ನೀರು ಸರಬರಾಜು ಯೋಜನೆ ವಿಚಾರದಲ್ಲಿ ಮೂರು ಸಭೆಗಳಲ್ಲಿ ಚರ್ಚೆ ನಡೆಸಿದ್ದೇವೆ. ದೂರು ನೀಡಿದ್ದೇವೆ. ಆದರೆ ಯಾವುದೇ ಫಲಿತಾಂಶ ಸಿಕ್ಕಿಲ್ಲ. ಸಂಬಂಧಪಟ್ಟ ಇಂಜಿನಿಯರ್ಗಳು ಭರವಸೆ ನೀಡುತ್ತಾರೆ ಎಂದು ಸದಸ್ಯರಾದ ಅರುಣ್ ಶೆಟ್ಟಿ, ಉಮೇಶ್ ಕರ್ಕೇರ, ವಹೀದಾ ಬಾನು, ಸುರೇಶ್ ದೇವಾಡಿಗ, ದೇವರಾಜ್ ಕೋಟ್ಯಾನ್ ದೂರಿದರು. ಜಲಮಂಡಳಿ ಇಂಜಿನಿಯರ್ ರಕ್ಷಿತ್ ರಾವ್ ಉತ್ತರಿಸಿ, ಕುರ್ಕಾಲು ಡ್ಯಾಂನಿಂದ ಕಾಪು ಪುರಸಭೆಗೆ ನೀರು ಯೋಜನೆ ಅನುಷ್ಠಾನಕ್ಕಾಗಿ ನಾಲ್ಕು ವಲಯಗಳನ್ನಾಗಿ ವಿಂಗಡಿಸಿ ಟ್ಯಾಂಕ್ ನಿರ್ಮಿಸಿ, ಪೈಪ್ಲೈನ್ ಜೋಡಿಸಲಾಗುತ್ತಿದೆ. ರಾಜ್ಯ ಸರ್ಕಾರದ ಅನುದಾನದಲ್ಲಿ 30 ಕಿ.ಮೀ, ಕೇಂದ್ರ ಸರ್ಕಾರದ ಅಮೃತ್ ಯೋಜನೆಯಡಿ 71 ಕಿ.ಮೀ. ಪೈಪ್ಲೈನ್ ಜೋಡನೆಯಾಗಿದೆ. ಅಮೃತ್ ಯೋಜನೆಯಡಿ 2000 ಮನೆಗಳಿಗೆ ಕನೆಕ್ಷನ್ ಆಗಿದೆ. 2,400 ಮನೆಗಳ ಕನೆಕ್ಷನ್ ಜೋಡಣೆ ಪ್ರಗತಿಯಲ್ಲಿದೆ. ಅಲ್ಲಿ ಜಾಗದ ಸಮಸ್ಯೆ, ರಸ್ತೆ ಸಹಿತ ವಿವಿಧ ಕಾರಣ ಅಡ್ಡಿಯಾಗುತ್ತಿವೆ. ಆದಷ್ಟು ಶೀಘ್ರದಲ್ಲಿ ಪೈಪ್ಲೈನ್ ಜೋಡಣೆ ಪೂರ್ಣಗೊಳಿಸಲಾಗುವುದು ಎಂದರು. ಶಾಸಕ ಗುರ್ಮೆ ಸುರೇಶ್ ಮಾತನಾಡಿ, ನೀರು ಪೂರೈಕೆ ಅತಿ ಮುಖ್ಯವಾಗಿದ್ದು ಯಾವುದೇ ಅಡ್ಡಿಯಾಗದಂತೆ ಪೈಪ್ಲೈನ್ ಜೋಡಿಸುವಂತೆ ಸೂಚನೆ ನೀಡಿದರು. ಸದಸ್ಯರು ಸಭೆ ಮುಂದಿಟ್ಟ ಸಮಸ್ಯೆ ಬಗೆಹರಿಸಲು ಇಷ್ಟೇಕೆ ನಿರಾಸಕ್ತಿ ಎಂದು ಪ್ರಶ್ನಿಸಿದರು. ಹಿರಿಯ ಅಧಿಕಾರಿಯನ್ನು ದೂರವಾಣಿ ಮೂಲಕ ಸಂಪರ್ಕಿಸಿ, ಶೀಘ್ರ ಸಮಸ್ಯೆ ಬಗೆಹರಿಸಿಕೊಡುವಂತೆ ತಾಕೀತು ಮಾಡಿದರು.
