ಅಂಕಿತಾ ಭಂಡಾರಿ ಕೊಲೆ ಪ್ರಕರಣ: ಸ್ಫೋಟಕ ಮಾಹಿತಿ ಬಿಚ್ಚಿಟ್ಟ ಉತ್ತರಾಖಂಡದ ಮಾಜಿ ಡಿಜಿಪಿ

ಡೆಹ್ರಾಡೂನ್​: ಉತ್ತರಾಖಂಡದ ಹಿರಿಯ ಬಿಜೆಪಿ ಮುಖಂಡನ ಪುತ್ರನಿಗೆ ಸೇರಿದ ರೆಸಾರ್ಟ್​ನಲ್ಲಿ ರಿಸೆಪ್ಷನಿಸ್ಟ್ ಆಗಿ ಕೆಲಸ ಮಾಡುತ್ತಿದ್ದ 19 ವರ್ಷದ ಅಂಕಿತಾ ಭಂಡಾರಿಯ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಉತ್ತರಾಖಂಡದ ಮಾಜಿ ಡಿಜಿಪಿ ಅಲೋಕ್​ ಬಿ ಲಾಲ್​ ಅವರು ನೀಡಿರುವ ಹೇಳಿಕೆಯೊಂದು ಇದೀಗ ಭಾರೀ ಚರ್ಚೆಗೆ ಗ್ರಾಸವಾಗಿದೆ.

ಅಂಕಿತಾಳ ಕೊಲೆ ಪ್ರಕರಣ ಬೆಳಕಿಗೆ ಬಂದ ಕೂಡಲೇ ಉಚ್ಛಾಟಿತ ಬಿಜೆಪಿ ನಾಯಕ ವಿನೋದ್​ ಆರ್ಯ ಪುತ್ರ ಹಾಗೂ ಆರೋಪಿ ಪುಳ್ಕಿತ್​ ಆರ್ಯ ಹೆಸರಿನಲ್ಲಿದ್ದ ರೆಸಾರ್ಟ್ ಅನ್ನು ಧ್ವಂಸ ಮಾಡಿದ್ದು, ಉದ್ದೇಶಪೂರ್ವಕವಾಗಿಯೇ ರೆಸಾರ್ಟ್​ ಹೊಡೆದುರುಳಿಸಲಾಗಿದೆ ಎಂದು ಡಿಜಿಪಿ ಅಲೋಕ್​ ಬಿ ಲಾಲ್​ ಆರೋಪ ಮಾಡಿದ್ದಾರೆ.

ರೆಸಾರ್ಟ್​ನಲ್ಲಿದ್ದ ಮಹತ್ವದ ಸಾಕ್ಷಿಗಳನ್ನು ನಾಶ ಮಾಡಲೆಂದು ಕಟ್ಟದ ನೆಲಸಮ ದಾರಿಯನ್ನು ಆಯ್ದುಕೊಂಡಿದ್ದಾರೆ. ಇದಕ್ಕೆ ಸರ್ಕಾರ ಕುಮ್ಮಕ್ಕು ಸಹ ನೀಡಿದೆ. ಏಕೆಂದರೆ, ರೆಸಾರ್ಟ್​ ಧ್ವಂಸ ಮಾಡಲು ಅನುಸರಿಸಬೇಕಾದ ನಿಯಮವನ್ನು ಗಾಳಿಗೆ ತೂರಲಾಗಿದೆ. ರೆಸಾರ್ಟ್​ ಅಕ್ರಮ ಎಂದು ಕಾರಣ ನೀಡಿರುವುದು ಸಮಂಜಸವಲ್ಲ. ಅಕ್ರಮ ಎಂದು ತಿಳಿದಾಗ ಮೊದಲು ನೋಟಿಸ್​ ಕೊಟ್ಟು, ಆ ಬಳಿಕ ಕಾರ್ಯಾಚರಣೆ ಆರಂಭಿಸಲಾಗುತ್ತದೆ. ಆದರೆ, ಇಲ್ಲಿ ಯಾವುದೇ ನಿಯಮವನ್ನು ಅನುಸರಿಸಿಲ್ಲ. ಪ್ರಕರಣ ಬೆಳಕಿಗೆ ಬರುತ್ತಿದ್ದಂತೆಯೇ ದಿಢೀರನೇ ಕಟ್ಟಡವನ್ನು ಧ್ವಂಸ ಮಾಡುವ ಮೂಲಕ ಸಾಕ್ಷಿ ನಾಶ ಮಾಡಿರಬಹುದು ಎಂದು ಅಲೋಕ್​ ಬಿ ಲಾಲ್​ ದೂರಿದರು.

