ಪ್ರೀತಿಯ ಪತಿಗೆ ನಯನಾತಾರಾ ಕೊಟ್ಟ ದುಬಾರಿ ಉಡುಗೊರೆ ಬೆಲೆ ಕೇಳಿದ್ರೆ ಬೆರಗಾಗ್ತೀರಾ!

ಚೆನ್ನೈ: ಏಳು ವರ್ಷಗಳ ಡೇಟಿಂಗ್​ ನಂತರ ಲೇಡಿ ಸೂಪರ್​ ಸ್ಟಾರ್​ ನಯನತಾರಾ ಮತ್ತು ನಿರ್ದೇಶಕ ವಿಘ್ನೇಶ್​ ಶಿವನ್​ ತಮ್ಮಿಬ್ಬರ ಸಂಬಂಧಕ್ಕೆ ವಿವಾಹದ ಮೂಲಕ ಅಧಿಕೃತ ಮುದ್ರೆ ಒತ್ತಿದ್ದಾರೆ. ಜೂನ್​ 9ರಂದು ಮಹಾಬಲಿಪುರಂನ ಖಾಸಗಿ ರೆಸಾರ್ಟ್​ ಒಂದರಲ್ಲಿ ಇಬ್ಬರು ಕುಟುಂಬದ ಸಮ್ಮುಖದಲ್ಲಿ ಶಾಸ್ತ್ರೋಕ್ತವಾಗಿ ಮದುವೆ ಆಗಿದ್ದಾರೆ.

ಮದುವೆಯ ಬಳಿಕ ಅನೇಕ ಕುತೂಹಲಕಾರಿ ಸಂಗತಿಗಳು ಬಯಲಿಗೆ ಬರುತ್ತಿವೆ. ಮದುವೆ ದಿನ ವಿಘ್ನೇಶ್​ ಶಿವನ್​ ಸಹೋದರಿಗೆ ಉಡುಗೊರೆಯಾಗಿ 30 ಸವರನ್​ ಚಿನ್ನವನ್ನು ನಯನಾ ನೀಡಿದ್ದಾರೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಇದಕ್ಕಿಂತಲೂ ದೊಡ್ಡದಾಗಿ ಕೇಳಿಬರುತ್ತಿರುವ ಮಾತೆಂದರೆ, ನಯನಾ ಅವರು ತಮ್ಮ ಪ್ರೀತಿಯ ಹುಡುಗ ಹಾಗೂ ಹಾಲಿ ಪತಿ ವಿಘ್ನೇಶ್​ಗೆ 20 ಕೋಟಿ ರೂ. ಬೆಲೆ ಬಾಳುವ ಬಂಗಲೆಯನ್ನು ಉಡುಗೊರೆಯಾಗಿ ನೀಡಿದ್ದಾರೆ ಎಂದು ಹೇಳಲಾಗುತ್ತಿದೆ.

ಮೂಲಗಳ ಪ್ರಕಾರ ಬಂಗಲೆಯ ದಾಖಲಾತಿ ಪ್ರಕ್ರಿಯೆ ಪೂರ್ಣಗೊಂಡಿದೆ. ವಿಘ್ನೇಶ್​ ಹೆಸರಿನಲ್ಲೇ ಬಂಗಲೆ ನೋಂದಣಿಯಾಗಿದೆ. ವಿಘ್ನೇಶ್​ ಸಹೋದರಿ ಐಶ್ವರ್ಯಾಗೆ 30 ಸವರನ್​ ಚಿನ್ನವನ್ನು ನಯನಾ ನೀಡಿದ್ದಾರೆ. ತನ್ನ ಆಪ್ತ ಸಂಬಂಧಿಕರಿಗೂ ದುಬಾರಿ ಬೆಲೆಯ ಉಡುಗೊರೆಯನ್ನು ನಯನಾ ನೀಡಿದ್ದಾರೆ ಎಂದು ಹೇಳಲಾಗುತ್ತಿದೆ.

ವಿಘ್ನೇಶ್​ ಕೂಡ ಪ್ರತಿಯಾಗಿ ನಯನಾತಾರಾಗೆ ವಿಶೇಷ ಉಡುಗೊರೆಗಳನ್ನು ನೀಡಿದ್ದಾರೆ. ಮದುವೆ ದಿನ ನಯನಾ ಧರಿಸಿದ್ದ ಚಿನ್ನಾಭರಣವನ್ನು ವಿಘ್ನೇಶ್​ ಬಹಳ ಪ್ರೀತಿಯಿಂದ ಕೊಂಡು ತಂದಿದ್ದರು ಎನ್ನಲಾಗಿದೆ. ಸುಮಾರು 2.5 ರಿಂದ 3 ಕೋಟಿ ರೂಪಾಯಿ ಬೆಲೆ ಬಾಳುತ್ತದೆ. ಇದಿಷ್ಟೇ ಅಲ್ಲದೆ, 5 ಕೋಟಿ ರೂ. ಮೌಲ್ಯದ ಉಂಗುರವನ್ನು ನಯನಾಗೆ ವಿಘ್ನೇಶ್​ ಉಡುಗೊರೆಯಾಗಿ ನೀಡಿದ್ದಾರೆ ಎಂದು ತಿಳಿದುಬಂದಿದೆ. (ಏಜೆನ್ಸೀಸ್​)

https://www.vijayavani.net/r-pub-incident-girl-getting-huge-offers-from-tollywood/

https://www.vijayavani.net/s-fraud-by-lady-in-hariyana-to-teacher/

https://www.vijayavani.net/s-cockroach-in-court-in-newyark/