ಯೂಕ್ರೇನ್​​ ಜತೆ ರಾಜಿಗೆ ಸಿದ್ಧ; ಟ್ರಂಪ್ ಪದಗ್ರಹಣಕ್ಕೂ ಮುನ್ನ ಹೊರಬಿತ್ತು ರಷ್ಯಾ ಅಧ್ಯಕ್ಷರ ಹೇಳಿಕೆ.. ಪುಟಿನ್​ ಹೇಳಿದ್ದೇನು? |Putin Statement

ಮಾಸ್ಕೋ: ಯುದ್ಧವನ್ನು ಕೊನೆಗೊಳಿಸಲು ಡೊನಾಲ್ಡ್ ಟ್ರಂಪ್ ಅವರೊಂದಿಗೆ ಸಂಭಾವ್ಯ ಮಾತುಕತೆಗಳಲ್ಲಿ ಯೂಕ್ರೇನ್​ನೊಂದಿಗೆ ರಾಜಿ ಮಾಡಿಕೊಳ್ಳಲು ಸಿದ್ಧ ಎಂದು ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್(Putin Statement) ಹೇಳಿದ್ದಾರೆ. ಅಲ್ಲದೆ ಇದರಲ್ಲಿ ಯೂಕ್ರೇನ್​​ ಅಧಿಕಾರಿಗಳೊಂದಿಗೆ ಮಾತುಕತೆ ಆರಂಭಿಸಲು ಯಾವುದೇ ಷರತ್ತುಗಳಿಲ್ಲ ಎಂದು ಪುಟಿನ್ ಹೇಳಿರುವುದು ಗಮನಿಸಬೇಕಾದ ಬಹುಮುಖ್ಯ ಅಂಶವಾಗಿದೆ.

ಇದನ್ನು ಓದಿ: ಅಮೆರಿಕದ ಚುನಾಯಿತ ಅಧ್ಯಕ್ಷರಿಂದ ತೆರಿಗೆ ಕುರಿತು ಭಾರತಕ್ಕೆ ಎಚ್ಚರಿಕೆ; ಡೊನಾಲ್ಡ್​ ಟ್ರಂಪ್​ ಹೇಳಿರುವುದೇನು? | Donald Trump

ರಷ್ಯಾ-ಯೂಕ್ರೇನ್​​ ಯುದ್ಧವನ್ನು ತ್ವರಿತವಾಗಿ ಕೊನೆಗೊಳಿಸುವುದಾಗಿ ಟ್ರಂಪ್ ಪ್ರತಿಜ್ಞೆ ಮಾಡಿದ್ದಾರೆ. ಆದರೆ ಅವರು ಸಂಘರ್ಷವನ್ನು ಹೇಗೆ ಕೊನೆಗೊಳಿಸುತ್ತಾರೆ ಎಂಬುದನ್ನು ಇನ್ನೂ ವಿವರಿಸಿಲ್ಲ. ಪುಟಿನ್ ಅವರ ಈ ಹೇಳಿಕೆಯು ಯೂಕ್ರೇನ್​​ ಯುದ್ಧದ ಸುಮಾರು 34 ತಿಂಗಳ ನಂತರ ಅವರ ವಾರ್ಷಿಕ ಪ್ರಶ್ನೋತ್ತರ ಕಾರ್ಯಕ್ರಮದ ಸಮಯದಲ್ಲಿ ಬಂದಿದೆ. ಕಾರ್ಯಕ್ರಮದಲ್ಲಿ ಅವರು ರಾಜ್ಯ ದೂರದರ್ಶನದಲ್ಲಿ ಮಾಧ್ಯಮಗಳು ಮತ್ತು ಸಾಮಾನ್ಯ ಜನರ ಪ್ರಶ್ನೆಗಳಿಗೆ ಉತ್ತರಿಸುತ್ತಿದರು.

ರಷ್ಯಾ ಪ್ರಸ್ತುತ ದುರ್ಬಲ ಸ್ಥಿತಿಯಲ್ಲಿದೆ ಎಂಬ ಪ್ರಶ್ನೆಯನ್ನು ಪುಟಿನ್ ನಿರಾಕರಿಸಿದರು. ಅಮೆರಿಕದ ಸುದ್ದಿ ವಾಹಿನಿಯ ವರದಿಗಾರರ ಪ್ರಶ್ನೆಗೆ ಉತ್ತರಿಸಿದ ಪುಟಿನ್, ಟ್ರಂಪ್ ಅವರೊಂದಿಗೆ ವರ್ಷಗಳ ಕಾಲ ಮಾತನಾಡಿಲ್ಲ ಎಂಬುದನ್ನು ಸೂಚಿಸಿದ ಅವರು, ಪ್ರಸ್ತುತ ಟ್ರಂಪ್ ಅವರನ್ನು ಭೇಟಿ ಮಾಡಲು ಸಿದ್ಧ ಎಂದು ಹೇಳಿದ್ದಾರೆ.

