ ಎಂಬ ಪ್ರಶ್ನೆ ಎಲ್ಲರಲ್ಲೂ ಇತ್ತು.

ಆದರೆ, ರಾಜಮೌಳಿ ಮಾತ್ರ ಯಾವುದೇ ಕಾರಣಕ್ಕೂ ತಮ್ಮ ಚಿತ್ರದಿಂದ ಆಲಿಯಾ ಅವರನ್ನು ಕೈಬಿಡುವುದಿಲ್ಲ ಮತ್ತು ಆಕೆಯನ್ನೇ ನಾಯಕಿಯನ್ನಾಗಿ ಮುಂದುವರೆಸುವುದಾಗಿ ಸ್ಪಷ್ಟಪಡಿಸಿದ್ದಾರೆ. ಆ ಪಾತ್ರಕ್ಕೆ ಆಲಿಯಾ ಸೂಕ್ತವಾಗಿ ಹೊಂದುವುದರಿಂದ, ಆಕೆಯನ್ನು ಕೈಬಿಡುವ ಪ್ರಶ್ನೆಯೇ ಇಲ್ಲ ಎಂಬುದು ರಾಜಮೌಳಿ ತೀರ್ಮಾನ.

ಇದನ್ನೂ ಓದಿ: ಆಸ್ಟ್ರೇಲಿಯಾದಲ್ಲಿಯೂ ಸುಶಾಂತ್​ ಸಾವಿಗೆ ನ್ಯಾಯ ಸಿಗಲಿ ಎನ್ನುತ್ತಿವೆ ಬಿತ್ತಿ ಫಲಕಗಳು…

ಅಲ್ಲದೆ ಇದಕ್ಕೆ ಇನ್ನೂ ಒಂದು ಕಾರಣವಿದೆ. ಏನೆಂದರೆ, 'ಆರ್​ಆರ್​ಆರ್​' ಚಿತ್ರ ಬಿಡುಗಡೆಯಾಗುವುದಕ್ಕೆ ಏನಿಲ್ಲವೆಂದರೂ ಒಂದೂವರೆ ವರ್ಷ ಬೇಕು. ಈಗ ಚಿತ್ರ ಸಾಗುತ್ತಿರುವ ರೀತಿ ನೋಡಿದರೆ, ಚಿತ್ರ ಬಿಡುಗಡೆಯಾಗುವುದೇನಿದ್ದರೂ 2022ರ ಸಂಕ್ರಾಂತಿ. ಅದಕ್ಕೆ ಸಾಕಷ್ಟು ಸಮಯವಿರುವುದರಿಂದ, ಅಷ್ಟರಲ್ಲಿ ಜನರಿಗೆ ಸಹಜವಾಗಿಯೇ ಆಲಿಯಾ ಬಗ್ಗೆ ಆಕ್ರೋಶ ಕಡಿಮೆಯಾಗಿರುತ್ತದೆ.

ಮೇಲಾಗಿ 'ಆರ್​ಆರ್​ಆರ್​', ಆಲಿಯಾ ಒಬ್ಬರನ್ನೇ ನಂಬಿಕೊಂಡು ಕೂತಿಲ್ಲ. ಅಲ್ಲಿ ಜ್ಯೂನಿಯರ್​ ಎನ್​.ಟಿ.ಆರ್​, ರಾಮ್​ಚರಣ್​ ತೇಜ ಇದ್ದಾರೆ. ಅಜಯ್​ ದೇವಗನ್​ ಇದ್ದಾರೆ. ಎಲ್ಲಕ್ಕಿಂತ ಹೆಚ್ಚಾಗಿ ರಾಜಮೌಳಿ ಅವರ ಹೆಸರಿದೆ. ಇಷ್ಟೆಲ್ಲಾ ಪ್ಲಸ್​ಗಳು ಇರುವುದರಿಂದ, ಆಲಿಯಾ ಚಿತ್ರದಲ್ಲಿ ನಟಿಸುವುದು ಮೈನಸ್​ ಆಗುವುದಿಲ್ಲ ಎಂಬುದು ರಾಜಮೌಳಿ ಲೆಕ್ಕಾಚಾರ. ಅದೇ ಕಾರಣಕ್ಕೆ ಅವರನ್ನು ಮುಂದುವರೆಸುವುದಕ್ಕೆ ರಾಜಮೌಳಿ ತೀರ್ಮಾನಿಸಿದ್ದಾರೆ.

https://www.vijayavani.net/the-painter-review/