ಈ ಪ್ರಕರಣದಲ್ಲಿ ಸರ್ಕಾರವು ತಾನು ಪರಿಣಾಮಕಾರಿ ಎಂದು ಹೇಳಿಕೊಳ್ಳುವ ಸಲುವಾಗಿ ತರಾತುರಿಯಲ್ಲಿ ರೆಸಾರ್ಟ್ ಅನ್ನು ನಾಶಪಡಿಸಿದೆ. ಆರೋಪಿಗಳೇ ಆವರಣವನ್ನು ಕೆಡವಿದ್ದಾರೆಯೇ ಎಂದು ಅವರು ಲಾಲ್​ ಆಶ್ಚರ್ಯ ವ್ಯಕ್ತಪಡಿಸಿದರು.

ರೆಸಾರ್ಟ್‌ನ ಮಾಲೀಕರ ಬೇಡಿಕೆಯಂತೆ ಅತಿಥಿಗಳೊಂದಿಗೆ ಲೈಂಗಿಕ ಸಂಭೋಗ ನಡೆಸಲು ನಿರಾಕರಿಸಿದ್ದರಿಂದ ಅಂಕಿತಾಳನ್ನು ಕೊಲ್ಲಲಾಗಿದೆ ಎಂದು ಆಕೆಯ ಫೇಸ್‌ಬುಕ್ ಫ್ರೆಂಡ್​ ಒಬ್ಬರು ಆರೋಪ ಮಾಡಿದ್ದಾರೆ. ಅಂಕಿತಾಳನ್ನು ಕೊಲೆ ಮಾಡಿದ್ದಾಗಿ ಉಚ್ಛಾಟಿತ ಬಿಜೆಪಿ ನಾಯಕ ವಿನೋದ್​ ಆರ್ಯ ಪುತ್ರ ಪುಳ್ಕಿತ್​ ಆರ್ಯ ಪೊಲೀಸ್​ ವಿಚಾರಣೆಯಲ್ಲಿ ತಪ್ಪೊಪ್ಪಿಕೊಂಡಿದ್ದಾನೆ. ಅಂಕಿತಾಳ ಜೊತೆ ನಡೆದ ವಾಗ್ವಾದದ ವೇಳೆ ತನ್ನಿಬ್ಬರು ಸ್ನೇಹಿತರೊಂದಿಗೆ ಸೇರಿ ಆಕೆಯನ್ನು ಕಾಲುವೆಗೆ ನೂಕಿ ಕೊಂದಿದ್ದಾಗಿ ಆರೋಪಿಗಳು ಸಹ ತಪ್ಪೊಪ್ಪಿಕೊಂಡಿದ್ದಾರೆ. ಈಗಾಗಲೇ ಪುಳ್ಕಿತ್​ ಆರ್ಯ ಸೇರಿ ಮೂವರನ್ನು ಉತ್ತರಾಖಂಡದ ಪೊಲೀಸರು ಬಂಧಿಸಿದ್ದಾರೆ. (ಏಜೆನ್ಸೀಸ್​)

https://www.vijayavani.net/r-trying-to-make-me-a-prostitute-wont-sell-myself-for-rs-10000-gloomy-details-of-ankitas-whatsapp-chat-with-friend/

https://www.vijayavani.net/r-watch-ghost-video-in-varanasi-creates-panic/

https://www.vijayavani.net/r-pfi-pfi-members-arrested-nia-pfi-ban-central-govt/