ಇದೇ ಸಮಯದಲ್ಲಿ ಪುಟಿನ್​​, ನಾವು ಮಾತುಕತೆ ಮತ್ತು ಹೊಂದಾಣಿಕೆಗಳಿಗೆ ಸಿದ್ಧ ಎಂದು ಯಾವಾಗಲೂ ಹೇಳಿದ್ದೇವೆ. 2022ರಲ್ಲಿ ಯೂಕ್ರೇನ್​​ ವಿರುದ್ಧ ಕ್ರಮವನ್ನು ಪ್ರಾರಂಭಿಸಿದಾಗ ರಷ್ಯಾ ಪ್ರಸ್ತುತ ಪ್ರಬಲ ಸ್ಥಾನದಲ್ಲಿತ್ತು. ರಷ್ಯಾದ ಪಡೆಗಳು ಯೂಕ್ರೇನ್​ನಲ್ಲಿ ತಮ್ಮ ಪ್ರಾಥಮಿಕ ಉದ್ದೇಶಗಳನ್ನು ಸಾಧಿಸಲು ಮುಂದಾದರೂ, ಯೂಕ್ರೇನ್​ ಹೋರಾಟ ಸಂಕೀರ್ಣವಾಗಿದೆ ಎಂದು ಪುಟಿನ್ ಒಪ್ಪಿಕೊಂಡಿದ್ದಾರೆ.

ಶೀಘ್ರದಲ್ಲೇ ಹೋರಾಡಲು ಬಯಸುವ ಯೂಕ್ರೇನಿಯನ್​ ನಾಗರಿಕರು ಓಡಿಹೋಗುತ್ತಾರೆ ಎಂದು ನಾನು ಭಾವಿಸುತ್ತೇನೆ. ಹೋರಾಡಲು ಬಯಸುವವರು ಯಾರೂ ಉಳಿಯುವುದಿಲ್ಲ. ನಾವು ಸಿದ್ಧರಿದ್ದೇವೆ ಆದರೆ ಇನ್ನೊಂದು ಬದಿಯು ಮಾತುಕತೆ ಮತ್ತು ರಾಜಿ ಎರಡಕ್ಕೂ ಸಿದ್ಧರಾಗಿರಬೇಕು ಎಂದಿದ್ದಾರೆ.

ಸಂಘರ್ಷದ ಶಾಂತಿಯುತ ಪರಿಹಾರಕ್ಕಾಗಿ ರಷ್ಯಾ ಮಾತುಕತೆಗೆ ಸಿದ್ಧವಾಗಿದೆ ಎಂದು ಪುಟಿನ್ ಈ ಹಿಂದೆ ಹೇಳಿದ್ದರು. ಆದರೆ ಯೂಕ್ರೇನ್, ಉತ್ತರ ಅಟ್ಲಾಂಟಿಕ್ ಒಪ್ಪಂದ ಸಂಸ್ಥೆ (ನ್ಯಾಟೋ)ಗೆ ಸೇರುವ ತನ್ನ ಬಯಕೆಯನ್ನು ತ್ಯಜಿಸಬೇಕು ಎಂದು ಅವರು ತಮ್ಮ ಬೇಡಿಕೆಯನ್ನು ಪುನರುಚ್ಚರಿಸಿದರು. ಆದರೆ ಯೂಕ್ರೇನ್​​​​​ ಮತ್ತು ಪಾಶ್ಚಿಮಾತ್ಯ ದೇಶಗಳು ಈ ಬೇಡಿಕೆಗಳನ್ನು ತಿರಸ್ಕರಿಸಿದವು.‘

ಇದೇ ವಿಚಾರವಾಗಿ ಈ ಹಿಂದೆ ಅಮೆರಿಕದ ಚುನಾಯಿತ ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್​​ ಯೂಕ್ರೇನ್​​ನಲ್ಲಿ ತಕ್ಷಣದ ಕದನ ವಿರಾಮಕ್ಕೆ ಒತ್ತಾಯಿಸಿದ್ದರು. 2025 ಜನವರಿ 20ರಂದು ಡೊನಾಲ್ಡ್​ ಟ್ರಂಪ್​​ ಅಮೆರಿಕ ಅಧ್ಯಕ್ಷರಾಗಿ ಪ್ರಮಾಣ ವಚನ ಸ್ವೀಕರಿಸಲಿದ್ದಾರೆ. ಅದಕ್ಕೂ ಮುನ್ನವೇ ಪುಟಿನ್​ ಅವರ ಈ ಹೇಳಿಕೆ ಬಂದಿದೆ. (ಏಜೆನ್ಸೀಸ್​)

https://www.vijayavani.net/mumbai-boat-tragedy-survivor-claims-navy-boat-driver-was-showing-off-contests-claims-of-engine-failure